‘దశాబ్దాలుగా పాలస్తీనా భూభాగాలను ఇజ్రాయెల్ ఆక్రమించుకుని ఉండటం చట్ట విరు ద్ధం.. వీలైనంత త్వరలో దీన్ని చక్కదిద్దాల్సి ఉంది’ అంటూ అంతర్జాతీయ న్యాయస్థానం జూలై 19న వెలువరించిన తీర్పు చరిత్రాత్మకమైనది. 15 మంది సభ్యుల ధర్మాసనం జారీ చేసి న ఈ ఉత్తర్వుల్లో ఇజ్రాయెల్ను అభిశంసిస్తూ వర్ణవివక్షాపూరిత దమననీతి వంటి తీవ్రమైన పలు నేరనిర్ధారణలున్నాయి. అయితే ఇది ఐరాస అభ్యర్థన మేరకు వెలువరించిన సలహా సంప్రదింపుల్లో భాగమే తప్ప అమలుకు ఉద్దేశించింది కాదని గుర్తుంచుకోవాలి.
ఓ వైపు ప్రపం చ దేశాల్లో ఏకాకి అవుతున్న ఇజ్రాయెల్ మరోవైపు ఆక్రమిత ప్రాంతా ల్లో అమానుష విధానాలను యథేచ్ఛగా అమలుచేస్తున్నది. గాజాలో నరమేధం సాగిస్తున్నది. ఇప్పటివరకు అక్కడ ఇజ్రాయెల్ జరుపుతున్న దాడుల్లో మరణాల సంఖ్య 37 వేలు దాటింది. మృతుల్లో అత్యధికులు స్త్రీలు, పిల్లలే కావడం మానవత్వానికే సిగ్గుచేటు. హమాస్ దాడికి ప్రతీకారంగా గాజాను ఇజ్రాయెల్ బూడిద చేస్తున్న ది. ఇది ఆక్రమణ కన్నా ఘోరమైన విషయం.
ఈ ఊచకోతపై దక్షిణాఫ్రికా అంతర్జాతీయ న్యాయస్థానంలో వేసిన మరో కేసు ప్రస్తుతం విచారణలో ఉన్నది. గాజాలో ఇజ్రాయెల్ జరుపుతున్న ఊచకోత యుద్ధనేరం కిందకు వస్తుందని, దీనిపై విచారించి శిక్ష విధించాలని కోరుతూ దక్షిణాఫ్రికా దాఖలు చేసిన కేసు నిజానికి అమలు చేయాల్సిన తీర్పు జారీకి ఉద్దేశించింది. ఈ కేసులో అంతర్జాతీయ న్యాయస్థానం ఈ సరికే కొన్ని కీలక ఉత్తర్వులు జారీచేసింది.
దక్షిణ గాజాలోని రఫాలో నిరాశ్రయులు తలదాచుకున్నందున ఆ నగరంపై సైనిక దాడులు ఆపాలని ఇజ్రాయెల్ను ఆదేశించింది. కానీ, ఇజ్రాయెల్ ఏ మాత్రం ఖాతరు చేయకుండా దాడులు కొనసాగించి అంతర్జాతీయ చట్టాలు, న్యాయాలూ తనకు పట్టవని మరోసారి చాటిచెప్పింది. అయితే పశ్చిమదేశాల తిరుగులేని మద్దతు కారణంగా ఇజ్రాయెల్ నిజానికి ఇలాంటివి పెద్దగా పట్టించుకోదనేది తెలిసిందే.
కాకపోతే ప్రజాభిప్రాయాన్ని పాలస్తీనాకు అనుకూలంగా సమీకరించేందుకు ఇవి తోడ్పడతాయి. గాజాలో ఇజ్రాయెల్ కొనసాగిస్తున్న యుద్ధాన్ని అగ్రరాజ్యం అమెరికా పరోక్షంగా సమర్థిస్తున్న సంగతి తెలిసిందే. అయితే అదే అమెరికాలో యూనివర్సిటీ క్యాంపస్లు ఇజ్రాయెల్ వ్యతిరేక ప్రదర్శనలతో దద్దరిల్లడం గమనించవచ్చు.
తమకు నిలువ నీడలేదనీ, తమకంటూ ఓ దేశం కావాలని ఇజ్రాయెలీలు పంతం నెగ్గించుకున్నారు. పాలస్తీనాలో ఓ భూభాగాన్ని సొంతం చేసుకున్నారు. అందుకు ఐరాసను వేదికగా వాడుకున్నది. కానీ, ఇప్పుడు అదే ఇజ్రాయెల్ పాలస్తీనీయులకు నిలువ నీడ లేకుండా తరిమికొడుతున్నది. ఇప్పుడు ఐరాసనే బేఖాతరు చేస్తుండటం విచిత్రం.
అంతర్జాతీయ న్యాయస్థానాన్నే తోసిరాజంటుండటం గర్హనీయం. మానవతావాదానికి తామే పరిరక్షకులమని చెప్పుకొ నే పశ్చిమ దేశాలు పాలస్తీనా ప్రజలను ఆదుకునేందుకు ముందుకురావాల్సిన అవసరం ఉన్న ది. అదే సమయంలో అంతర్జాతీయ సంస్థలను పటిష్ఠపరిచేందుకు పాలస్తీనా సమస్య చక్కటి అవకాశాన్ని కల్పిస్తున్నది. సంకుచిత ప్రయోజనాలను పక్కనపెట్టి దేశాలన్నీ ఒక్కతాటి మీదకు వస్తే కానీ ఇది సాధ్యపడదు.