అవును.. తెలంగాణ ఉద్యమ దివిటీ తన్నీరు హరీశ్రావు. ఆయనపై రెండు రోజుల కిందట ‘అక్రమాలు, అబద్ధాలు కలిపితే హరీశ్రావు అవుతారు’.. అనే శీర్షికతో వ్యాసం అచ్చయింది. వ్యాసం ఆద్యంతం విధానపరమైన విమర్శలు కాకుండా వ్యక్తిగత విమర్శ, వ్యక్తిత్వ హననంకే పరిమితం కావడం విచారకరం, ఆక్షేపణీయం. రాజకీయాల్లో రాణించాలనుకునేవారు, ఒక ప్రతిపక్ష నేత, అందునా తెలంగాణ ఉద్యమ స్వరూపంలో కీలక భూమికను పోషించిన హరీశ్రావు లాంటి నాయకుడిపై చేసిన విమర్శ కూడా అర్థరహితంగా ఉన్నది.
Harish Rao | ఒక పత్రికలో ఈ నెల 20న ‘హరీశ్ విష ప్రచారం వెనుక కుటిల తంత్రం’ శీర్షికన ప్రచురితమైన వ్యాసాన్ని చూస్తే రచయిత డొల్లతనం కనిపిస్తుంది. విమర్శలు చేయడం ద్వారా స్థాయి పెంచుకోవాలని చేసే ప్రయత్నమే తప్ప సద్విమర్శలను పరిగణనలోకి తీసుకొని సరిదిద్దుకునే ఉద్దేశమేదీ లేదు. ఈ వ్యాసంలో వ్యక్తిత్వాల ప్రస్తావన వచ్చింది కాబట్టి హరీశ్రావు వ్యక్తిత్వం గురించి ఒక్కసారి చెప్పుకొందాం. తెలంగాణ సాధనలో కేసీఆర్ తర్వాత అంతగా ఉద్యమించిన వ్యక్తి హరీశ్ రావే. ఉద్యమంలో రెండోస్థానం ఆయనదేనన్నది శత్రువులు కూడా కాదనలేని వాస్తవం. ప్రజలతో ఆయనకున్న సన్నిహిత సంబంధాలే ఆయనను నాయకునిగా చేశాయి. మిస్డ్ కాల్ను కూడా చూసి తిరిగి ఫోన్ చేసి విషయాలను కనుక్కోవడం ఆయనకు అలవాటు. ఉద్యమం సమయంలోనే కాదు, ఏ పదవిలో ఉన్నా ఈ అలవాటును మానుకోలేదు. మరిచిపోలేదు. ప్రజల్లో విశ్వసనీయత, జవాబుదారీతనంతో ఉన్నారనేందుకు ఈ ఒక్క ఉదాహరణ చాలు. ఉమ్మడి రాష్ట్రంలోనూ, తెలంగాణలోనూ మంత్రిగా ఆయన అందించిన సేవలు, చూపించిన సామర్థ్యం అందరికీ తెలిసినవే.
విమర్శల విషయానికి వస్తే అవి వ్యక్తిగతమైనవో, రాజకీయమైనవో కావు విధానపరమైనవి. అవన్నీ సద్విమర్శలు, సూచనలు. ఇచ్చిన హామీలను అమలుచేయాలని పదే పదే గుర్తు చేస్తున్నారే తప్ప అంతకుమించి ఇంకేమీ అనడం లేదు. చేసిందేమీ లేక, చెప్పుకోవడానికి ఏమీ లేని సమయాల్లోనే వ్యక్తిగత విమర్శలకు దిగుతారన్నది అందరికీ తెలిసిన సత్యం. ప్రస్తుతం జరుగుతున్నదిదే. ‘ప్రతి చిన్న విషయానికీ స్పందిస్తూ నానా యాగీ చేస్తున్నారు’ అని హరీశ్ రావు ను ఉద్దేశించి వ్యాస రచయిత విమర్శించారు. ప్రతి చిన్న విషయాన్నీ పట్టించుకుంటున్నారంటే పరిపాలనపై ఆయనకున్న పట్టు ఏమిటో అర్థమవుతున్నది. ప్రతి చిన్న విషయమూ ప్రజలపై ఎలా ప్రభావం చూపుతుందో ఆయనకు తెలుసు. అందుకే పాలనలోని లోపాలను ఆయన ఎత్తిచూపగలుగుతున్నారు. ప్రజలు ఇచ్చిన అధికారంతోనే ఆయన ప్రభుత్వ పాలనలోని లోటుపాట్లను వివరించగలుగుతున్నారు. ఈసారి ప్రతిపక్ష పాత్ర పోషించాలని ప్రజలు బీఆర్ఎస్ను ఆదేశించారు. అందుకు అనుగుణంగానే ఆయన కార్యాచారణ ఉన్నది. అధికార కాంగ్రెస్కు, ప్రతిపక్ష బీఆర్ఎస్కు ఓట్ల మధ్య ఉన్న తేడా కేవలం రెండు శాతంలోపే అని గుర్తించాలి. బీఆర్ఎస్కు ప్రజలు విపక్ష హోదా ఇచ్చారే తప్ప, రాజకీయరంగం నుంచి దూరం చేయలేదు. ఆ అధికారంతోనే ప్రభుత్వ పాలనలోని లోపాలను ఎత్తిచూపి, పరిష్కార మార్గాలు చెప్తుంటే అది తప్పుగా తోచడం విచిత్రం.
