సింగంబాకటితో గుహాంతరమునన్ చేడ్పాటుమై నుండి మా
తంగ స్ఫూర్జిత యూధ దర్శన సముద్యత్ క్రోధమై వచ్చునో
జంగాంతర నివాస ఖిన్నమతి అస్మత్సేనపై వీడె వ
చ్చెం గుంతీ సుత మధ్యముండు సమరస్థేమాభిరామాకృతిన్
KCR | ఈ పద్యం తిక్కన రచించిన మహాభారతం (విరాట పర్వం) లోనిది. ఆకలిగొన్న సింహం మనసు వికలమై గుహలో ఉంటూ, ఏనుగుల గుంపును చూసి వాటి మీదికి ఒక్కసారిగా లంఘించినట్లు అజ్ఞాతంలో ఉన్న అర్జునుడు కౌరవసేనపై సమరోత్సాహంతో వస్తున్నాడని ఉత్తర గోగ్రహణ ఘట్టంలో ద్రోణాచార్యుడు దుర్యోధనునితో అంటాడు. బడ్జెట్ సమావేశాల సందర్భంగా శాసనసభకు బయలుదేరిన కేసీఆర్ను దృశ్యమాధ్యమాల్లో చూసినప్పుడు నాకా పద్యం గుర్తుకొచ్చింది. 2001లో జలదృశ్యానికి, 2006లో కరీంనగర్ ఉప ఎన్నికలకు, 2009లో ఆమరణ నిరాహార దీక్షకు బయలుదేరిన కేసీఆర్ జ్ఞాపకాలన్నీ ఒక్కటొక్కటే కండ్లముందు కదలాడాయి.
నాలుగు దశాబ్దాలుగా నిరంతరంగా చట్టసభల్లో కొనసాగుతున్న రాజకీయ దురంధరుడు రాష్ట్ర సాధకుడు, రాష్ట్ర మంత్రిగా, కేంద్రమంత్రిగా, ముఖ్యమంత్రిగా అపార అనుభవం గడించిన కేసీఆర్పై.. కాలం కలిసిరాక ఒక ఎదురుదెబ్బ తగిలినంత మాత్రాన ప్రత్యర్థులు ఎన్ని అవహేళనలు, ఎన్నెన్ని దూషణలు, ఎన్నెన్ని అభాండాలు వేశారో మనం చూశాం. దురదృష్టవశాత్తు ప్రమాదానికి గురైతే కాంగ్రెస్ నేతలు కనీసం ఆయన వయసుకైనా గౌరవం ఇవ్వకుండా వికృత వ్యాఖ్యానాలు, వికటాట్టహాసాలు చేసి కౌరవ సభను తలపించిన వైనాన్ని తెలంగాణ ప్రజలు ఇంకా మరిచిపోలేదు.
చట్టసభల్లో పాల్గొనడం, ప్రత్యర్థులను ఢీకొట్టడం, ప్రసంగించడం, ప్రతిస్పందించడం కేసీఆర్కు ఏదో కొత్త అయినట్టు, ఆయనేదో భయపడుతున్నట్టు బీరాలు పలికిన అంగుష్ట మాత్రులకు, అగస్త్య భ్రాతలకు నోళ్లు మూతపడే ముహూర్తం కేసీఆర్ నందినగర్లోని ఇంటి గడప దాటిన క్షణంలోనే ఖరారైంది. ఆయనను పాతికేండ్లుగా చూస్తున్న అభిమానులకు తెలుసు. కేసీఆర్ మౌనం ఒక తుఫాను ముందు ప్రశాంతత. కేసీఆర్ అజ్ఞాతం ఒక కురుక్షేత్ర యుద్ధానికి సంకేతం. అది తెలియని అర్భకులు ఇంతకాలం చెలరేగిపోయారు. ఇక ఆట మొదలైంది. పిల్లకాకులకేం తెలుసు ఉండేలు దెబ్బ.
కేంద్రంలో వరుసగా మూడుసార్లు బొక్కబోర్లా పడి, మూణ్నాలుగు రాష్ర్టాలకు పరిమితమై కునారిల్లుతున్న కాంగ్రెస్ ఇవాళ బీఆర్ఎస్ను చచ్చిన పాము అని, భూస్థాపితమైందని, ముగిసిన అధ్యాయమని అనడం విడ్డూరం. డజన్ మంది కాంగ్రెస్ ముఖ్యమంత్రులను అందించిన ఆంధ్రప్రదేశ్లో అటు అసెంబ్లీలో, ఇటు లోక్సభలో వరుసగా మూడుసార్లు గుండు సున్నా తెచ్చుకున్న కాంగ్రెస్ నేతలు బీఆర్ఎస్ను వెక్కిరించడం గురువిందను గుర్తుచేస్తున్నది. గతంలో ఓ పెద్దమనిషి తెలంగాణ ఉద్యమం మఖలో పుట్టి పుబ్బలో మాడిపోతుందన్నారు. తానే పక్క రాష్ర్టానికి పలాయనం చిత్తగించారు. ఆయన అనుంగు శిష్యుడికి అదే గతి. కేసీఆర్ రాజకీయ అనుభవమంత వయసు లేని ఈ పిపీలికం గాళ్లు తొడలు చరుస్తుంటే నవ్వొస్తోంది.
కొందరు ఎమ్మెల్యేలు, ఎమ్మెల్సీలు బీఆర్ఎస్ నుంచి జారుకోగానే జబ్బలు చరచుకుంటున్న కాంగ్రెస్.. కోడి గొంతు నొక్కి కొత్త పొద్దు ఆగిపోతుందని భ్రమిస్తున్నది. పాతికేండ్ల క్రితం కేసీఆర్ ఒక్కడే ప్రారంభించిన ఉద్యమం ఎన్ని ఆటుపోట్లను ఎదుర్కొన్నా తుదకు విజయం సాధించింది. కేసీఆర్ నినదించిన జై తెలంగాణ బిందువుగా ప్రారంభమై, ప్రవహించి, విస్తరించి, వ్యాపించి ఒక సింధువుగా మారింది. కేసీఆర్ అడుగు నదికి నడకలు నేర్పుతుంది. అడ్డంకులెన్ని ఎదురైనా ముందుకు సాగిపోవడం గమ్యాన్ని చేరుకోవడం దాని సహజ లక్షణం. ఏదేమైనా 2024 జూలై 25 రాష్ట్ర రాజకీయాల్లో ఒక కొత్త మలుపు. కేసీఆర్ చిరకాలం వర్ధిల్లు గాక. శుభమస్తు. విజయోస్తు.
– డా.అయాచితం శ్రీధర్ 98498 93238