కొండ, జూలై 9: రిటైర్డ్ ఐఏఎస్ అధికారి ఇంట్లో దొంగలు పడి 100 తులాల బంగారు ఆభరణాలు ఎత్తుకెళ్లారు. ఈ ఘటన నార్సింగి పోలీస్స్టేషన్ పరిధిలో చోటు చేసుకుంది. పోలీసుల కథనం ప్రకారం.. బండ్లగూడ జాగీరు పరిధిలోని గంధంగూడ కృష్ణారెడ్డినగర్ కాలనీలో రిటైర్డ్ ఐఏఎస్ అధికారి రవిబాబు తన కుటుంబ సభ్యులతో కలిసి ఉంటున్నారు. వారం రోజుల కిందట ఇంటికి తాళం వేసి విజయవాడకు వెళ్లారు. సోమవారం అర్ధరాత్రి సమయంలో తాళం వేసి ఉన్న ఇంట్లోకి దొంగలు చొరబడ్డారు. ఇంట్లో దాచిన బంగారం, నగదు, ఇతర వస్తువులను ఎత్తుకెళ్లారు. తాళం విరిగిపోయి కనిపించడంతో స్థానికులు పోలీసులకు సమాచారమిచ్చారు. పోలీసులు వెంటనే క్లూస్ టీమ్తో కలిసి ఘటనా స్థలానికి వెళ్లి ఆధారాలను సేకరించారు. బాధితులిచ్చిన ఫిర్యాదులో 100 తులాల బంగారం, నగదు, ఇతర వస్తువులు పోయినట్లు పేర్కొన్నారు. అయితే, 15 తులాల బంగారం మాత్రమే దొంగతనానికి గురైనట్టు నార్సింగి ఇన్స్పెక్టర్ హరికృష్ణారెడ్డి తెలిపారు. నిందితుల కోసం ప్రత్యేక బృందాలను రంగంలోకి దింపినట్టు పేర్కొన్నారు. అదే విధంగా స్థానికంగా ఉన్న సీసీ కెమెరాలను కూడా పరిశీలిస్తున్నామని, త్వరలోనే నిందితులను పట్టుకుంటామని సీఐ తెలిపారు.