ఇంతకీ హరీష్రావు ఏమడిగారు? అధికారంలోకి వచ్చి ఆరు నెలలైంది. హామీల అమలు ఎంతవరకు వచ్చిందని అడిగారు. ఆరు గ్యారెంటీల అమలుకు మొదటి మంత్రి వర్గం సమావేశంలోనే చట్టం తీసుకొని వస్తామన్నారు. తెచ్చారా? పథకాల లబ్ధికి తెల్లకార్డును అర్హతగా చెప్తున్నారు. మరి తెల్లకార్డుల జారీకి తీసుకున్న చర్యలు ఏమిటి? కనీసం మార్గదర్శకాలు ఇచ్చారా? ఇలా అడగడమే తప్పా?
అర్హులందరికీ రేషన్కార్డులు అందాలంటే తొలుత పేదలెందరో తేలాలి. ఇది జరగాలంటే కులగణన చేపట్టాలి. ఎన్నికల ప్రచారంలో కాంగ్రెస్ అగ్రనేత రాహుల్గాంధీ ఇదే విషయమై హామీ ఇచ్చారు కదా? ఆయన మాటైనా నిలబెట్టరా? దీనిపై కసరత్తు చేయడానికి ఆరు నెలలు సరిపోవా? రుణమాఫీ గురించి ఇప్పుడు ఎంతో కొంత కసరత్తు చేస్తున్నట్టు కనిపిస్తున్నా ఇంతవరకు కాంగ్రెస్ కార్యకర్తల అభిప్రాయాలు తీసుకోలేదు.
రైతు ఉద్యమాల్లో దిట్ట అయిన కోదండరెడ్డి లాంటి వారి సలహాలు కూడా ఇంతవరకు తీసుకోలేదు. అందరితో సంప్రదింపులు జరిపితేనే ఇబ్బందులు లేకుండా పథకం అమల్లోకి వస్తుంది. హామీల సంగతిని కాసేపు పక్కనపెడదాం. పోనీ ఆచరణలో ఉన్న పథకాలనైనా సక్రమంగా అమలు చేస్తున్నారా? జూన్ నెల ముగుస్తున్నా రైతు భరోసా ఊసే లేదు. పొలం పనులు ప్రారంభించే సమయంలోనే రైతులకు విత్తనాలు, ఎరువులు, కూలీలకు చెల్లింపుల కోసం సొమ్ము అవసరం ఉంటుంది. చేతిలో పైసలు లేకపోతే అప్పు చేయకతప్పదు. ఈ దుస్థితి ఉండకూడదనే కేసీఆర్ సర్కారు సకాలంలో రైతు బంధు సొమ్మును రైతుల ఖాతాల్లో జమ చేసింది. ఎవరి ప్రమేయం, అవినీతి లేకుండా నేరుగా సాయం అందింది. మరి ఈ వానాకాలంలో అదెందుకు జరగడం లేదు? దాహమేసినప్పుడే కదా గ్లాసుడు మంచి నీళ్లు అవసరం. తర్వాత ఎప్పుడో బిందెడు నీళ్లు ఇచ్చినా జరగాల్సిన నష్టం జరిగిపోతుంది. నూతన విద్యా సంవత్సరం కూడా మొదలైంది. విద్య నిధులు, విదేశీ స్కాలర్షిప్ల సంగతి ఏమిటో ఎవరికీ తెలియదు.
పొరుగునే చంద్రబాబు అధికారంలోకి వచ్చిన తర్వాత మొదట చేసిన పని.. ఇచ్చిన హామీ మేరకు పెన్షన్ల పెంపు. రాష్ట్ర ఆర్థిక పరిస్థితిపై పూర్తిగా అవగాహన రానప్పటికీ పెన్షన్లు పెంచుతూ ఆదేశాలు ఇచ్చారు. మరి ఇక్కడ సమస్య ఏమిటో? దీనిపై ఆత్మవిమర్శ మాని ఎదురుదాడి ఎందుకో?
