Congress | ఇంతలో ఎంత మార్పు! పచ్చనాకు సాక్షిగా ఆకలి తీర్చే రైతన్నకు ఎంతటి దురవస్థ! ‘ఏడీ మా దూప తీర్చిన అపర భగీరథుడు’ అని ఎండిన పొలాలు ఆక్రోషిస్తున్నాయి. ఆరిపోతున్న గడ్డిపోచల పెదాలను తడిపేందుకు రైతులు యుద్ధమే చేస్తున్నారు. బోరు మీద బోరు వేసినా నీరు ముఖం చాటేస్తున్నది. ట్యాంకర్లు తెచ్చిపోసినా సొమ్మసిల్లిన పొలం తెప్పరిల్లడం లేదు. ఎన్నిచేసినా వల్ల కాక రైతన్నలు కాడిని పడేస్తున్నారు. ప్రాణాలు విడుస్తున్నారు.
ప్రజలను కడుపులో దాచుకుని కాపాడిన పెద్దదిక్కు కేసీఆర్.. కాని రోజులు వస్తే చూస్తూ ఊరుకుంటారా? తను నాటిన మొక్క పచ్చగా ఎదుగుతుంటే హర్షించిన కర్షకుడు ఇప్పుడది దాహంతో ఆర్తనాదం చేస్తుంటే తపన పడకుండా ఎలా ఉంటాడు? అందుకే స్వరాష్ర్టాన్ని సాకారం చేసిన నేత, ప్రగతి పరుగుల తెలంగాణ విధాత రైతుల కోసం కదిలారు. ఎండిన పొలాలను చూసి గుండెదిటవు కోల్పోయిన రైతన్నలకు సాటిరైతుగా కేసీఆర్ ధైర్యం చెప్పారు. రైతన్నా నేనున్నానంటూ భుజం తట్టారు. ఇది కాలం వేసిన కాటు కాదు.. కాంగ్రెస్ తెచ్చిన కరువు అంటూ గర్జించారు. పంటలను ఎండబెట్టిన కాంగ్రెస్ నేతల అసమర్థ పాలనపై నిప్పులు చెరిగారు. రైతుల సమస్యల పరిష్కారానికి యుద్ధభేరి మోగించారు.
కల్లబొల్లి కట్టుకథల కాంగ్రెస్ పాలన తెలంగాణకు పీడకలగా తయారైంది. నిన్నటిదాకా నీరుపారిన తెలంగాణ తీరు మారింది. అసలు కథే తారుమారైంది. కళకళలాడిన తెలంగాణ వెలవెలబోయింది. పదేండ్ల క్రితం నాటి నీటిగోస మళ్లీ చుట్టుముట్టింది. కాంగ్రెస్తో కరువు జట్టుకట్టింది. జలకళతో మత్తళ్లు దుంకిన సంబురం ఎండిపోయి నెర్రెలు వారుతున్నది. భూమి దూప, మనిషి దూప ఒక్కసారిగా మిక్కుటమైనయి కాంగ్రెస్ పాలనలో. సుమారు పదేండ్ల పాలనలో కరెంటు కాంతుల్లో మెరిసి మురిసిన తెలంగాణ చీకట్ల పాలైంది. ప్రజల గోస తీర్చే లాలన పోయి పదవులు చూసుకుని మురిసే పాలన వచ్చింది.
ఎట్లుండె తెలంగాణ.. ఎట్లయింది తెలంగాణ? అనుకునే రోజులు అనతికాలంలోనే వచ్చిపడ్డాయి. కేసీఆర్ కండ్లల్ల ఒత్తులేసుకుని కాపుగాసిన తెలంగాణ నాలుగు నెలల్లోనే ఆగమైంది. లెక్కలేని హామీలతో గారడి చేసి అధికారంలోకి వచ్చిన కాంగ్రెస్ పార్టీ వాటిని అమలు చేయకుండా కాలయాపన చేయడం ఒక ఎత్తయితే.. సాగునీరు అందక నానాటికి రైతుల పరిస్థితి తీసికట్టు కావడం మరొక ఎత్తు. గంగ చిందులేసిన నేలమీద మంచినీరే గగనమయ్యే రోజులు వచ్చిపడ్డాయి. అధికార యావతో, అసమర్థ పాలనతో ప్రస్తుత పాలకులు తెలంగాణను తెర్లు చేశారు. తెలివి తక్కువతనంతో, చేతకానితనంతో దేనిని ఎట్లా వాడుకోవాలో తెలియని అర్భకత్వంతో రాష్ర్టాన్ని తెర్లు చేశారన్న కేసీఆర్ మాటలు అక్షర సత్యాలు. సర్కారు ఇప్పటికైనా మేల్కొని నీటి సమస్య పరిష్కారం దిశగా అడుగులు వేయాలి.