డాక్టర్ గారూ నమస్తే. నాకు నగలంటే పిచ్చి. అందులోనూ పెద్దపెద్ద హారాలు, నెక్లెస్లు వేసుకుంటాను. ఇంతవరకూ సమస్య లేదు కానీ, బరువైన లోలాకులు ధరించడం వల్ల నా చెవులు జారిపోయాయి. దీంతో అసహ్యంగా అనిపిస్తున్నది. ఫంక్షన్లకు వెళ్లలేకపోతున్నాను. దీనికి పరిష్కారం ఉందా?
-ఓ పాఠకురాలు
నిజమే.. ఈ సమస్య చాలామంది అమ్మాయిలు ఎదుర్కొంటున్నదే. ఆభరణం మహిళ హక్కు. ఆ మక్కువను ఆమె దూరం చేసుకోలేదు. అదే సమయంలో తన ఆకృతికి మచ్చ తెచ్చుకోనూ లేదు. కానీ చాలా సందర్భాల్లో మనకు తెలియకుండానే నష్టం జరిగిపోతూ ఉంటుంది. ముఖ్యంగా బరువైన కమ్మలు, లోలాకులు ధరించినప్పుడు.. చెవి రంధ్రాలు పెద్దవైపోతుంటాయి. దీంతో చిన్నపాటి ఆభరణాలు పెట్టుకున్నప్పుడు.. ఎక్కడైనా పడిపోయే ప్రమాదం కూడా ఉంటుంది. ఈ సమస్యకు వైద్యశాస్త్రంలో చక్కని పరిష్కారం ఉంది. సర్జరీ ద్వారా అదనపు రంధ్రాన్ని పూడ్చేయవచ్చు. మహా అయితే అరగంటలోపు ప్రొసీజర్ పూర్తయిపోతుంది. ఆ రోజే డిశ్చార్జ్ అయిపోవచ్చు. అయితే, సమస్య అంతవరకూ రాకుండా చూసుకోవడం ఉత్తమం. మధ్యేమార్గంగా తేలికపాటి నగలు ధరించండి. మార్కెట్లో లైట్వెయిట్ జువెలరీ బాగానే అందుబాటులో ఉంది.
-డాక్టర్ అనున్యా రెడ్డి
ఇ.ఎన్.టి సర్జన్,
ఎలర్జీ స్పెషలిస్ట్, ఫేషియల్ కాస్మటిక్ సర్జన్