కొన్ని సందర్భాలు, కొన్ని ప్రభుత్వాలు, కొంతమంది నాయకుల గురించి చెప్పడానికి ఏ ఉపమానాలూ సరిపోవు. అట్లాంటి సందర్భం మొన్నటి కేంద్ర బడ్జెట్ అయితే, అట్లాంటి ప్రభుత్వం ఎన్డీయే, ఆ నాయకుడు మోదీ. కేంద్రంలో బీజేపీ అధికారంలోకి వచ్చినప్పటి నుంచి తెలంగాణపై సవతి తల్లి ప్రేమ చూపిస్తూనే ఉన్నది. రూ.48 లక్షల కోట్ల తాజా కేంద్ర బడ్జెట్లో చిల్లిగవ్వ కూడా తెలంగాణకు ఇవ్వకపోవడమే అందుకు నిదర్శనం.
BJP | తెలంగాణ ప్రయోజనాలు బీజేపీకి అస్సలు పట్టవు. అలాంటి ఆలోచన రావడం కూడా చాలా పెద్ద తప్పు అనేలా పదేండ్లుగా ఆ పార్టీ నేతలు వ్యవహరిస్తున్నారు. వాళ్లకు తెలంగాణపై ఎందుకంత కోపమో ఇప్పటికీ అర్థం కావడం లేదు. తాజా సార్వత్రిక ఎన్నికల్లో బీజేపీ ఎంపీ సీట్లు రెట్టింపయ్యాయి. అయినా ఢిల్లీ పెద్దలకు తెలంగాణపై కనికరం లేదు. తెలంగాణ అనే ఒక రాష్ట్రం ఉందనే సంగతి వారు మరిచిపోయారు. అందుకే ఒక్క కాసు కూడా విదిల్చడం లేదు.
మోదీ మూడోసారి ప్రధాని అయితే మంత్రి పదవులతో పాటు భారీగా నిధులు తెస్తామని ఎన్నికల సమయంలో బీజేపీ నాయకులు ప్రగల్భాలు పలికారు. వారన్నట్టు రెండు కేంద్ర మంత్రి పదవులు వచ్చాయే గానీ, నిధులు మాత్రం అస్సలు రాలేదు. తెలంగాణ ప్రజల ఆశలు, ఆశయాలు, సమస్యలు, పోరాటాలు, ఆత్మగౌరవ నినాదాల గురించి బీజేపీ నేతలకు బొత్తిగా తెలియదని పదే పదే రుజువవుతూనే ఉన్నది. ‘తల్లిని చంపి, పిల్లను బతికించా’రని మోదీ గతంలో అన్నప్పుడు తెలంగాణ ప్రజలకు దాని వెనకున్న ఆంతర్యం అర్థం కాలేదు. అందుకే మూడోసారైనా మోదీ మారకపోతారా? మనకు నిధులు ఇవ్వకపోతారా? అని భావించి బీజేపీకి సీట్లు, ఓట్లు కట్టబెట్టారు. అయితే ఎన్ని ఓట్లిచ్చినా, సీట్లిచ్చినా ఆయన తీరులో మార్పు ఉండదని సవతి ప్రేమతో తేటతెల్లమైంది.
తెలంగాణలో కాంగ్రెస్ ప్రభుత్వం ఏర్పడగానే ముఖ్యమంత్రి రేవంత్ రెడ్డి, డిప్యూటీ సీఎం భట్టి విక్రమార్క ఢిల్లీ పర్యటనలకు శ్రీకారం చుట్టారు. తాము భేషజాలకు పోబోమనే సంకేతాలు ఇచ్చారు. చాలామంది కేంద్ర మంత్రులను వారు కలిశారు. వినతిపత్రాలు ఇచ్చారు. అంతేకాదు, ఏకంగా మోదీని బడే భాయ్ (పెద్దన్న) అని రేవంత్ సంబోధించారు. అయినా ప్రయోజనం లేకుండాపోయింది. దీంతో కేసీఆర్ వైఖరి వల్లనే కేంద్రం నిధులు ఇవ్వడం లేదని గతంలో పెద్ద ఎత్తున ప్రచారం చేసినవారికి వాస్తవాలు తెలిసివచ్చాయి.
అసలు విభజన హామీలు అనేవి ఉభయ తెలుగు రాష్ర్టాలకు సంబంధించినవి. కేంద్రంలో భాగస్వామిగా ఉన్నారు కాబట్టి, ఒకరికి న్యాయం చేసి, మరొకరికి తీరని అన్యాయం చేయడం ఎంతవరకు సబబు. అమరావతికి రూ.15 వేల కోట్లు, బీహార్కు దాదాపు రూ.59 వేల కోట్లు కేటాయించిన కేంద్రం.. పోలవరం ప్రాజెక్టును పూర్తిచేసే బాధ్యతను తీసుకున్నది. అయితే తెలంగాణలోని పాలమూరు- రంగారెడ్డి ప్రాజెక్టు గురించి కనీసం ప్రస్తావించకపోవడం శోచనీయం. అంతేకాదు, బడ్జెట్లో బయ్యారం ఉక్కు ఫ్యాక్టరీ ముచ్చటే లేదు. కాజీపేట రైల్వే కోచ్ ఫ్యాక్టరీకి బదులు ఏర్పాటు చేస్తున్నట్టు చెప్పిన ఓవర్ హాలింగ్ వర్క్షాప్కు కేటాయింపులు లేవు. ఐటీఐఆర్, ఐఐఎం ఊసే ఎత్తలేదు. దీంతో తెలంగాణపై బీజేపీ నాయకులది కపట ప్రేమేనని మరోసారి స్పష్టమైంది.
కేంద్రానికి ఎక్కువ పన్నులు చెల్లిస్తున్న రాష్ర్టాల్లో తెలంగాణ ఒకటి. పైగా తెలంగాణ మిగులు బడ్జెట్ ఉన్న రాష్ట్రం. అందుకే తెలంగాణ ఆత్మగౌరవాన్ని తాకట్టు పెట్టడం ఇష్టం లేకే కేసీఆర్ మూలధనాన్ని పెట్టుబడిగా పెట్టి, సంపద సృష్టి దిశగా అడుగులు వేశారు. ఆ సంపదను ప్రజలకు పథకాల రూపంలో పంచారు. కేంద్రం ఏమీ ఇవ్వకపోయినా ప్రపంచం అబ్బురపడే పథకాలను తీసుకొచ్చారు. సంక్షేమానికి సరికొత్త అర్థం చెప్పారు. ఢిల్లీ పెద్దల చుట్టూ ప్రదక్షిణలు చేసినా ప్రయోజనం ఉండదని తెలిసే కేసీఆర్ తన మార్గంలో తాను వెళ్లారు. ఈ నేపథ్యంలో కేంద్రంపై ఆధారపడటం మానుకొని.. కాంగ్రెస్ పాలకులు కూడా కేసీఆర్ పంథాను అనుసరిస్తూ వనరుల సమీకరణపై, ప్రత్యామ్నాయ ఆర్థిక వనరులపై దృష్టి పెట్టాలి.
– అస్కాని మారుతీ సాగర్ 90107 56666