Health Tips | తింటే గారెలే తినాలి.. అనేవాళ్లు మన పెద్దలు. మినుములు ఇనుములాంటి శరీరాన్నిస్తాయి అనీ చెప్పేవాళ్లు. ఒక్క మినుములు అనే కాదు, ఈ సీజన్లో వచ్చే మక్కజొన్నలతోనూ మనం గారెలు చేసుకుంటాం. బొబ్బర్ల గారెలూ తింటాం. నూనెలో ముంచి తీసే ఇవి ఆరోగ్యానికి ఎంత వరకూ మేలుచేస్తాయి?
– ఓపాఠకురాలు
వడలను మనం నూనెలో ముంచి, ఎర్రగా కాల్చి తీస్తాం. దీంతో కొవ్వులు అధికంగా చేరతాయి. ఈ ఆహార పదార్థం అధిక క్యాలరీలు ఉన్నదిగా మారిపోతుంది. అంటే ఇది బరువు పెరగడానికి కారణం అవుతుందన్నమాట. గారెలను మినుములు, పెసలు, శనగలు, బొబ్బర్లలాంటి పప్పులతో చేస్తాం. అలాగే తెలంగాణలో ఎక్కువగా మక్కవడలనూ వండుతాం.
నిజానికి ఈ మక్కజొన్నలతోపాటు, మిగతా పప్పులన్నీ ఆరోగ్యానికి మేలుచేసేవే. కానీ వాటిని నూనెలో ముంచి తీసి కరకరలాడేలా చేయడం వల్ల వాటిలోని పోషకాలు చాలా వరకూ తగ్గిపోతాయి. కొవ్వులు వచ్చి చేరతాయి. అందుకే, ఎంత రుచిగా ఉన్నా సరే, ఏ వాన పడినప్పుడో, మరీ నాలుక గుంజినప్పుడో తప్ప మాటిమాటికీ గారెలు తినకూడదు. మన పెద్దవాళ్లు కూడా పండుగలు, పబ్బాలప్పుడే గారెలు చేసుకునేవాళ్లు.
పుష్టిగా తినేవాళ్లు. అయితే, అప్పటి జీవనశైలి వేరు. విపరీతంగా కాయకష్టం చేసేవారు. కిలోమీటర్ల దూరం నడిచేవాళ్లు. దీంతో అధిక క్యాలరీలన్నీ ఖర్చయిపోయేవి. మనమేమో, ఎక్కువ శాతం కూర్చునే ఉంటున్నాం. కదలికే కష్టమైపోయింది. అలాంటప్పుడు ఇలాంటి ఆహారం జోలికి ఎక్కువగా పోకుండా ఉండటమే మంచిది. ముఖ్యంగా ఊబకాయం, బీపీ, షుగర్ ఉన్నవాళ్లు, బరువు తగ్గే ప్రయత్నం చేస్తున్నవాళ్లు కూడా అప్పుడప్పుడూ ఒకటీ రెండూ తప్ప ఎక్కువగా తినకూడదు. పూర్తి ఆరోగ్యంగా ఉండి, అరిగించుకుంటాం అనుకుంటే మాత్రం కాస్త ఆలోచించి ఓ పట్టు పట్టొచ్చు!
మయూరి ఆవుల , న్యూట్రిషనిస్ట్
Mayuri.trudiet@ gmail.com