Runa Mafi | బ్యాంకుల్లో రూ.లక్షలోపు రుణాలున్న రైతులందరి ఖాతాల్లో మాఫీ సొమ్ము జమ చేశామని ఈ నెల 18న రాష్ట్ర ప్రభుత్వం ప్రకటించింది. కాంగ్రెస్ కార్యకర్తల రుణమాఫీ సంబురాలు కూడా అట్టహాసంగా జరిగాయి. అదే రోజు రైతు వేదికల వద్దనున్న రైతులతో వీడియో కాన్ఫరెన్స్ ద్వారా ముఖ్యమంత్రి మాట్లాడారు. వారితో సంతోషాన్ని పంచుకున్నారు. అంతవరకు బాగానే ఉంది. కానీ, మరుసటి రోజు నుంచే తమకు మాఫీ సొమ్ములు రాలేదని లబోదిబోమంటూ అధికారుల చుట్టూ, బ్యాంకుల చుట్టూ రైతులు తిరగడం మొదలైంది. మాఫీ లీలలు క్రమంగా బయటపడసాగాయి. కొందరు రైతులకు మొత్తానికే మాఫీ కాలేదు. మరికొందరికి సగం, అంతకన్నా తక్కువ సొమ్ము జమ అయింది. భార్యాభర్తల ఖాతాల్లో ఒకరికి వస్తే, ఇంకొకరికి రాలేదు. ఇలా మాఫీ సొమ్ము జమకాని ఖాతాల సమస్యలు అంతాఇంతా కాదు. ఇది సాంకేతిక లోపం వల్ల తలెత్తిన సమస్యా? లేదా ప్రభుత్వ విధివిధానాల మాయా? అనే విషయంపై స్పష్టత ఇచ్చేవారు రాష్ట్రంలో ఒక్కరూ లేరు.
రైతులు ఆందోళన పడవద్దని చెప్తున్న వ్యవసాయ మంత్రి తుమ్మల నాగేశ్వరరావు రోజుకొక విధంగా మాట్లాడుతూ ఈ అంశాన్ని మరింత గందరగోళంలోకి నెట్టేస్తున్నారు. రేషన్కార్డు లేనివారికి పట్టాదారు పాస్బుక్ ఆధారంగా మాఫీ అవుతుందని ప్రభుత్వం ప్రకటించింది. రేషన్కార్డులో కుటుంబ సభ్యుల వివరాలు ఉంటే.. పాస్బుక్లో భూ యజమాని పేరు మాత్రమే ఉంటుంది. ఈ రెండింటి మధ్య ఎలాంటి సమాచార సామ్యత లేదు. మాఫీ కాని రైతులు వ్యవసాయాధికారిని సంప్రదించాలని మంత్రి చెప్పారు. వ్యవసాయ పనులను వదిలేసుకొని ఆఫీసుల చుట్టూ తిరగాలని చెప్పడం తగదు. ప్రభుత్వ అధికారులే ఇంటింటికి తిరిగి రైతులకు స్పష్టమైన సమాచారమివ్వాలి. వాస్తవానికి ఏ అధికారి వద్ద మాఫీకి సంబంధించిన చిట్టా లేదు. సమగ్ర వివరాలు లేవు. అసలు అధికారులకు వాటిని ప్రభుత్వం అందించలేదు.
మాఫీ వివరాలు తెలుసుకునేందుకు ప్రభుత్వ వెబ్సైట్లో లాగిన్ అయి తెలుసుకోవచ్చని చెప్తున్నారు. కానీ, రైతులకు ఇది సాధ్యపడుతుందా? అయినప్పటికీ కొంతమంది ప్రయత్నించగా.. బ్యాంకు ఖాతా వివరాలు, రైతు పేరుతో సరిపోలడం లేదని, రేషన్కార్డులో పేరు లేదని.. ఇలా రకరకాల సమాధానాలు వస్తున్నాయి. ఆగస్టు 15 దాకా సమయం ఉన్నప్పటికీ ప్రభుత్వమే తొందరపడి తప్పులతడకగా మాఫీ చేసింది. దీంతో లక్షలాది మంది రైతులు మానసిక క్షోభకు గురవుతున్నారు. అసలు మొదట పైలట్ ప్రాజెక్టుగా ఒక గ్రామాన్నో లేదా మండలాన్నో ఎంపిక చేసుకొని రుణమాఫీ చేయాల్సింది. ఆ ప్రాంతంలోని రుణమాఫీ లబ్ధిదారులకు, బ్యాంకుల వద్ద ఉన్న పంట రుణాల వివరాలను పోల్చి చూసుకుంటే తప్పొప్పులు బయటపడేవి. వాటిని సరిచేసి తుది జాబితా తయారు చేసి ఉంటే ఎవరికీ ఇబ్బంది ఉండేది కాదు.
