ఉద్యమాల పురిటిగడ్డ అయిన ఓయూలో మరోసారి అగ్గి రాజుకున్నది. ఆర్ట్స్ కాలేజీ వేదికగా నిరుద్యోగులు కాంగ్రెస్ ప్రభుత్వంపై జంగ్ సైరన్ మోగించారు. రేవంత్ సర్కార్ అనుసరిస్తున్న విధానాలపై ఆగ్రహం వ్యక్తం చేస్తూ విద్యార్థులు కదం తొక్కారు. దీంతో తెలంగాణ నిప్పుల కుంపటిలా రగులుతున్నది.
నిరుద్యోగులను కాంగ్రెస్ నమ్మించి మోసం చేసింది. నిరుద్యోగుల పోరాట ఫలితంగా అధికారంలోకి వచ్చిన రేవంత్రెడ్డి.. ఇప్పుడు వారిని రోడ్డున పడేశారు. యువతను నమ్మించి తడిగుడ్డతో గొంతుకోశారు. కాంగ్రెస్ను గెలిపిస్తే వంద రోజుల్లోనే ఆరు గ్యారంటీలు అమలు చేస్తామని, తొలి క్యాబినెట్లోనే మెగా డీఎస్సీతో పాటు ఏడాదిలో రెండు లక్షల ఉద్యోగాలు భర్తీ చేస్తామని హామీ ఇచ్చి.. గద్దెనెక్కిన తర్వాత నిరుద్యోగుల నోట్లో మట్టికొట్టారు. గ్రూప్ 1కు 1:100 నిష్పత్తిలో అభ్యర్థుల ఎంపిక, గ్రూప్- 2, గ్రూప్- 3 పోస్టుల పెంపు లాంటి కనీస నిర్ణయాలు తీసుకోవడంలోనూ రేవంత్ విఫలమయ్యారు.
నిరుద్యోగులను రెచ్చగొట్టి రాజకీయ పబ్బం గడుపుకొన్న కోదండరాం, రియాజ్, ఆకునూరి మురళి, ఎమ్మెల్సీలు బల్మూరి వెంకట్, తీన్మార్ మల్లన్న వంటి నాయకులు ఇప్పుడు నిరుద్యోగుల పోరాటానికి కనీసం సంఘీభావం ప్రకటించడం లేదు. ప్రెస్క్లబ్లో నిరుద్యోగుల సమస్యలపై నిర్వహించిన రౌండ్ టేబుల్ సమావేశానికి కూడా వారు డుమ్మా కొట్టారు. అంతేకాకుండా, ఉద్యమాలు చేస్తున్నవారిని పెయిడ్ ఆర్టిస్టులంటూ ట్రోల్ చేస్తూ, మహిళలనే గౌరవం కూడా లేకుండా శంకిని అంటూ అవమానిస్తుండటం శోచనీయం.
తమ గోడు వినాలంటూ లక్షలాది మంది రోడ్డెక్కి నిరసనలు చేస్తున్నా.. రేవంత్ రెడ్డి సర్కార్కు చీమ కుట్టినట్టు కూడా లేదు. వారి డిమాండ్లను పరిష్కరించాల్సిందిపోయి.. ఏకపక్షంగా పరీక్షల తేదీలను ప్రకటిస్తూ కాంగ్రెస్ ప్రభుత్వం పుండుమీద కారం చల్లుతున్నది. మరోవైపు పదేండ్ల తర్వాత ఉద్యమం నాటి రోదనలతో తెలంగాణ తెల్లారింది. అర్ధరాత్రి వరకు నిరుద్యోగులను అక్రమంగా నిర్భందించడంపై తెలంగాణ సమాజం భగ్గుమంటున్నది. కొట్లాడి తెచ్చుకున్న తెలంగాణలో అక్రమ నిర్బంధాలు ఏమిటని తెలంగాణ ప్రజలు ఆగ్రహం వ్యక్తం చేస్తున్నారు.
నిరుద్యోగులు ఐక్యంగా ఉంటే ప్రమాదమని గ్రహించిన కాంగ్రెస్ ప్రభుత్వం వారిలో చీలిక తీసుకొచ్చేందుకు విఫలయత్నం చేస్తున్నది. కోదండరామ్ రెడ్డి, బల్మూరి వెంకట్, తీన్మార్ మల్లన్న, ఆకునూరి తదితరులను అడ్డుపెట్టుకొని.. ఈ పోరాటంలో ముందున్న వారిని ప్రలోభాలకు గురిచేసేందుకు ప్రయత్నిస్తున్నది. కానీ, నిరుద్యోగులు అధికార పార్టీ ప్రలోభాలకు లొంగలేదు. ‘మీలాగా పదవుల కోసం పాకులాడటం లేద’ని వారికి తెగేసి చెప్పారు. అంతేకాదు, ఈ పోరాటంలో తమతో కలిసి రాకపోతే రేవంత్ రెడ్డి గతంలో చెప్పినట్టు రాళ్లతో కొడుతామని హెచ్చరించారు. తద్వారా తమ పోరాటం ఆగదని చెప్పకనే చెప్పారు.
