సిటీబ్యూరో, మే 31, (నమస్తే తెలంగాణ): లోక్ సభ ఎన్నికలకు సంబంధించి కౌంటింగ్ ప్రక్రియ సజావుగా పారదర్శకంగా నిర్వహించేందుకు జీహెచ్ఎంసీ పకడ్బందీ చర్యలు చేపడుతున్నది. ఈ నెల 4న జరిగే హైదరాబాద్, సికింద్రాబాద్ పార్లమెంట్ ఎన్నికలతో పాటు కంటోన్మెంట్ ఉప ఎన్నికకు సంబంధించిన ఓట్ల లెక్కింపునకు మొత్తం 16 కౌంటింగ్ కేంద్రాలను ఏర్పాటు చేశారు. అన్ని సెగ్మెంట్లలో ఓట్ల లెక్కింపునకు ప్రతి హాల్ లో 14 టేబుళ్ల చొప్పున ఏర్పాటు చేశారు. ఇందులో అత్యధికంగా పోలింగ్ స్టేషన్లు ఉన్న జూబ్లీహిల్స్ అసెంబ్లీ సెగ్మెంట్కు 20 టేబుళ్లు, మిగతా నియోజకవర్గంలో 14 టేబుళ్లు ఉండనున్నాయి. ఇక పోస్టల్ బ్యాలెట్ లెక్కింపునకు ప్రత్యేక గదులను ఏర్పాటు చేశారు. సికింద్రాబాద్ పార్లమెంట్కు 10 టేబుళ్లు, హైదరాబాద్ పార్లమెంట్కు 14 టేబుళ్లు ఉంటాయి. లెక్కింపు ప్రక్రియలో 1000 మంది సిబ్బంది పాల్గొనున్నారు. 650 మంది లెక్కింపునకు అవసరం పడుతుండగా, దాదాపు 350 మందిని రిజర్వ్లో ఉంచుతున్నారు. మంగళవారం ఉదయం 8 గంటలకు ఓట్ల లెక్కింపు ప్రారంభం కానుండగా, రౌండ్ల వారీగా కౌంటింగ్ జరుపనున్నారు.
మేడ్చల్, మే 31(నమస్తే తెలంగాణ): కీసర మండలం భోగారం కళాశాలలో మల్కాజిగిరి పార్లమెంట్ పరిధిలోని మేడ్చల్, మల్కాజిగిరి, కుత్బుల్లాపూర్, కూకట్పల్లి, ఉప్పల్ అసెంబ్లీ నియోజకవర్గాలకు సంబంధించిన కౌంటింగ్ కేంద్రాలను ఏర్పాటు చేశారు. శుక్రవారం ఈ కేంద్రాన్ని కలెక్టర్ గౌతమ్, అదనపు కలెక్టర్ విజయేందర్రెడ్డితో కలిసి పరిశీలించి.. పలు సూచనలు చేశారు.