కంటోన్మెంట్/మారేడ్పల్లి, మే 6: కొట్లాడి సాధించుకున్న తెలంగాణ రాష్ట్రానికి కేంద్రంలో బీజేపీ సర్కారు అడుగడుగునా అన్యాయం చేస్తున్నదని బీఆర్ఎస్ హైదరాబాద్ జిల్లా ఇన్చార్జి దాసోజు శ్రవణ్కుమార్ మండిపడ్డారు. శనివారం కార్ఖానాలోని అనుభవ్ గార్డెన్లో జరిగిన బీఆర్ఎస్ ఆత్మీయ సమ్మేళనంలో ఆయన మాట్లాడుతూ సీఎం కేసీఆర్ చేపట్టిన అభివృద్ధి, సంక్షేమ కార్యక్రమాలు దేశమంతా రావాలని ప్రజలు కోరుకుంటున్నట్లు తెలిపారు. తెలంగాణ ఏర్పడిన నాటి నుంచి ఇప్పటివరకు కేంద్రంలోని బీజేపీ ప్రభుత్వం పెట్రోల్, డీజిల్ మీద రూ.89 వేల కోట్లను సెస్సు రూపంలో ప్రజల నుంచి వసూలు చేసిందని విమర్శించారు. అద్భుతమైన సంక్షేమ పథకాలతో తెలంగాణ రాష్ట్రాన్ని దేశానికే తలమానికంగా సీఎం కేసీఆర్ అభివృద్ధి చేశారని చెప్పారు. బీఆర్ఎస్ హ్యాట్రిక్ కొట్టడం ఖాయమని స్పష్టం చేశారు. నేడు ఐటీ కారిడార్కు వెళితే డల్లాస్, యూఎస్ఏకు వెళ్లిన అనుభూతి కలుగుతున్నదని, ఐటీ, పరిశ్రమలతో రాష్ట్రం అద్భుతంగా అభివృద్ధి చెందిందని చెప్పారు. టీఎస్ఐపాస్ పేరుతో రూ.3 లక్షల కోట్ల పెట్టుబడులు వచ్చాయని, 20 లక్షల మందికి ఉద్యోగాలు వచ్చాయని ఆ ఘనత మంత్రి కేటీఆర్కే దక్కుతుందన్నారు. మూడోసారి అధికారంలోకి వచ్చేందుకు బీఆర్ఎస్ శ్రేణులు కలిసికట్టుగా కృషి చేయాలని పిలుపునిచ్చారు. ఆత్మీయ సమ్మేళనంలో బోర్డు మాజీ ఉపాధ్యక్షుడు జక్కుల మహేశ్వర్రెడ్డి, మాజీ సభ్యులు పాండుయాదవ్, లోక్నాథం, నళినీకిరణ్, భాగ్యశ్రీ, నేతలు ముప్పిడి మధుకర్, పెద్దాల నర్సింహ, మార్కెట్ డైరెక్టర్ సుశాంత్రెడ్డి పాల్గొన్నారు.v
పింఛన్లు పెంచాలని వృద్ధులు, దివ్యాంగులు, ఒంటరి మహిళలెవరూ అడగలేదు. వారు అడగకుండానే సీఎం కేసీఆర్ మూడింతలు పెంచారు. దేశ చరిత్రలో ప్రజల కోసం అనేక పథకాలను సీఎం కేసీఆర్ ప్రవేశపెట్టి విజయవంతంగా అమలు చేస్తున్నారు. దేశంలో ఇన్ని పథకాలు ఎవరైనా తెచ్చారా. కాంగ్రెస్ అబద్ధపు ప్రచారాలు, బీజేపీ మత విద్వేషాలను ఎండగట్టాలి. బీజేపీ ప్రజలకు మంచి చేయాలంటే కేంద్రం నుంచి బోర్డుకు రావాల్సిన రూ.800 కోట్ల బకాయిలను విడుదల చేయించాలి.
– మల్కాజిగిరి పార్లమెంట్, కంటోన్మెంట్
అసెంబ్లీ ఇన్చార్జి మర్రి రాజశేఖర్రెడ్డి
సామాన్యుల నడ్డి విరిచేందుకే కేంద్ర ప్రభుత్వం పని చేస్తున్నది. మొన్నటి వరకు రూ.400 ఉన్న గ్యాస్ సిలిండర్ ధర నేడు రూ.1,200లకు చేరింది. మోదీ ప్రభుత్వం కార్పొరేట్లకు కొమ్ముకాసేందుకే పనిచేస్తోంది. మోదీ అంబానీ, అదానీలకు దోచి పెడుతున్నారు.
– బేవరేజెస్ కార్పొరేషన్ చైర్మన్ గజ్జెల నాగేశ్
రాష్ట్ర ప్రభుత్వం చేపడుతున్న అభివృద్ధిని చూసి బీఆర్ఎస్కు అండగా నిలవాలి. రాష్ట్రంలో అమలవుతున్న పథకాలు బీజేపీ పాలిత ప్రాంతాల్లో అమలు కావడం లేదు. కంటి వెలుగు, కేసీఆర్ కిట్ ద్వారా రాష్ట్రం ఆరోగ్య తెలంగాణగా మారింది. కంటోన్మెంట్లో ఎన్నికలు నిర్వహించకుండా కేంద్రం చోద్యం చూస్తోంది.
– రాష్ట్ర ఖనిజాభివృద్ధి
సంస్థ చైర్మన్ మన్నె క్రిశాంక్