మారేడ్పల్లి : రైల్లో అక్రమంగా గంజాయి (Ganja) ని తరలిస్తున్న అంతరాష్ట్ర సభ్యుడిని సికింద్రాబాద్ రైల్వే పోలీసులు అరెస్టు చేసి రిమాండ్కు తరలించారు. నిందితుడి వద్ద నుంచి రూ. 15. 50 లక్షల విలువైన 62 కిలోల గంజాయిని స్వాధీనం చేసుకున్నారు.
రైల్వే డీఎస్పీ(RLY DSP) ఎస్ఎన్. జావేద్ తెలిపిన వివరాల ప్రకారం.. ఒడిశా రాష్ట్రం గజపతి జిల్లాకు చెందిన మిహిర్, చిదా, చాంద్ కుమార్ నాయక్ లు ఒడిశాలోని మోహనా నుంచి మహారాష్ట్ర లోని నాందేడ్కు ఎండు గంజాయిని సరఫరా చేస్తున్నారు. సోమవారం ఉదయం సికింద్రాబాద్ రైల్వే స్టేషన్ ప్లాట్ ఫారం నెంబర్ 10 లో ఆర్పీఎఫ్(RPF), జీఆర్పీ పోలీసు సిబ్బంది తనిఖీలు చేస్తుండగా గంజాయి ముఠా సభ్యులు అనుమానస్పందంగా కనిపించారు. వారి బ్యాగ్లను తనిఖీలు చేయగా అందులో ఎండు గంజాయి కనిపించిందని వివరించారు.
అప్పటికే ఇద్దరు నిందితులు బయటికి వెళ్లగా చాంద్ కుమార్ నాయక్ వద్ద నుంచి గంజాయిని స్వాధీనం చేసుకున్నామని తెలిపారు. అతన్ని అదుపులోకి తీసుకొని విచారించగా నాందేడ్ ప్రాంతానికి చెందిన మరో మగ్గురు నిందితులు, ఒడిశా చెందిన మరో ఇద్దరు పరారీలో ఉన్నట్లు పోలీసులు గుర్తించారు. నిందితులను పట్టుకునేందుకు ప్రత్యేక టీంలను ఏర్పాటు చేసినట్లు డీఎస్పీ తెలిపారు. కేసు నమోదు చేసి నిందితుడిని అరెస్టు చేసి రిమాండ్కు తరలించినట్లు వివరించారు.