సిటీబ్యూరో, జూలై 24 (నమస్తే తెలంగాణ) : పెండింగ్ బకాయిలు చెల్లించాలంటూ బుధవారం జీహెచ్ఎంసీ ప్రధాన కార్యాలయం ముందు బల్దియా కాంట్రాక్టర్లు ఆందోళన చేపట్టారు. బకాయిలు వెంటనే చెల్లించకపోతే అసెంబ్లీని ముట్టడిస్తామని హెచ్చరించారు. జీహెచ్ఎంసీ కాంట్రాక్టర్స్ యాక్షన్ కమిటీ ఆధ్వర్యంలో దశల వారీగా ఆందోళనలను ఉధృతం చేస్తామని కాంట్రాక్టర్లు హెచ్చరించారు.
పెండింగ్ బిల్లులు క్లియర్ కాకపోవడంతో కొందరు ఆత్మహత్య చేసుకున్నారని, ప్రాణాలు పోతున్నా.. ప్రభుత్వం తమ సమస్యను పట్టించుకోవడం లేదని కాంట్రాక్టర్లు ఆవేదన వ్యక్తం చేశారు. వడ్డీలకు, ఇంట్లో బంగారు ఆభరణాలను సైతం తాకట్టు పెట్టి నగరంలో అభివృద్ధి పనులు చేపట్టామని వెల్లడించారు. అసెంబ్లీ, ఎంపీ ఎన్నికలకు చేసిన పనులకు కూడా బిల్లులు చెల్లించడం లేదని చెప్పారు. బకాయిలు చెల్లించాలని ఆందోళన చేస్తుంటే.. గేట్ల వద్ద సెక్యూరిటీతో అడ్డుకొని అవమానిస్తున్నారని, కమిషనర్ జోక్యం చేసుకొని రూ. 1500 కోట్ల బకాయిలు చెల్లించాలని కాంట్రాక్టర్స్ యాక్షన్ కమిటీ ప్రతినిధులు కోరారు.