నిజానికి ప్రజా ఉద్యమాలను చీల్చడం, ఉద్యమకారుల్లో విభేదాలు సృష్టించడం కాంగ్రెస్ పార్టీకి కొత్తేమీ కాదు. 1947 నుంచే హస్తం పార్టీ ఇలాంటి కుట్రలు చేస్తున్నది. 1956లో ఏపీలో తెలంగాణను కలపడం దగ్గర నుంచి 1960, 1970లో జరిగిన తెలంగాణ ఉద్యమాన్ని చీల్చడం వరకు కాంగ్రెస్ పార్టీ విజయవంతమైంది. తెలంగాణ కాంగ్రెస్ నేతలకు పదవుల ఎర వేసి తొలి దశ ఉద్యమాన్ని నీరుగార్చింది. ఆ తర్వాత మలి దశ ఉద్యమంలోనూ అప్పటి టీఆర్ఎస్ పార్టీ నేతలపై అక్రమ కేసులు పెట్టి, నిర్బంధం చేసి, ఎమ్మెల్యేలను కొనుగోలు చేసి, పదవుల ఆశ చూపి ఉద్యమ పార్టీని బలహీనపర్చేందుకు కుట్రలు పన్నింది. కానీ, తెలంగాణ ప్రజలు చేసిన పోరాటం ముందు కాంగ్రెస్ కుట్రలు సాగలేదు. ఇప్పుడు కూడా నిరుద్యోగుల పోరాటం ముందు కాంగ్రెస్ పార్టీ కుతంత్రాలు సాగలేదు. అందుకే కుట్రలు, కుతంత్రాలతో ఇక పని జరగదని గ్రహించిన రేవంత్ సర్కార్ మరో ప్రణాళిక వేసింది. నిరుద్యోగుల పోరాటం మరింత ఉధృతం కాకుండా ఉండాలంటే, పరీక్ష తేదీలను ప్రకటించాలని తద్వారా యువత సన్నద్ధతపై దృష్టి సారిస్తుందని ఇంటెలిజెన్స్ నివేదిక అందడంతో హడావుడిగా తేదీలను ప్రకటించింది.
అసలు రాష్ట్రంలో ఇంత పెద్ద ఉద్యమం జరుగుతున్నా మెయిన్స్ట్రీమ్ మీడియా కనీసం పట్టించుకోకపోవడం వెనుక కూడా కుట్ర ఉన్నది. ప్రజాపాలన తీసుకొచ్చామని ఓవైపు చెబుతూనే మరోవైపు సీఎం రేవంత్రెడ్డి మీడియాపై నియంత్రణ విధించారు. ప్రభుత్వ అనుకూల వార్తలు తప్ప మరే సమస్య గురించి ప్రసారం చేయవద్దని పరోక్షంగా హెచ్చరించారు. మెయిన్ స్ట్రీమ్ మీడియాను తన గుప్పిట్లో పెట్టుకున్నారు. అందుకే అవి నిరుద్యోగ సమస్యల గురించి ప్రస్తావించడం లేదు. గత నెల రోజులుగా నిరుద్యోగులు పేగులు తెగేలా నిరసనలు చేస్తున్నా, గొంతు ఎండిపోయేలా నినాదాలతో హోరెత్తిస్తున్నా పట్టించుకోవడం లేదు. నిరుద్యోగుల సమస్యే కాదు, ప్రభుత్వ వ్యతిరేక వార్తలేవీ ప్రసారం చేయడం లేదు. రైతుల ఆత్మహత్యల దగ్గర్నుంచి విత్తనాలు, ఎరువులు, రైతుబంధు వరకు ఏదీ ప్రసారం చేయడం లేదు, ప్రచురించడం లేదు. వాటికి బదులు పార్టీ ఫిరాయింపులు, విచారణలు అంటూ హడావుడి చేస్తూ ప్రభుత్వాన్ని జోకుతున్నాయి.
కుట్రలకు, కుతంత్రాలకు కేరాఫ్ అడ్రస్ అయిన గాంధీ భవన్ గతంలోనూ ఎన్నో కుట్రలకు వేదికైంది. అదే పరంపర ఇప్పుడూ కొనసాగుతున్నది. ప్రజా ఉద్యమాలను అణచివేయడం, ప్రజా సంఘా లు, విద్యా ర్థి, యువజన సంఘాల నాయకులపై అక్రమ కేసులు పెట్టడం గాంధీభవన్కు మొదటి నుం చి తెలిసిన విద్య. అయితే తెలంగాణకు పోరాటం కొత్త కాదు, అణచివేతలు కొత్తకాదు. ఇలాంటి కుట్రలు, కుతంత్రాలను ఈ గడ్డ ఎన్నో చూసింది. రేవంత్ రెడ్డి సర్కార్ అహంకారాన్ని నేలకు దించేందుకు తెలంగాణ ప్రజలు సిద్ధమైపోయారు. అందుకు నిరుద్యోగుల పోరే ఆరంభం.
– తోటకూర రమేశ్