Health tips | అందరిలోనూ ఆరోగ్య స్పృహ పెరిగిపోయింది. తినే తిండిలో మరిన్ని పోషకాలు ఉండేలా జాగ్రత్తపడుతున్నారు. అయితే, ‘ఆరోగ్యానికి మంచిది’ అనుకుంటూ మనం మార్కెట్లో కొనే ప్రతి ఆహారం, నిజానికి ఏమంత మంచిది కాకపోవచ్చు. అందుకే ఏది ఉపయోగకరమో, ఏది కాదో తెలుసుకొని తింటే మంచిది.
ఎండుద్రాక్ష
అనుకున్నంత ఆరోగ్యకరం కాదు. ఎండబెట్టడంతో వీటిలో ఉండే చక్కెర మూడు రెట్లు పెరుగుతుంది. మధుమేహ రోగులు మరింతదూరం ఉండాల్సిందే.
డైట్ సోడా
ఇదొక మార్కెటింగ్ ఎత్తుగడ. మిగిలిన సోడాలతో పోలిస్తే ఇందులో చక్కెర తక్కువ అనుకుంటారు. శుద్ధ్ద అబద్ధం. అంతేకాదు, కృత్రిమ రుచులూ అధికమే. ఇవి ఆరోగ్యానికి ఏమాత్రం మంచిది కాదు.
అరటికాయ చిప్స్
వీటిలో ఎలాంటి పోషకాలూ ఉండవు. కేలరీలు, చక్కెరలను పెంచేస్తాయి. అరటికాయ చిప్స్ కంటే అరటిపండే ఉత్తమం.
ఫ్లేవర్డ్ యోగర్ట్
ప్రొబయోటిక్ గ్రీక్ యోగర్ట్ మంచి స్నాక్స్. కానీ ఫ్లేవర్డ్ యోగర్ట్లో ఎన్నో యాడిటివ్స్ ఉంటాయి. కాబట్టి, మామూలు యోగర్టే మంచిది.
పండ్లరసాలు
మార్కెట్లో దొరికే ఫ్రూట్ జ్యూస్ 100 శాతం పండ్లతోనే తయారైనవి కాదు. వాటిలో చక్కెరలు అధికం. మన రక్తంలో చక్కెర స్థాయులను పెంచుతాయి.
లైట్ సలాడ్ డ్రెసింగ్
వీటిలో కూడా ఫ్లేవర్ కోసం ఎన్నో జోడింపులు చేస్తారు. కాబట్టి ఇంట్లో ఆలివ్ నూనె, వెనిగర్తో సలాడ్ చేసుకోవడం ఉత్తమం.
ప్యాకేజ్డ్ సూప్స్
చాలా సూప్స్లో ఉప్పు, చక్కెరలు ఎక్కువ. ఇంట్లో మనకు నచ్చినట్టు చేసుకునే చికెన్, కూరగాయల సూపులే ఆరోగ్యానికి మంచివి.
ప్రొటీన్ బార్లు
ఇది కూడా మార్కెట్ మాయాజాలమే. వీటిలో చక్కెర ఎక్కువ. కాబట్టి, అన్ని ప్రొటీన్ బార్లూ ఆరోగ్యానికి మంచివి కాదు. కొనేటప్పుడు లేబుల్స్ జాగ్రత్తగా చదవాలి. వీటికంటే సహజమైన ప్రొటీన్లు ఇచ్చే పదార్థాలు తీసుకోవడం ఉత్తమం.