తెలంగాణ తొలి ముఖ్యమంత్రి కల్వకుంట్ల చంద్రశేఖర రావు ఆనాడు రైతుబంధు కోసం ట్రెజరీలో జమ చేసిన రూ.7 వేల కోట్లను డిసెంబర్లో ఇవ్వకుండా, అసలు రైతుబంధునే ఎగ్గొట్టి ఇప్పుడు అదే డబ్బును రుణమాఫీ పేరుతో.. కేసీఆర్ కట్టిన 577 రైతు వేదికల్లో ఉన్న రైతులను ఉద్దేశిస్తూ, కేసీఆర్ కట్టిన సచివాలయం నుంచి రుణమాఫీ డబ్బా కొట్టుకుంటున్నది కాంగ్రెస్ ప్రభుత్వం. ఏక కాలంలో మొత్తం మాఫీ అని హామీ ఇచ్చి విడతల వారీగా, అదీ అరకొరగా ఇస్తూ తనకు అలవాటైన మోసానికి పాల్పడుతున్నది కాంగ్రెస్ పార్టీ.
KCR | ‘తిన్నా తినకపోయినా నెలకు ఏడు వేల కోట్ల రూపాయలు మిత్తి కడుతున్నడు భట్టి విక్రమార్క’ అని గొప్పలకు పోయిండు రేవంత్ రెడ్డి. కానీ, వాస్తవమేమంటే.. భట్టి గారి సంపాదన ఇబ్బడి ముబ్బడిగా పెరగడం! సచివాలయం, ప్రజాభవన్ వేదికగా భట్టి ద్వారా మాత్రమే కాంట్రాక్టర్ల బిల్లులు చెల్లిస్తున్నరు. ఎవరికెంత ఇస్తే బిల్లు పాస్ అవుతున్నదో కాంట్రాక్టర్లు బహిరంగంగా చెప్తున్నరు. పొంగులేటి సారు లీలలు వేరే రేంజ్! మిగిలిన మంత్రులదీ ఇదే దారి. నియోజకవర్గాల్లో ఎమ్మెల్యేల సాండ్, ల్యాండ్ మాఫియాకు హద్దుల్లేవు. కింది నుంచి పైదాకా.. ‘నీకింత, నాకంత’ వ్యవహారం నడుస్తున్నది. ఇక ఈ కలెక్షన్ల కోసం ముత్యాలముగ్గు సినిమాలో రావుగోపాలరావు లాగా ప్రత్యేకంగా ఐదారు డిపార్ట్మెంట్లే ఏర్పాటైనట్టు చెప్తున్నరు.
ఈ వ్యవహారం ఇట్లా ఉంటే.. హాస్టళ్ల మెస్లలో ఎలుకలు, పిల్లులు, బల్లులు రాజ్యమేలుతున్నయి. కుక్కల స్వైరవిహారానికి చిన్నారులు చితికిపోతున్నరు. హైదరాబాద్, ఢిల్లీలో ఉద్యోగార్థులు కదం తొక్కుతున్నరు. పోలీస్ స్టేషన్లు కాంగ్రెస్ నాయకుల పంచాయితీకి అడ్డాలుగా మారినయి. హక్కుల గురించి అడిగితే చెప్పుతో కొడతామంటున్నరు. శాంతిభద్రతలు విఫలమై నడిరోడ్లపై నరుక్కు చస్తున్నరు. కరెంట్ లేక రిజిస్ట్రేషన్లు నిలిచిపోతున్నయి. ఆస్పత్రుల్లో సౌకర్యాల లేమి తారస్థాయికి చేరింది.
ఇవేవీ మీడియాకు, మేధావులకు పట్టడం లేదు. తాము జాకీలు లేపి ఎత్తి పట్టిన మరుగుజ్జులను ఇంకా ఇంకా మోస్తున్నరు. నిజాలు దాస్తున్నరు. బీఆర్ఎస్ ఆరోపణలను పక్కన పెట్టండి, జనాల ఆక్రందనలు కూడా వీళ్ల మీడియాలో చోటుకు నోచుకోలేకపోతున్నయి.
అయితే అబద్ధాల పునాదుల మీద కట్టిన మేడ నిలవదు. నాలుగున్నరేండ్లు కాదు, స్థానిక సంస్థల ఎన్నికల్లోనే మీ అంతు చూస్తామని కాంగ్రెస్కు లిఖిత పూర్వక హెచ్చరికలు అందుతున్నయి వివిధ వర్గాల ప్రజా బాహుళ్యం నుంచి.
ఇపుడు ఈ రాష్ర్టాన్ని బాగుచేసే బాధ్యత నికార్సైన తెలంగాణ బిడ్డలపై ఉన్నది. గెలిచినా, ఓడినా.. ఎవరున్నా, ఎవరు పోయినా గులాబీ జెండా రెపరెపలాడుతది. తెలంగాణ మళ్లీ తల ఎత్తుకుని నిలుస్తది!
జై తెలంగాణ!
– శ్రీశైల్ రెడ్డి పంజుగుల 90309 97371