కుత్బుల్లాపూర్, జూలై 11: సోషల్ మీడియా ఎంత వేగంగా విస్తరిస్తున్నదో.. అంతే వేగంతో సైబర్ నేరాల ఉచ్చులో యువత పడిపోతున్నారని సీఐడీ ఎస్పీ లావణ్య సూచించారు. సైబర్ నేరాల పట్ల అప్రమత్తంగా ఉండాలని పేర్కొన్నారు. కొంపల్లిలోని శివశివాని ఇనిస్టిట్యూట్ ఆఫ్ మేనేజ్మెంట్ కళాశాలలో 2024- 26 విద్యా సంవత్సరానికి సంబంధించిన కొత్త బ్యాచ్ ప్రారంభమైంది. ఈ సందర్భంగా నిర్వహించిన కార్యక్రమానికి ఆమె ముఖ్య అతిథిగా హాజరై మాట్లాడుతూ.. ప్రతి ఒక్కరి చేతిలో ఆండ్రాయిడ్ ఫోన్లు వచ్చాయన్నారు. ఇప్పుడు సోషల్ మీడియా ప్రభావం ఎక్కువ ఉన్నదని, దీనికి రెట్టింపుగా సైబర్ నేరగాళ్ల సంఖ్య కూడా పెరుగుతున్నదన్నారు. ఏదో ఒక లింక్ పంపించి, ఆశ చూపడంతో అమాయక యువత వారి ఉచ్చులో పడి నిలువునా దోపిడీకి గురవుతున్నారని పేర్కొన్నారు. అవగాహనతోనే సైబర్ నేరాలను నివారించే అవకాశం ఉన్నదన్నారు. ఈ కార్యక్రమంలో హప్పి మొబైల్ ఈడీ కోట సాయిసంతోష్, కళాశాల చైర్మన్ ఆర్తీ, వైస్ ప్రెసిడెంట్ డా.శైలేష్, అసోసియేట్ వైస్ ప్రెసిడెంట్ దీపికా, డైరెక్టర్ డా.ఎస్వి. రమణారావు, బోధన, బోధనేతర సిబ్బంది, విద్యార్థులు పాల్గొన్నారు.