అంబర్పేట, సెప్టెంబర్ 9 : దళితబంధు పథకానికి దరఖాస్తు చేసుకునే వారు ముందుగా తాము ప్రారంభించాలనుకునే వ్యాపారం, యూనిట్కు సంబంధించి ఖచ్చితమైన ప్రాజెక్టు రిపోర్టును కలిగి ఉండాలని ఎమ్మెల్యే కాలేరు వెంకటేశ్ అన్నారు. దళితబంధుకు దరఖాస్తు చేసుకునేందుకు వచ్చిన వారికి దళితబంధు పథకంపై శనివారం ఎమ్మెల్యే అవగాహన కల్పించారు. మొదటి విడత దళతబంధు పథకంలో చాలా మందికి కారు, సెంట్రింగ్, టెంట్ హౌజ్ కోసం దరఖాస్తు చేసుకుంటే వారికి మంజూరైందని చెప్పారు. కానీ రెండో విడతలో మాత్రం తాము ప్రారంభించాలనుకునే వ్యాపారానికి సంబంధించిన ఖచ్చితమైన ప్రాజెక్టు రిపోర్టు ఉండాలన్నారు. సొంతంగా వ్యా పారం చేసుకునే వారు తాము చేసే వ్యాపారానికి సంబంధించి పూర్తి అవగాహన కలిగి ఉండాలన్నారు. దరఖాస్తుతో వచ్చిన వారిని ఎవరెవరు ఏ వ్యాపారం చేస్తారని, ఏ యూనిట్ పెట్టుకోవాలనుకున్నారని అడిగారు. రెండో విడతలో మాత్రం దరఖాస్తు చేసుకునే వారు అధికారులు అడిగే ప్రశ్నలకు ఖచ్చితమైన సమాధానం ఇవ్వాలని చెప్పారు. అవగాహన లేకపోతే దళితబంధు పథకం ఇవ్వరని, దరఖాస్తు తిరస్కరిస్తే తాను ఏమీ చేయలేనని తెలిపారు. అయితే మార్కెట్లో డిమాండ్ ఉన్న యూనిట్ ను ఎంపిక చేసుకోవాలని సూచించారు. వ్యాపారం ప్రారంభిస్తే లాభం వచ్చేలా చూసుకోవాలని అన్నారు.
క్యాన్సర్తో బాధపడుతున్న బాగ్అంబర్పేట డివిజన్ మల్లికార్జుననగర్కు చెందిన మాల మహానాడు కో-ఆర్డినేటర్ మెట్టుమల్లి సుబ్బారాయుడుని ఎమ్మెల్యే కాలేరు వెంకటేశ్ శనివారం పరామర్శించారు. కొన్ని నెలలుగా సుబ్బారాయుడు అస్వస్థతకు గురై ఇంట్లోనే విశ్రాంతి తీసుకుంటున్నాడు. ఈ విషయం తెలుసుకున్న ఎమ్మెల్యే అతని ఇంటికి వెళ్లి ఆరోగ్య పరిస్థితిని తెలుసుకున్నారు. అతనికి అందుతున్న చికిత్సను అడిగారు. కొంత ఆర్థిక సహాయం చేశారు. ఈ కార్యక్రమంలో బీఆర్ఎస్ పార్టీ డివిజన్ అధ్యక్షుడు సీహెచ్ చంద్రమోహన్, నాయకులు అఫ్రోజ్పటేల్, బి.దీపక్కుమార్, గాజుల గోపాల్, బోనం వీరబాబు తదితరులు పాల్గొన్నారు.
కాచిగూడ : అంబర్పేట నియోజకవర్గంలోని ఐదు డివిజన్లలో పేద, మధ్య తరగతి వారి ఇండ్లల్లో ఎవరైన చనిపోతే అంత్యక్రియలు చేయడానికి నేనున్నానని ఎమ్మెల్యే కాలేరు వెంకటేశ్ అభయమిస్తున్నారు. ఆగస్టు నెలలో 29 పేద కుటుంబాల మృతదేహాల అంత్యక్రియలకు సంబంధించి సొంతంగా రూ.1,30,500 లను శ్మశాన వాటిక మేనేజర్ శివకుమార్కు శనివారం అందజేశారు. ఈ సందర్భంగా శివకుమార్ మాట్లాడుతూ ఎమ్మెల్యే కాలేరు వెంకటేశ్ గత నాలుగు సంవత్సరాలుగా పేద, నిరుపేదల కోసం సొంత ఖర్చుతో దాదాపు 1154 దహన సంస్కారాలకు దాదాపు రూ.51లక్షలు అందించినట్లు చెప్పారు. నియోజకవర్గంలోని నిరుపేద కుటుంబంలో చనిపోయిన మృతదేహాల అంత్యక్రియలకు సహాయం చేయడం అదృష్టంగా భావిస్తున్నట్లు ఎమ్మెల్యే కాలేరు వెంకటేశ్ తెలిపారు.