సిటీబ్యూరో, జూలై 15 (నమస్తే తెలంగాణ): ఒకే ఏడాదిలో 2 లక్షల ప్రభుత్వ ఉద్యోగాలను భర్తీ చేస్తామని ఎన్నికల సమయంలో రాహుల్గాంధీ, రేవంత్రెడ్డి యువతకు హామీ ఇచ్చారని, కాంగ్రెస్ ప్రభుత్వం ఏర్పడి 8 నెలలు కావస్తున్నా.. ఆ దిశగా నోటిఫికేషన్లు వేయలేదని బీఆర్ఎస్ వర్కింగ్ ప్రెసిడెంట్ కేటీఆర్ విమర్శించారు. సోమవారం నగరంలో జరిగిన ఓ కార్యక్రమంలో పాల్గొన్న అనంతరం కేటీఆర్ పీటీఐతో నిరుద్యోగుల అంశంపై ప్రత్యేకంగా మాట్లాడారు.
తెలంగాణలో నిరుద్యోగులు పెద్ద ఎత్తున నిరసనలు, ఆందోళనలు చేస్తున్నారని, అర్ధరాత్రి వేళల్లో సైతం రహదారులపైకి వచ్చి.. ప్రభుత్వ తీరుపై నిరసన వ్యక్తం చేస్తున్నా..సీఎం రేవంత్రెడ్డి మాత్రం స్పందించడం లేదన్నారు. ‘ఢిల్లీలో ఉన్న రాహుల్ గాంధీ తెలంగాణ నిరుద్యోగుల ఆందోళనలపై స్పందించాలి. వారికి కాంగ్రెస్ ఇచ్చిన హామీలను నిలబెట్టుకోవాలి’ అని కేటీఆర్ డిమాండ్ చేశారు.
యువత చదువు పూర్తయిన తర్వాత ఉద్యోగాల కోసమే ఎదురు చూడకుండా, వ్యాపారవేత్తలుగా మారేందుకు ప్రయత్నించాలని బీఆర్ఎస్ వర్కింగ్ ప్రెసిడెంట్ కేటీఆర్ అన్నారు. కోకాపేటలో ఇద్దరు యువకులు ఏర్పాటు చేసిన డ్రాపిట్ ప్రీమియం లాండ్రీ సర్వీస్ను ఆయన ప్రారంభించారు.
ఈ సందర్బంగా కేటీఆర్ మాట్లాడుతూ యువతరాన్ని వ్యాపార రంగంలో ప్రోత్సహించేందుకు గత కేసీఆర్ ప్రభుత్వం ఎన్నో పథకాలను ప్రారంభించిందన్నారు. ప్రస్తుతం కోకాపేటలో ప్రారంభించిన డ్రాపిట్ ప్రీమియం లాండ్రీ సర్వీస్ను నగరంలో 15 చోట్ల ఏర్పాటు చేసే ప్రణాళికలో ఉన్నారని అన్నారు.వీటి ద్వారా కొత్త తరహాలో సేవలు అందించడంతో పాటు ఎంతో మందికి ఉపాధి అవకాశాలు కల్పిస్తున్నారన్నారు.