సిటీబ్యూరో, జూలై 24 (నమస్తే తెలంగాణ): మహిళా శక్తి పథకంతో వచ్చే ఐదేండ్లలో మహిళలను కోటీశ్వరులను చేయాలన్నదే ప్రభుత్వ లక్ష్యమని జీహెచ్ఎంసీ అదనపు కమిషనర్ చంద్రకాంత్ రెడ్డి అన్నారు. బుధవారం జీహెచ్ఎంసీ ప్రధాన కార్యాలయంలోని పన్వర్హాల్లో యూసీడీ ప్రాజెక్టు ఆఫీసర్లు, టీఎల్ఎఫ్ లీడర్లతో సమావేశాన్ని నిర్వహించారు. ఈ కార్యక్రమంలో యూసీడీ జాయింట్ కమిషనర్, పరిశ్రమల శాఖ జేడీ, ఫుడ్ ప్రాసెసింగ్ సొసైటీ అధికారులు, హైదరాబాద్, రంగారెడ్డి, మేడ్చల్ జిల్లాల ఎల్డీఎంలు, మెప్మా స్టేట్ మిషన్ నోడల్ అధికారులు పాల్గొన్నారు.
ఈ సందర్భంగా అదనపు కమిషనర్ చంద్రకాంత్ర్రెడ్డి మాట్లాడుతూ మహిళా శక్తి పథకం కింద క్యాంటీన్లు, క్యాటరింగ్ యూనిట్స్, తెలంగాణ పిండి వంటలు, బొటిక్స్, పిండిగిర్నీ, డీటీపీ జిరాక్స్ సెంటర్, టైలరింగ్, ఎంబ్రాయిడరీ యూనిట్స్ వంటివి ఏర్పాటు చేసుకునేలా ఎస్హెచ్జీ మహిళలకు అవగాహన కల్పించి.. పథకం అమలు చేయడంలో అధికారులు సమన్వయంతో పనిచేయాలన్నారు. సమావేశంలో యూసీడీ ప్రాజెక్టు జాయింట్ కమిషనర్ వెంకట్రెడ్డి, పీడీ సౌజన్య తదితరులు పాల్గొన్నారు.