తెలంగాణకు జీవనాడి, ఆత్మగౌరవానికి ప్రతీక అయిన సింగరేణి ప్రైవేటు చేతుల్లోకి వెళ్లిపోతున్నా రేవంత్ ప్రభుత్వం మౌనంగా ఉండిపోతోంది. అసలు సింగరేణి ఏర్పాటైనదే ప్రభుత్వ రంగ సంస్థగా. కేంద్ర, రాష్ట్ర ప్రభుత్వాలు ఇందులో భాగస్వాములు. ఇదొక ప్రత్యేక పరిస్థితి. తెలంగాణలోనే కాదు.. ఆంధ్రాలోని జంగారెడ్డిగూడెం ప్రాంతంలో ఉన్న బొగ్గు గనులు కూడా దాని పరిధిలోకి వస్తాయి. తెలంగాణ ఏర్పాటు సమయంలో ఇదే సంగతిని చెప్పారు. వీటన్నింటిని విస్మరించి ప్రైవేటు సంస్థలకు అప్పగించడానికి గనులను కేంద్రం వేలం వేస్తుంటే తగిన స్పందన ఏదీ?
ఇలా ఎటు చూసినా వైఫల్యాలే. అబద్ధాలతో అధికారంలోకి వచ్చిన కాంగ్రెస్ ఆరు నెలల్లో ఏమి సాధించిందంటే చెప్పలేని పరిస్థితి. అన్నీ అసంబద్ధ నిర్ణయాలే. శాంతిభద్రతల్లో ఫెయిల్యూర్. రేవంత్ సర్కార్ కొలువుదీరిన 6 నెలల్లో ఏ ఒక్క ప్రజాప్రయోజనం జరగలేదన్నది వాస్తవం. పాలనపై పట్టు లేకపోవడంతో పాటు అనుభవం లేక సీఎం రేవంత్ అబాసుపాలు కావడం లేదా? పాలనపై దృష్టి సారించే బదులు ఉన్న సమయమంతా పార్టీ ఫిరాయింపులపై దృష్టి పెట్టడం లేదా? ముఖ్యమంత్రికి మంత్రులపై పట్టు ఉందా? అధికారులపై అజమాయిషీ ఉన్నదా? ఇటీవల జరిగిన బదిలీల్లో పారదర్శకత ఉన్నదా? ఏ మంత్రి అయినా ముఖ్యమంత్రికి జవాబు దారీతనంగా పనిచేస్తున్నారా? అంతెందుకు గెలిచిన 65 మంది ఎమ్మెల్యేలలో సీఎం మొహాన్ని చూడని వారు ఎందరు? ఇలా చెప్పుకుంటూ పోతే సీఎం రేవంత్రెడ్డి ఆరు నెలల పాలన వైఫల్యాలు కోకొల్లలు. ఈ అంశాల నుంచి దృష్టి మళ్లించడానికే ఉద్యమ దివిటీ లాంటి హరీశ్రావుపై ఉత్తుత్తి ఆరోపణలు. అంతేకాదు, తెలంగాణ రాష్ట్ర సాధన ఉద్యమంలో, పదేండ్ల పాలనలో హరీశ్ మార్కును ఎవరు కాదనలేరన్నది జగమెరిగిన సత్యం.
ఇలా ఎటు చూసినా వైఫల్యాలే. అబద్ధాలతో అధికారంలోకి వచ్చిన కాంగ్రెస్ ఆరు నెలల్లో ఏమి సాధించిందంటే చెప్పలేని పరిస్థితి. అన్నీ అసంబద్ధ నిర్ణయాలే. శాంతిభద్రతల్లో ఫెయిల్యూర్. రేవంత్ సర్కార్ కొలువుదీరిన 6 నెలల్లో ఏ ఒక్క ప్రజాప్రయోజనం జరగలేదన్నది వాస్తవం. పాలనపై పట్టు లేకపోవడంతో పాటు అనుభవం లేక సీఎం రేవంత్ అబాసుపాలు కావడం లేదా? పాలనపై దృష్టి సారించే బదులు ఉన్న సమయమంతా పార్టీ ఫిరాయింపులపై దృష్టి పెట్టడం లేదా? ముఖ్యమంత్రికి మంత్రులపై పట్టు ఉందా? అధికారులపై అజమాయిషీ ఉన్నదా? ఇటీవల జరిగిన బదిలీల్లో పారదర్శకత ఉన్నదా? ఏ మంత్రి అయినా కూడా ముఖ్యమంత్రికి జవాబు దారీతనంగా పనిచేస్తున్నారా?