75 ఏండ్ల స్వతంత్ర భారతాన్ని పాలిస్తున్న జాతీయపార్టీలు దక్షిణాది రాష్ర్టాలపై ఆది నుంచి వివక్షే చూపిస్తున్నాయి. నిధుల కేటాయింపు కావచ్చు, రాజకీయ ప్రాతినిధ్యం కావచ్చు ఇలా ఏ అంశాన్ని చూసినా దక్షిణాది రాష్ర్టాలపై వివక్ష కొట్టొచ్చినట్టు కనిపిస్తున్నది. నేడు దేశంలో అధికారంలో ఉన్న బీజేపీ, నాడు దేశాన్ని పాలించిన కాంగ్రెస్ పార్టీ కంటే మరో అడుగు ముందుకువేసి దక్షిణాది రాష్ర్టాలపై తన ఆధిపత్యాన్ని చెలాయిస్తూ రాజ్యాంగ విలువలను కాలరాస్తున్నది. తత్ఫలితంగా రాజ్యాంగబద్ధంగా రాష్ర్టాలకు రావాలసిన నిధులు సైతం సక్రమంగా రావడం లేదు. అందువల్ల పలు రాష్ర్టాల్లో ఆశించిన స్థాయిలో అభివృద్ధి నమూనా కనిపించడం లేదు. అంటే, దక్షిణాది రాష్ర్టాలు కేంద్ర నిధుల్లేకుండా అభివృద్ధిలో కుంటుపడుతున్నాయి.
డబుల్ ఇంజిన్ సర్కారుతోనే అభివృద్ధి సాధ్యమౌతుందని బీజేపీ ప్రజలను నమ్మబలుకుతున్నది. కానీ, తెలంగాణ విషయంలో మాత్రం కేంద్ర సర్కారు నిధులు అందకున్నా ముఖ్యమంత్రి కేసీఆర్ ఆలోచనా విధానాలతో స్వరాష్ట్ర ఆదాయ నిధులతోనే తెలంగాణ రాష్ట్రం అభివృద్ధిలో అగ్రభాగాన నిలుస్తూ దేశానికే ఆదర్శంగా నిలుస్తున్నది.
తెలంగాణపై కేంద్రం ఎన్ని కుట్రలు చేసినా అభివృద్ధి ఆగదనే విషయాన్ని ఢిల్లీ పెద్దలు గ్రహించాల్సిన అవసరం ఉన్నది. దక్షిణాది రాష్ర్టాలైన తెలంగాణ, ఆంధ్రప్రదేశ్, కర్ణాటక, తమిళనాడు, కేరళ రాష్ర్టాల జనాభా సుమారుగా 28 కోట్లు ఉంటుందని అంచనా. మరోవైపు దక్షిణాది రాష్ర్టాలు ఆదాయంలో దేశంలోనే అగ్రభాగాన నిలుస్తుండటం గొప్ప విషయంగా భావించాలి. దేశ జీడీపీలో ఎక్కువగా చెల్లించేది ఈ రాష్ర్టాలే కావడం గమనార్హం. ఒకరకంగా చెప్పాలంటే దక్షిణాది రాష్ర్టాలు అందించే రెవెన్యూతోనే దేశం అభివృద్ధిలో ముందుకు సాగుతున్నదని చెప్పక తప్పదు.
భారతదేశ పార్లమెంట్లో 543 స్థానాలుంటే ఒక్క యూపీ నుంచి 80 స్థానాలున్నాయి. ఇప్పటివరకు భారతదేశానికి ప్రాతినిధ్యం వహించిన ప్రధాన మంత్రులు 15 మంది ఉంటే అందులో 9 మంది యూపీకి చెందిన నాయకులే. దక్షిణాది రాష్ర్టాల నుంచి భారతదేశానికి ప్రధానమంత్రిగా ప్రాతినిధ్యం వహించిన నాయకులు ఇద్దరే ఉన్నారు. అందులో ఒకరు పీవీ నరసింహారావు ఐదేండ్లు పూర్తిగా పదవీ బాధ్యతలు నిర్వహిస్తే, కర్ణాటకకు చెందిన దేవేగౌడ ఏడాది కూడా ప్రధానిగా కొనసాగలేకపోయారు. దేశ జనాభాలో 20 శాతం జనాభా దక్షిణాది రాష్ర్టాల నుంచి ఉంటే ఇక్కడి ప్రజలు పన్నుల రూపంలో కేంద్రానికి కట్టేది మాత్రం 30 శాతానికి పైగానే ఉంటుందని ఆర్థికవేత్తల అభిప్రాయం.
