సిటీబ్యూరో, జూన్ 27 (నమస్తే తెలంగాణ): సైబరాబాద్ పరిధిలో మరో ‘రియల్’ మోసం బాధితుల ఫిర్యాదుతో బయటపడింది. వెంచర్లపై పెట్టుబడి పెడితే అతి తక్కువ కాలంలోనే ఎక్కువ ధరలు వస్తాయని, లేదా తామే స్వయంగా రెట్టింపు ధరకు మీ స్థలాలను కొంటామంటూ అమాయక ప్రజల నుంచి దాదాపు రూ.3.16 కోట్ల వరకు వసూలు చేసి బిచాణా ఎత్తేసిన ఇద్దరిని సైబరాబాద్ ఈఓడబ్ల్యూ పోలీసులు అరెస్టు చేశారు. ఈఓడబ్ల్యూ డీసీపీ కె.ప్రసాద్ కథనం ప్రకారం.. ఏపీలోని రాజమండ్రికి చెందిన కలపాతపు శ్రీలక్ష్మీ ప్రసాద్ జీవనోపాధి కోసం నగరానికి వలసొచ్చి మాదాపూర్లో ఉంటున్నాడు. రియల్ ఎస్టేట్ రంగంలో ఏర్పడిన పరిచయాలతో 2017లో ‘శుభోదయం ఇన్ఫ్రా’ పేరుతో మాదాపూర్లోని అరుణోదయ కాలనీలో రియల్ ఎస్టేట్ సంస్థను ప్రారంభించాడు. సంస్థ సీఎండీగా లక్ష్మీప్రసాద్, అకౌంటెంట్గా విజయవాడకు చెందిన మంగలూరి వెంకటసత్య సుధీర్, డైరెక్టర్లుగా కలపాతపు అనురాధ, రమణారెడ్డి వ్యవహరించారు. ఈ క్రమంలో జనగామ జిల్లా, రఘునాథ్పల్లి మండలం, క్విలషాపూర్ గ్రామంలో ఉన్న పలు ఖాళీ స్థలాలను పరిశీలించారు.
అనంతరం ఆ ఖాళీ స్థలాలను చూపించి పెద్ద ఎత్తున డిపాజిట్లు వసూలు చేయాలని నిర్ణయించుకున్న నిందితులు.. ‘శుభోదయం కాకతీయ ఇన్ఫ్రా’పేరుతో ఆకర్శణీయమైన బ్రౌచర్లు, ఇతర మాధ్యమాల ద్వారా పెద్దఎత్తున ప్రచారం చేశారు. తమ వద్ద ఖాళీ స్థలాలను కొనుగోలు చేస్తే తక్కువ సమయంలోనే రెట్టింపు రాబడి వస్తుందని, మళ్లీ తామే స్వయంగా సదరు స్థలాలను అధిక ధరలకు కొనుగోలు చేస్తామని నమ్మించారు. స్థలాల కోసం మొదటి దశలోనే డబ్బులు చెల్లిస్తే, డిపాజిట్ చేసిన పెట్టుబడిపై 13 నెలల్లో 50 శాతం, 18 నెలల్లో 75 శాతం, 26 నెలల్లో 100 శాతం అప్రిషియేషన్ను కూడా చెల్లిస్తామంటూ జనాలను ఆకర్శించారు. ఈ క్రమంలో కల్లూరి ప్రవీణ్కుమార్రెడ్డితో పాటు మరో 13 మంది దాదాపు రూ.3.16 కోట్ల వరకు శుభోయం ఇన్ఫ్రాలో డిపాజిట్ చేశారు. పెద్ద మొత్తంలో డిపాజిట్లు వసూలు చేసిన తరువాత సంస్థ నిర్వాహకులు ఆ స్థలాలను డిపాజిట్ దారులకు రిజిస్ట్రేషన్ చేయించకపోవడమే కాకుండా తీసుకున్న పెట్టుబడులు కూడా తిరిగి ఇవ్వకుండా బిచాణా ఎత్తేశారు. దీంతో మోసపోయినట్లు గ్రహించిన ప్రవీణ్తో పాటు మరో 13 మంది బాధితులు సైబరాబాద్ ఈఓడబ్ల్యూ పోలీసులను ఆశ్రయించారు. ఈ మేరకు కేసు నమోదు చేసుకున్న పోలీసులు.. గురువారం శుభోదయం ఇన్ఫ్రా ఎండీ లక్ష్మీప్రసాద్, అకౌంటెంట్ వెంకటసత్య సుధీర్ను అరెస్టు చేసి రిమాండ్కు తరలించారు.