స్ట్రీట్ ఫుడ్ లవర్స్ ఎలాంటి టేస్ట్నైనా, టోస్ట్నైనా ఇట్టే స్వాగతిస్తారు. పోషకాల గనిగా పేరొందిన ఖరీదైన అవకాడో టోస్ట్ను సైతం జనం ఇష్టంగా ఆరగిస్తున్నారు. సూరత్లోని ఓ స్ట్రీట్ ఫుడ్ స్టాల్లో అవకాడో టోస్ట్ను అమ్మకానికి పెడితే జనం నుంచి అనూహ్య స్పందన లభించింది. రూ. 200 ఖరీదైనా, ధరను లెక్కచేయకుండా జనాలు అవకాడో టోస్ట్ను టేస్ట్ చేసిన వీడియో నెట్టింట వైరల్గా మారింది.
అయితే ఆరోగ్యానికి అవకాడో ఎంతో మంచిదని తెలిసిన ప్రజలు ఈ టోస్ట్ను ఇష్టంగా తిన్నారు. మరి ఈ అవకాడో టోస్ట్ మున్ముందూ పానీపూరి, చాట్ వంటి చవకైన స్ట్రీట్ ఫుడ్కు పోటీ ఇస్తుందా అనే విషయాలపై నిపుణులు, చెఫ్లు, రెస్టారెంట్ నిర్వాహకులు తమ అభిప్రాయాలను పంచుకున్నారు. అవకాడోలో ఫైబర్, బీ6, విటమిన్ సీ, పొటాషియం, విటమిన్ ఈ, ఫోలేట్, కాపర్ వంటి పోషకాలు పుష్కలంగా ఉండటంతో రోజువారీ ఆహారంలో దీన్ని భాగం చేసుకోవాలని నిపుణులు సూచిస్తున్నారు.
ప్రజలు ఆరోగ్యకర ఆహారం తీసుకోవాలనే అవగాహనతో హెల్ధీ ఫుడ్ వైపు మొగ్గుచూపుతున్నారని మిచ్లీన్ స్టార్ చెఫ్ రోహత్ ఘాయ్ చెప్పుకొచ్చారు. అవకాడోకు తనదైన ఫ్లేవర్ లేనందున ఎలాంటి ఫుడ్ కాంబినేషన్ ప్రయోగాలకైనా వేదికవుతుందని అన్నారు. అవకాడోలో ఎన్నో విటమిన్లు, యాంటీఆక్సిడెంట్లు ఉన్నాయని, ఇందులో కొలెస్ట్రాల్ను, అధిక రక్తపోటును తగ్గించే పదార్ధాలున్నాయని అందుకే అవకాడో ఇంతగా పాపులర్ అయిందని ఫుడ్ కన్సల్టెంట్, రెస్టారెంట్ నిర్వాహకులు శంతను గుప్తే చెప్పుకొచ్చారు.
అవకాడో దిగుమతులు ఇటీవల పెరగడంతో పాటు లాభదాయకత అధికంగా ఉంటుందనే అంచనాతో దేశీయంగానూ దీన్ని పలువురు పండిస్తున్నారని గణాంకాలు వెల్లడిస్తున్నాయి. అవకాడో ధర కొంత దిగివస్తే వీటితో తయారుచేసే పదార్ధాలు, స్నాక్స్ దేశీ స్ట్రీట్ ఫుడ్ ఐటెమ్లకు దీటైన పోటీ ఇస్తాయని భావిస్తున్నారు.
Read More :
Nita Ambani | పదేళ్ల తర్వాత కాశీకి వెళ్లిన నీతా అంబానీ.. రోడ్సైడ్ షాప్లో చాట్ తిని