Hyderabad | హైదరాబాద్ : బొల్లారంలోని కంటోన్మెంట్ ఆస్పత్రి వద్ద విషాదం నెలకొంది. ఆస్పత్రి ప్రాంగణంలో ఉన్న ఓ భారీ వృక్షం.. దంపతులపై విరిగి పడింది. ఈ ప్రమాదంలో భర్త మృతి చెందగా, భార్యకు తీవ్ర గాయాలయ్యాయి. చికిత్స నిమిత్తం ఆమెను గాంధీ ఆస్పత్రికి తరలించారు. ఆమె పరిస్థితి విషమంగా ఉన్నట్లు సమాచారం.
అయితే ఈ ఉదయం చికిత్స నిమిత్తం కంటోన్మెంట్ ఆస్పత్రి వద్దకు దంపతులు రవీందర్, సరళాదేవి వచ్చినట్లు పోలీసులు పేర్కొన్నారు. సరళాదేవి ఉపాధ్యాయురాలిగా పని చేస్తున్నట్లు గుర్తించారు. రవీందర్ మృతదేహాన్ని పోలీసులు పోస్టుమార్టం నిమిత్తం గాంధీ ఆస్పత్రికి తరలించారు. రవీందర్ కుటుంబంలో విషాదఛాయలు అలుముకున్నాయి.