పిల్లల పెంపకం
మా పాప వయసు 8 ఏండ్లు. 10 రోజులుగా జ్వరం ఉంది. శరీర ఉష్ణోగ్రత 102 నుంచి 103 డిగ్రీల మధ్య ఉంటున్నది. పారాసిటమాల్ మందు ఇస్తే తగ్గుతుంది. జ్వరం లేనప్పుడు హుషారుగానే ఉంటున్నది. ఇప్పటివరకు మలేరియా, డెంగ్యూ, టైఫాయిడ్ టెస్టులు కూడా చేయించాం. అన్నీ బాగానే ఉన్నాయన్నారు. జ్వరమే కాకుండా మెడ భాగంలో గ్రంథులు ఉబ్బినట్టుగా ఉన్నాయి. కొంతమేరకు ఎర్రటి ర్యాషెస్ కూడా వచ్చాయి. ఇది ఏమైనా ప్రమాదమా? జ్వరం వస్తే ఇన్ని రోజులు ఉండటమేంటి? ఆందోళనగా ఉంది. సలహా ఇవ్వండి.
-ఓ పాఠకురాలు
మీ పాపకు పది రోజులుగా జ్వరం వస్తున్నదని చెప్పారు. మెడ భాగంలో కొంచెం కణితిలాగా, గ్రంథులు ఉబ్బినట్టు ఉందని తెలిపారు. ర్యాషెస్ ఉన్నాయంటున్నారు. పీడియాట్రీషియన్కు చూపించి, పరీక్షలు చేశామని చెప్తున్నారు. అయితే పది రోజులు జ్వరం ఉండటమనేది కొన్ని ప్రత్యేక సందర్భాల్లో ఉండొచ్చు. టైఫాయిడ్ లాంటి కొన్ని ఇన్ఫెక్షన్లు ఉన్నప్పుడు జ్వరం రోజులపాటు అలాగే కంటిన్యూ అవుతుంది. ఇదివరకే టైఫాయిడ్ టెస్ట్ చేయించామని చెప్తున్నారు.
అయితే ఈ టైఫాయిడ్ టెస్టులు కూడా కొన్ని రకాలు ఉంటాయి. అందులో మీరు ఏ టెస్టులు చేయించారో వివరించలేదు. కొన్నిసార్లు తొందరగా చేసే ర్యాపిడ్ టెస్టుల్లో టైఫాయిడ్ ఉన్నా లేనట్టుగా, లేకున్నా ఉన్నట్టుగా వచ్చే ఆస్కారం ఉంది. మీరు పీడియాట్రీషియన్ను మరోసారి కలిసి అవసరమైతే అడ్మిట్ అవ్వాల్సి ఉంటుంది. మెడభాగంలో గ్రంథులు ఉబ్బినట్టు అనిపిస్తుందని, ర్యాషెస్ ఉన్నాయని కూడా చెప్పారు.
‘ఇన్ఫెక్షన్స్ మోనో న్యూక్రియోసిస్’ వంటి కొన్ని వైరల్ ఇన్ఫెక్షన్ల వల్ల కూడా ఇలాంటి పరిస్థితి ఎదురయ్యే అవకాశం ఉంది. ఇంకా కొన్నిసార్లు మన శరీరం ఇన్ఫెక్షన్లకు రియాక్ట్ అయ్యి జ్వరం కంటిన్యూ అవుతుంటుంది. ఉదాహరణకు ‘కవాసాకి’ అనే కండిషన్ ఇలాంటిదే. ఈ కండిషన్లో ఉన్నప్పుడు బిడ్డకు ఎక్కువ టెస్టులు చేస్తారు. ప్రధానంగా గుండెకు సంబంధించి ఎకో టెస్ట్ చేయించాలి. రక్తంలో ఇన్ఫెక్షన్ ఎలాగైతే వస్తుందో అలాగే గుండెలోనూ ఇన్ఫెక్షన్లు వచ్చే అవకాశం ఉంది.
కొన్నిసార్లు యూరిన్ ఇన్ఫెక్షన్లూ మొండిగా ఉంటాయి. వెంటనే పీడియాట్రీషియన్ను కలిసి మొండి ఇన్ఫెక్షనా? ఇన్ఫెక్షన్ను పోలిన ఇన్ఫ్లమేటరీ కండిషనా తెలుసుకోవాల్సి ఉంది. ఇంకో విషయమేమిటంటే.. కీళ్లలో నొప్పులు కానీ, కీళ్లు ఉబ్బడం వంటిదేమైనా సమస్య ఉందో లేదో కూడా మీరు చెప్పలేదు. ఇలాంటి పరిస్థితుల్లోనూ జ్వరం ఎక్కువ రోజులు ఉంటుంది. ఆలస్యం చేయకుండా పీడియాట్రీషియన్ను సంప్రదించండి.
డాక్టర్ విజయానంద్
నియోనేటాలజిస్ట్ అండ్ పీడియాట్రీషియన్
రెయిన్బో చిల్డ్రన్స్ హాస్పిటల్స్