వాస్తవానికి జరిగిందేమిటంటే.. బ్యాంకుల హెడ్ ఆఫీసుల నుంచి కంప్యూటర్ ఇచ్చిన జాబితాలు తీసుకుని, ఆ పేర్లకు విధివిధానాల పేరిట తమ కోతల ప్రక్రియను జతచేశారు. ఆ మేరకు సొమ్మును బ్యాంకులకు ప్రభుత్వం అందించింది. బ్యాంకువారు ముంబై, చెన్నై తదితర మహానగరాల్లో ఉండే తమ కంప్యూటర్ సెంటర్ల ద్వారా వాటిని రన్ చేయించారు. వాటి ఫలితాలు బ్రాంచిల్లో ఉండే కంప్యూటర్లలో ప్రతిఫలించాయి. అప్పుడే బ్యాంకు ఖాతాల ద్వారా మాఫీ ఎవరెవరికి వచ్చిందనే విషయం బయటపడింది. ఎవరికి, ఎందుకు రాలేదో? పూర్తి సొమ్ము ఎందుకు జమ కాలేదో? చెప్పేందుకు బ్యాంకుల వద్ద సమాచారమే లేదు. వ్యవసాయ అధికారుల వద్ద కూడా లేదు. లబ్ధిదారుల జాబితాను తయారు చేసి బ్యాంకు హెడ్ ఆఫీసులకు పంపినవారికి మాత్రమే పాటించిన విధివిధానాల గురించి పూర్తిగా తెలుసు. ఈ జాబితా తయారీలో లోపం ఉందా? లేదా కొంతమందికే ప్రభుత్వం రుణమాఫీ చేయాలనుకున్నదా? అనేది వారే చెప్పాలి.
రైతుల ఆందోళనలు, నిరసనలు పత్రికల్లోకి ఎక్కాక అన్నదాతలను శాంతపరిచేందుకు మంత్రి తుమ్మల ప్రయత్నించారు. ఈ గందరగోళమంతా ఆధార్, బ్యాంక్ అకౌంట్, ఆర్బీఐ తప్పిదాల ఫలితమేనని సర్దిచెప్పారు. మాఫీ కాని రైతులకు 24 గంటల్లో అధికారులు వివరణ ఇస్తారని పేర్కొన్నారు. కొన్ని సాంకేతిక కారణాల వల్ల 18 వేల ఖాతాల్లో రూ.85 కోట్లు జమ కాలేదని చెప్పుకొచ్చారు. ఒక కుటుంబంలో నలుగురు లబ్ధిదారులుంటే నలుగురికీ మాఫీ వర్తిస్తుందని, సెప్టెంబర్ ఆఖరులోగా రైతులందరి ఖాతాల్లో మాఫీ సొమ్ము జమ అవుతుందని వివరణ ఇచ్చారు. అయితే ప్రతి రైతుకు రుణమాఫీ వచ్చి తీరుతుందనే కచ్చితమైన మాట మాత్రం ఎవరి నోటా రావడం లేదు.
నిజానికి మంత్రికి బదులు వ్యవసాయ శాఖ ముఖ్య కార్యదర్శి, ఈ మాఫీ నిర్వహణలో పాల్గొన్న ప్రధానాధికారులు ప్రజల ముందుకు, మీడియా ముందుకు వచ్చి మాట్లాడాలి. మాఫీ కాని రైతులతోనూ చర్చించాలి. ఎందుకు మాఫీ కాలేదో, అసలు అవుతుందో లేదో, కాకపోతే ఎందుకు కాదో ప్రతి రైతుకు స్పష్టం చేయాలి. ఈ ములాఖత్ వల్ల మాఫీ అందని మిగతా రైతులకు కూడా తమ పరిస్థితి అర్థమవుతుంది. అయితే ఎంపిక ప్రక్రియను విడమర్చి చెప్పేందుకు ఎవరూ ముందుకు రావడం లేదు.
2014లో బీఆర్ఎస్ ప్రభుత్వం ఇచ్చిన మాటను నిలబెట్టుకున్నది. నూటికి నూరు శాతం మాఫీ చేసింది. 35 లక్షల రైతుల ఖాతాల్లో రూ.16,144 కోట్లను కేసీఆర్ సర్కార్ జమ చేసింది. అదేవిధంగా 2018లో 36.68 లక్షల రైతులకు రూ.లక్షలోపు రుణమాఫీ కోసం రూ.19,198 కోట్లు బ్యాంకులకు చెల్లించింది. కాంగ్రెస్ ప్రభుత్వం రూ.లక్షలోపు రైతు రుణమాఫీ కోసం 11.5 లక్షల రైతులకు గానూ రూ.6,098 కోట్లు మాత్రమే జమచేసింది. ఈ సంఖ్య ఎందుకు తగ్గిందో, ఇంతటి వ్యత్యాసానికి కారణాలేమిటో స్పష్టమైతే ప్రభుత్వం బండారమంతా బయటపడుతుంది.
– బి.నర్సన్
94401 28169