మెహిదీపట్నం జూన్ 12: ఆషాఢ బోనాల కోసం గోల్కొండ కోటలో ఏర్పాట్లు మొదలయ్యాయి. బోనాల ఏర్పాట్లు ఇంకెప్పుడు..? శీర్షికతో ‘నమస్తే’లో వచ్చిన కథనానికి దేవాదాయ శాఖ అధికారులు స్పందించారు. బుధవారం నుంచి ఎల్లమ్మ ఆలయంలో ఏర్పాట్లు ప్రారంభించారు. కాగా, ఇబ్రహీంబాగ్లో గోల్కొండ ఆలయ ఈవో శ్రీనివాస రాజు ఆధ్వర్యంలో ఆషాఢ మాసం బోనాలకు సంబంధించిన కరపత్రాన్ని ఆలయ సలహాదారు సిరుగుమల్లె రాజు వస్తాద్ ఆవిష్కరించారు. అనంతరం ఆయన మాట్లాడుతూ ఈ సారి బోనాలను ఎలాంటి లోటు పాట్లు లేకుండా నిర్వహించేందుకు అధికారులు కృషి చేయాలన్నారు. గోల్కొండ బోనాలు జూలై 7 నుంచి ప్రారంభం కానున్నాయని, ప్రతి ఆది, గురువారాల్లో తొమ్మిది వారాల పాటు జరుగుతాయని ఈవో శ్రీనివాస రాజు తెలిపారు. జూలై 7న (ఆదివారం) మొదటి పూజ, 11న (గురువారం) రెండో పూజ, 14న (ఆదివారం) మూడో పూజ, 18న (గురువారం) నాలుగో పూజ, 21న (ఆదివారం) ఐదో పూజ, 25న (గురువారం)ఆరో పూజ, 28న (ఆదివారం) ఏడో పూజ, ఆగస్టు 1న (గురువారం) ఎనిమిదో పూజ, ఆగస్టు 4న (ఆదివారం) తొమ్మిదో పూజ ఉంటుందని చెప్పారు.