బంజారాహిల్స్ : రాష్ట్రంలోని ప్రభుత్వ పాఠశాలల్లో మౌళిక సదుపాయాలను మెరుగుపర్చేందుకు ప్రభుత్వం చేపట్టిన మన ఊరు-మనబడి కార్యక్రమంలో భాగంగా ఖైరతాబాద్ నియోజకవర్గంలో పలు ప్రభుత్వ పాఠశాలలు ప్రయోజనం పొందనున్నాయి. నగరంలో ఈ కార్యక్రమాన్ని మన బస్తీ-మన బడిగా వ్యవహరించనున్నారు.
శనివారం మన బస్తీ-మనబడి అమలుపై మంత్రులు తలసాని, మహమూద్ అలీతో పాటు జిల్లా కలెక్టర్, ఎమ్మెల్యేల ఆధ్వర్యంలో సమీక్షా సమావేశం నిర్వహించిన సంగతి తెలిసిందే. సమావేశంలో పాల్గొన్న ఖైరతాబాద్ ఎమ్మెల్యే దానం నాగేందర్ ఆదివారం తన నివాసంలో ఏర్పాటు చేసిన విలేకరుల సమావేశంలో మాట్లాడారు.
నియోజకవర్గంలోని ప్రభుత్వ పాఠశాలల రూపురేఖలు మార్చేందుకు మన బస్తీ-మన బడి కార్యక్రమం ఎంతో ఉపయోగపడుతుందని ఎమ్మెల్యే అన్నారు. విద్యాశాఖ అధికారులు ఇప్పటికే సంబంధిత స్కూళ్లకు చెందిన హెడ్మాస్టర్లకు లేఖలు రాసారని, ఆయా పాఠశాలల్లో సమస్యలను పరిష్కరించేందుకు ప్రతిపాదనలు సిద్దం చేస్తున్నారన్నారు.
అదనపు తరగతి గదుల నిర్మాణం. టాయ్లెట్స్, మంచినీటి సదుపాయాలను కల్పించనున్నామని ఎమ్మెల్యే దానం తెలిపారు. పేద విద్యార్థులకు నాణ్యమైన విద్యను అందించేందుకు ప్రభుత్వం కట్టుబడి ఉందని, దీనిలో భాగంగా మన బస్తీ- మన బడి కార్యక్రమాన్ని ముఖ్యమంత్రి కేసీఆర్ రూపొందించారని తెలిపారు.
రాష్ట్రవ్యాప్తంగా ప్రభుత్వ పాఠశాలల అభివృద్ది కోసం సుమారు 7వేల కోట్ల నిధులను కేటాయించిందని, తొలిదశలో రూ.3497కోట్లను ఖర్చు చేస్తారని వెల్లడించారు.