Bonalu | సికింద్రాబాద్ బోనాల ఉత్సవాలను అత్యంత ఘనంగా నిర్వహించుకుందామని మాజీ మంత్రి తలసాని శ్రీనివాస్ యాదవ్ అన్నారు. వివిధ శాఖల అధికారులతో కలిసి సికింద్రాబాద్లోని ఉజ్జయిని మహంకాళి అమ్మవారి ఆలయ పరిసరాలను పరిశీలించారు. ఈ నెల 21వ తేదీన జరిగిఏ బోనాల ఉత్సవాల నిర్వహణ ఏర్పాట్లపై సమీక్షించారు.
ఈ సందర్భంగా తలసాని మాట్లాడుతూ.. ఎంతో చరిత్ర కలిగిన సికింద్రాబాద్ బోనాల ఉత్సవాల సందర్బంగా మహంకాళి అమ్మవారిని దర్శించుకోవడానికి వివిధ ప్రాంతాల నుంచి లక్షలాది మంది భక్తులు వస్తారని తెలిపారు. వారికి ఎలాంటి అసౌకర్యాలు, ఇబ్బందులు కలగకుండా చూడాలని అధికారులను ఆదేశించారు. 22 వ తేదీన రంగం (భవిష్యవాణి), అంబారీ పై అమ్మవారి ఊరేగింపు కార్యక్రమాలను నిర్వహించడం జరుగుతుందని తెలిపారు. అమ్మవారి దర్శనం సందర్బంగా క్యూ లైన్ లలో ఎలాంటి తోపులాటకు ఆవకాశం లేకుండా పటిష్టమైన బారికేడ్లను ఏర్పాటు చేయాలని సూచించారు.
తెలంగాణ రాష్ట్రం ఏర్పడిన తర్వాత ముఖ్యమంత్రి హోదాలో కేసీఆర్ బోనాల ఉత్సవాలను రాష్ట్ర పండుగగా ప్రకటించి అత్యంత ఘనంగా నిర్వహిస్తూ వచ్చిన విషయాన్ని గుర్తుచేశారు. రాష్ట్ర పండుగగా ప్రకటించిన తర్వాత బోనాల ఉత్సవాల విశిష్టత మరింత పెరిగిందని చెప్పారు. ప్రతి సంవత్సరం మాదిరిగానే ఈ సంవత్సరం కూడా భక్తులకు ఎలాంటి ఇబ్బందులు కలుగకుండా అన్ని జాగ్రత్తలు తీసుకోవడం జరుగుతుందని స్పష్టం చేశారు. బోనాల ఉత్సవాలలో భక్తులకు సేవలు అందించే వాలంటీర్లకు ఫొటోతో కూడిన ప్రత్యేక పాస్లను జారీ చేయాలని పోలీసు అధికారులను ఆదేశించారు. శాంతి భద్రతల పర్యవేక్షణ కోసం అదనపు పోలీసు సిబ్బంది నియామకంతో పాటు CC కెమెరాల ఏర్పాటుకు చర్యలు తీసుకోవాలని MLA శ్రీనివాస్ యాదవ్ ఆదేశించారు. అదేవిధంగా బోనాల రోజున వచ్చే భక్తుల సంఖ్యను దృష్టిలో ఉంచుకొని ట్రాఫిక్ సమస్య తలెత్తకుండా తగు చర్యలు తీసుకోవాలన్నారు.