సిటీబ్యూరో, మే 21 (నమస్తే తెలంగాణ): లోన్ యాప్ డౌన్లోడ్ చేయగానే డబ్బు ఖాతాలో జమ అయ్యింది… రెట్టింపు సొమ్ము ఆరు రోజుల్లో చెల్లించాలంటూ షరతు పెట్టి బ్లాక్మెయిల్ చేసిన సైబర్ నేరగాళ్లు ఒక సాఫ్ట్వేర్ ఉద్యోగి వద్ద నుంచి రూ. 7 లక్షలు వసూలు చేశారు. అల్మాస్గూడకు చెందిన బాధితుడు సాఫ్ట్వేర్ ఉద్యోగి. తనకు అత్యవసరంగా కొన్ని డబ్బులు అవసరం ఉండటంతో లోన్యాప్లైన ఏఏ క్రెడిట్ (క్రాజి మనీ), సేఫ్ మనీ(ఎర్లీ మనీ) యాప్లను డౌన్లోడ్ చేశాడు. ఆ వెంటనే రూ.15 వేలు బ్యాంకు ఖాతాలో జమ అయ్యాయి. ఆ తరువాత ఫోన్ చేసిన నేరగాళ్లు.. ఆరు రోజుల్లో రూ. 30 వేలు చెల్లించాలంటూ షరతు విధించారు. ఈ సందర్భంగా నగ్న ఫొటోలు చూపించిన నేరగాళ్లు బ్లాక్ మెయిల్ చేశారు. బాధితుడు తొలుత తీసుకున్న డబ్బు చెల్లించగానే అతడి ప్రమేయం లేకుండానే రూ.30 వేలు తిరిగి ఖాతాలో డిపాజిట్ చేసి, ఆరు రోజుల్లో రూ. 60 వేలు చెల్లించాలంటూ మళ్లి షరతు పెట్టారు. బాధితుడు అడగకుండానే డబ్బులు పంపించడం, ఆ తరువాత రెట్టింపు వసూలు చేస్తూ వెళ్లారు. సైబర్ నేరగాళ్లు బ్లాక్మెయిల్ చేసి రూ.7 లక్షల వరకు వసూలు చేశారంటూ బాధితుడు రాచకొండ సైబర్క్రైమ్ పోలీసులకు ఫిర్యాదు చేయడంతో కేసు నమోదు చేసి దర్యాప్తు చేపట్టారు.
గూగుల్ మ్యాప్స్ రివ్యూ అంటూ..
నాచారానికి చెందిన బాధితురాలి వాట్సాప్ నంబర్కు +2235165347 నంబర్ నుంచి గూగుల్ మ్యాప్స్ లింక్ చేసేందుకు ఉద్యోగ అవకాశం ఉందంటూ ఓ మెసేజ్ వచ్చింది. మీరు కావాలంటే టెలిగ్రామ్లోకి రావాలంటూ లింక్ కూడా ఇచ్చారు. టెలిగ్రామ్ లింక్లోకి వెళ్లగానే ఉద్యోగం గూర్చి వివరించారు. దీనికి బాధితురాలు సరేనని చెప్పడంతో ఆమె వాట్సాప్ నంబర్కు రెండు గూగుల్ మ్యాప్ లింక్లు పంపించి, వాటిని క్లిక్ చేయాలని సూచించారు. అందుకు ఆమెకు రూ. 180 వచ్చాయి. ఆ తరువాత మరో రెండు టాస్క్లు పూర్తి చేయడంతో రూ.1,592 వచ్చాయి. దీంతో ఆమెకు పూర్తిగా నమ్మకం కలిగింది. మరింత డబ్బు సంపాదించాలంటే ఫలాన లింక్ క్లిక్ చేసి వెబ్సైట్లో యూజర్ ఐడీ, పాస్వర్డ్ నమోదు చేసుకోవాలని సూచించారు. దీంతో ఆమె ఆ లింక్ను ఓపెన్ చేసి రిజిస్ట్రేషన్ చేసుకుంది. ఆ తరువాత సైబర్నేరగాళ్లు చెప్పినట్లు ఫాలో అవుతూ పెట్టుబడి పెడుతూ వెళ్లి రూ.8,71,631 మోసపోయింది. బాధితురాలి ఫిర్యాదు మేరకు రాచకొండ సైబర్క్రైమ్ పోలీసులు కేసు నమోదు చేసి దర్యాప్తు చేపట్టారు.