భారతదేశంలో అన్ని క్యాన్సర్ కేసులలో… స్త్రీ, పురుష భేదం లేకుండా రొమ్ము క్యాన్సర్ వాటా 13.6 శాతం. ఇంటర్నేషనల్ ఏజెన్సీ ఫర్ రీసెర్చ్ ఆన్ క్యాన్సర్ ప్రచురించిన 2022 ప్రపంచ క్యాన్సర్ నివేదిక ఈ వివరాలను వెల్లడించింది. అదే క్యాన్సర్ బాధిత మహిళల్లో సుమారు 26 శాతం మంది రొమ్ము క్యాన్సర్ బాధితులేనట. అయితే, రొమ్ము క్యాన్సర్పై పోరాటంలో కృత్రిమ మేధ (ఏఐ) సహాయకారిగా ఉంటుందని తాజా అధ్యయనం ఒకటి పేర్కొన్నది. రొమ్ము క్యాన్సర్ రోగులు కోలుకోవడంలో తొలిదశలోనే వ్యాధి నిర్ధారణ, తగిన చికిత్స కీలకంగా నిలుస్తాయనే విషయం తెలిసిందే. ఈ దిశగా కొత్తగా అభివృద్ధి చేసిన ఏఐ సాంకేతికత దాదాపు కచ్చితమైన రోగ నిర్ధారణ చేస్తుంది.
ఈ అధ్యయనాన్ని బోస్టన్కు చెందిన నార్త్ ఈస్ట్రన్ యూనివర్సిటీ, మేన్ హెల్త్ ఇన్స్టిట్యూట్ ఫర్ రీసెర్చ్ సంస్థల పరిశోధకులు నిర్వహించారు. వీళ్లు అభివృద్ధి చేసిన ఎన్సెంబుల్ డీప్ లర్నింగ్ అనే ఏఐ నమూనా రొమ్ములో కణితి కణజాలాన్ని కచ్చితంగా విశ్లేషించగలదు. ఆ కణితి క్యాన్సర్కు దారితీస్తుందా (మాలిగ్నెంట్), లేదా మామూలు గడ్డనా (బినైన్ నాన్ క్యాన్సరస్) అనేది గుర్తించగలుగుతుంది. ఇక రొమ్ము క్యాన్సర్ లక్షణాలను గుర్తించడంలో ఈ ఏఐ నమూనాకు పబ్లిక్గా అందుబాటులో ఉన్న బ్రెస్ట్ క్యాన్సర్ హిస్టోపాథాలాజికల్ డేటాబేస్ బ్రేక్హిస్; ఇంకా బ్రెస్ట్ క్యాన్సర్ హిస్టోపాథాలజీ ఇమేజెస్ బ్యాచ్ అనే సమాచార నిధుల (డేటాసెట్స్) ఆధారంగా శిక్షణను ఇచ్చారు.
బ్యాచ్ నమూనా కోసం పరిశోధకులు రొమ్ములోని కణజాలం ఇమేజ్లను… బినైన్, ఇన్వేసివ్, ఇన్సిటు, నార్మల్ అని నాలుగు రకాలుగా వర్గీకరించారు. అదే బ్రేక్హిస్ కోసం బినైన్, మాలిగ్నెంట్ కణాలను నాలుగు ఉపవిభాగాలుగా వర్గీకరించారు. డక్టల్ కార్సినోమా, లోబ్యులార్ కార్సినోమా, మ్యూసినస్ కార్సినోమా, పాపిలరీ కార్సినోమా రకాలు మాలిగ్నెంట్ కిందికి వస్తాయి. ఎడినోసి, ఫైబ్రో ఎడినోమా, ఫైలోడస్ ట్యూమర్, ట్యూబ్యులర్ ఎడినోమా అనేవి బినైన్ వ్రణాల జాబితాలో ఉన్నాయి. వీటన్నిటినీ కూడా ఎన్సెంబుల్ ఎంఎల్ నమూనా 99.84 శాతం కచ్చితత్వంతో గుర్తించిందని పరిశోధకులు వెల్లడించారు.