కంటోన్మెంట్, డిసెంబర్ 24: న్యూ బోయిన్పల్లిలోని ఓ ప్రైవేటు ఆస్పత్రిలో ఉన్న లిఫ్టులో కంటోన్మెంట్ బీఆర్ఎస్ ఎమ్మెల్యే లాస్యనందిత ఇరుక్కుపోయారు. ఆదివారం ఓ ఆస్పత్రి వార్షికోత్సవానికి ఎమ్మెల్యే లాస్యనందిత హాజరయ్యారు. ఆస్పత్రిలోని మూడో అంతస్తుకు వెళ్లేందుకు ఎమ్మెల్యే లిఫ్టు ఎక్కారు. ఆమెతో పాటు పరిమితికి మించి లిఫ్టులో ఎక్కువగా ఎక్కారు. సాంకేతిక లోపం కారణంగా డోర్ మూసుకుపోయింది. అనంతరం సెల్లార్లోకి లిఫ్టు వెళ్లిపోయింది. దీంతో 15 నిమిషాలపాటు అందులోనే ఎమ్మెల్యే ఉండిపోయారు. కాసేపు ఆస్పత్రిలో గందరగోళ పరిస్థితులు నెలకొన్నాయి. ఆస్పత్రి సిబ్బంది డోర్లను పగులగొట్టడంతో ఎమ్మెల్యే బయటకు వచ్చారు. ఎవరికీ ఏమీ కాకపోవడంతో అందరూ ఊపిరి పీల్చుకున్నారు. అనంతరం వార్షికోత్సవాన్ని యథావిధిగా నిర్వహించారు.