సిటీబ్యూరో, మే 13 (నమస్తే తెలంగాణ) : పార్లమెంటు ఎన్నికల నేపథ్యంలో పోలింగ్ కేంద్రాల్లో విద్యుత్ శాఖ ప్రత్యేక ఏర్పాట్లు చేసింది. విద్యుత్ సరఫరాలో అంతరాయం లేకుండా ఉండేందుకు ముందస్తు చర్యలు తీసుకోవాలని దక్షిణ తెలంగాణ విద్యుత్ పంపిణీ సంస్థ చైర్మన్ అండ్ మేనేజింగ్ డైరెక్టర్ ముషారఫ్ ఫరూఖీ ప్రత్యేకంగా ఆదేశించారు.
దీంతో ఆదివారం నుంచే పోలింగ్ బూత్లలో సిబ్బంది ప్రత్యేక బృందాలుగా విధులు నిర్వహించారు. అంతకుముందు ఎన్నికల సామాగ్రి పంపిణీ చేసేందుకు ఏర్పాటు చేసిన డీఆర్సీ సెంటర్ల వద్ద ప్రత్యేకంగా అధికారులను నియమించి పర్యవేక్షణ చేశారు. గ్రేటర్ హైదరాబాద్ పరిధిలోని 9 సర్కిళ్లలోని ఉన్నతాధికారులు క్షేత్ర స్థాయిలో పర్యటించి విద్యుత్ సరఫరా వ్యవస్థను పర్యవేక్షించారు.