Farmers | మేడ్చల్, జూన్ 21 (నమస్తే తెలంగాణ): వానల కోసం రైతన్నలకు ఎదురుచూపులు తప్పడం లేదు. ఆశించినంత మేర వానలు పడకపోవడంతో ఇప్పటి వరకు వరి నార్లు పోయలేదు. ఈ నెల మొదటి వారం నుంచే వరి పంట పండించే రైతులు నార్లు వేసే పనిలో నిమగ్నమయ్యేవారు. అయితే ఇప్పటి వరకు అనుకున్న మేరకు వానలు పడకపోవడంతో వరి నార్లు పోయలేదు. దీంతో ఈ ఏడు వరి నాట్లు ఆలస్యమయ్యే పరిస్థితి కనిపిస్తున్నది. మేడ్చల్-మల్కాజిగిరి జిల్లాలో వర్షాకాలంలో వరి పంట సాగు 18 వేల ఎకరాల సాగు లక్ష్యం కాగా, ఇప్పటి వరకు జిల్లా వ్యాప్తంగా వరినాట్లను 20 ఎకరాల్లో మాత్రమే వేసినట్లు వ్యవసాయశాఖ అధికారులు చెబుతున్నారు.
ఇప్పటి వరకు సుమారు 5 వందల ఎకరాల్లో నారు వేసే పని పూర్తి కావాల్సి ఉంది. అయితే వానాకాలం సీజన్లో వరి పంట సాగుకు ఆలస్యం అయ్యే అవకాశం కనిపిస్తున్నది.
కరెంటు ఎప్పుడొస్తుందో.. ఎప్పుడు పోతుందో? వానలు కురవకున్నా.. బోరుబావుల నుంచి వచ్చే నీటితో వరి నాట్లు వేద్దామన్నా.. కరెంట్ సరఫరాలో సమయపాలన లేక పోవడంతో రైతుల్లో సందిగ్ధం నెలకొన్నది. కరెంటు ఎప్పుడు పోతుందో.. ఎప్పుడు వస్తుందో చెప్పలేని పరిస్థితి ఉన్నదని అన్నదాతలు ఆవేదన వ్యక్తం చేస్తున్నారు. గత బీఆర్ఎస్ ప్రభుత్వ హయాం లో 24 గంటలు నాణ్యమైన కరెంటు సరఫరా ఉండేదన్నారు.