సిటీబ్యూరో, జులై 23 (నమస్తే తెలంగాణ) : ఫార్మా కంపెనీలో(Pharma company) పెట్టుబడి పెడితే 10 శాతం లాభాలిస్తానంటూ నమ్మిస్తూ పలువురి నుంచి రూ. 4.5 కోట్లు వసూలు చేసి మోసం చేసి మెడికల్ డిస్ట్రిబ్యూటర్ను (Medical distributor) సైబరాబాద్ ఆర్థిక నేరాల విభాగం పోలీసులు అరెస్ట్ చేశారు. డీసీపీ కె.ప్రసాద్ కథనం ప్రకారం.. బోరబండకు చెందిన మెడికల్ డిస్ట్రిబ్యూటర్ రెండ్ల అజయ్కుమార్ ఫార్మా కంపెనీ పెట్టాలని ఫ్లాన్ చేశాడు. ఈ విషయంపై నగరానికి చెందిన కావలి శ్రీనివాస్, మరో 35 మంది కంపెనీ ఏర్పాటుకు రూ. 4,49,30,000 పెట్టుబడి పెట్టారు.
పెట్టుబడి పెట్టిన వారికి లాభాలలో 10 శాతం వాటా ఇస్తామంటూ నమ్మించాడు. అందుకు పెట్టుబడి పెట్టిన వారికి బాండ్ పేపర్లపై గ్యారంటీలు రాసిచ్చాడు, మే, 2020లో పెట్టుబడి పెట్టడంతో మొదట్లో కొన్ని రోజులు కొందరికి లాభాలిచ్చి అందరిలో నమ్మకం కుదిర్చే ప్రయత్నం చేయడంతో చాలా మంది ఆకర్షితులై పెట్టుబడులు పెట్టారు. రూ.4.5 కోట్లు వసూలు చేసిన తరువాత కంపెనీ ఏర్పాటు చేయకుండా ఎలాంటి లాభాలు ఇవ్వకపోవడంతో పాటు బిచాణ ఎత్తేశాడు. దీంతో బాధితులు పోలీసులను ఆశ్రయించారు. ఈ మేరకు పోలీసులు కేసు నమోదు చేసుకొని ఏసీపీ మురళీ కృష్ణ నేతృత్వంలోని బృందం దర్యాప్తు జరిపి నిందితుడు అజయ్కుమార్ని అరెస్ట్ చేశారు.