Dharani | మేడ్చల్, జూన్ 9 (నమస్తే తెలంగాణ): ధరణి దరఖాస్తులకు మోక్షం ఎప్పుడో అని దరఖాస్తుదారులు ఆవేదన వ్యక్తం చేస్తున్నారు. ధరణి దరఖాస్తులను పరిష్కరించేందుకు కార్యాచరణ రూపొందించామని రెవెన్యూ యంత్రాంగం చెబుతున్నా.. ఇప్పటి వరకు పెండింగ్ సమస్యలు పరిష్కరం కాలేదని దరఖాస్తుదారులు ఆరోపిస్తున్నారు. మేడ్చల్ జిల్లా వ్యాప్తంగా 2 వేల పైచిలుకు ధరణి పెండింగ్ దరఖాస్తులు ఉన్నట్లు అధికారులు పేర్కొంటున్నారు.
గతంలో ధరణి సమస్యలను పరిష్కరించేందుకు జిల్లా కలెక్టర్లకు మాత్రమే అధికారం ఉండేది. అయితే వేల సంఖ్యలో దరఖాస్తులు ఉన్న నేపథ్యంలో పెండింగ్ సమస్యల సత్వర పరిష్కారానికి ఇటీవలే ఆర్డీవోలు, తహసీల్దార్లకు లాగిన్ సౌకర్యం కల్పించామని ఉన్నతాధికారులు చెబుతున్నారు. తహసీల్దార్లకు పట్టా అసైన్డ్ భూముల విరాసత్(పౌతి), స్పెషల్ ల్యాండ్స్ మ్యాటర్స్, ఖాతా మెర్జింగ్ వంటి వాటికి బాధ్యతలు అప్పగిస్తూ లాగిన్ సౌకర్యం కల్పించినట్లు చెప్పారు. కాగా, పార్లమెంట్ ఎన్నికలకు ముందు రెవెన్యూ యంత్రాంగం ధరణి పెండింగ్ దరఖాస్తుల పరిష్కరానికి స్పెషల్ డ్రైవ్ నిర్వహించినా.. ఎలాంటి ఫలితం రాలేదు.