శంషాబాద్ రూరల్, జూన్ 18: శంషాబాద్ ఎయిర్పోర్టుకు బాంబు బెదిరింపు సమాచారం రావడంతో వెంటనే అప్రమత్తమైన భద్రతా అధికారులు, సీఐఎస్ఎఫ్ అధికారుల బృందాలు విస్తృతంగా తనిఖీలు నిర్వహించారు. శంషాబాద్ ఎయిర్పోర్టు ప్రతినిధులు తెలిపిన వివరాల ప్రకారం.. శంషాబాద్ ఎయిర్పోర్టుకు మంగళవారం మధ్యాహ్నం ఒంటి గంట సమయంలో ఎయిర్పోర్టు అధికారిక ఈ-మెయిల్కు బెదిరింపు మెసేజ్ వచ్చింది. వెంటనే భద్రతా అధికారులు ఎయిర్పోర్టుకు వచ్చే ప్రయాణికులతో పాటు వాహనాలను విస్తృతంగా తనిఖీలు చేశారు. చివరకు ఏమీ లేదని తేలడంతో ఎయిర్పోర్టు భద్రతా అధికారులు ఊపిరి పీల్చుకున్నారు. ఎయిర్పోర్టు అధికారిక ఈ-మెయిల్కు వచ్చిన బెదిరింపు మెసేజ్పై దర్యాప్తు అధికారులు ఆరా తీస్తున్నట్టు సమాచారం. దీంతో పాటు బెదిరింపు మెసేజ్పై ఆర్జీఐఏ పోలీసులకు ఫిర్యాదు కూడా చేశారు. కేసు నమోదు చేసి దర్యాప్తు చేస్తున్నట్లు పోలీసులు తెలిపారు.