ఒకసారి దక్షిణాది రాష్ర్టాల్లోని ప్రజలు పన్నుల రూపంలో కట్టిన డబ్బులు తిరిగి ఆ రాష్ర్టాలకు ఎంత మొత్తంలో వస్తున్నాయో చూస్తే సగటున ఏపీకి రూ.100కు గాను రూ.67 తిరిగిస్తే, అదే కర్ణాటక పన్నుల రూపంలో రూ.100 కడితే వారికి కేంద్రం నుంచి తిరిగి రూ.47 మాత్రమే వస్తున్నాయి. అదే తమిళనాడు రూ.100కు గాను రూ.40 మాత్రమే కేంద్రం తిరిగి ఇస్తున్నది. మరీ దారుణంగా తెలంగాణకు రూ.100 పన్నుల రూపంలో చెల్లిస్తే తిరిగి కేంద్రం నుంచి సహాయంగా రూ.30 మాత్రమే అందుతున్నాయి. అదేవిధంగా కేరళ చూసుకుంటే రూ.25 మాత్రమే సహాయం రూపంలో అందుతున్నాయి. కానీ ఉత్తరాది రాష్ర్టాలను తీసుకుంటే యూపీ రాష్ట్ర ప్రజలు పన్నుల రూపంలో రూ.100 చెల్లిస్తే వారికి కేంద్రం నుంచి సహాయంగా రూ.180 అందుతున్నాయి. అదే బీహార్ రూ.100 పన్నుల రూపంలో కడితే వారికి రూ.90 సహాయంగా కేంద్రం నుంచి అందుతున్నాయి. మధ్యప్రదేశ్కు రూ.75, మిగతా రాష్ర్టాలకు వారు కట్టిన దానికంటే ఎక్కువ మొత్తంలోనే కేంద్రం నుంచి సహాయంగా అందుతున్నాయి.
తెలంగాణ ఏర్పడిన నాటినుంచి ఇప్పటివరకు కేంద్రానికి పన్నుల రూపంలో కట్టిన డబ్బులు రూ.2.72 లక్షల కోట్లు అయితే, అదే కేంద్రం నుంచి నిధుల రూపంలో తెలంగాణకు వచ్చింది కేవలం 1.40 లక్షల కోట్లు మాత్రమే. అంటే ఆర్థిక వివక్ష ఏ మేరకు ఉన్నదో అర్థం చేసుకోవచ్చు. కేంద్రానికి దక్షిణాది రాష్ర్టాలపై వివక్ష ఎంత మేరకు ఉందో చెప్పడానికి ఈ ఉదాహరణ చాలు. 2022- 23 బడ్జెట్లో సదరన్ రైల్వే కొత్త లైన్ల అభివృద్ధి కోసం విడుదల చేసిన నిధులు మొత్తం 59 కోట్లు, అదే ఉత్తరాది రైల్వే అభివృద్ధి కోసం విడుదల చేసిన నిధులు రూ.13,200 కోట్లు… ఈ వివక్ష చూస్తుంటే ‘సొమ్మొకడిది సోకొకడిది’ అన్న సామెత గుర్తుకు వస్తున్నది. జనాభా నియంత్రణ అమలు దక్షిణాది రాష్ర్టాల్లో సక్రమంగా చేయడంతో ఇక్కడ జనాభా తగ్గి ఉత్తరాదిన జనాభా పెరిగింది. ఆ కోణంలో పార్లమెంట్లో ప్రాతినిధ్యం తగ్గించాలని చూస్తే దక్షిణాది ప్రజలు చూస్తూ ఊరుకోరు. దేశంలో అత్యున్నతమైన పనితీరు కనబరుస్తున్న రాష్ర్టాల మీద చిన్నచూపు అనేది వారి దాష్టీక నిర్ణయానికి సూచిక.
ఉత్తరాదిపై అమిత ప్రేమను చూపిస్తూ, దక్షిణాది రాష్ర్టాలపై వివక్షను చూపించే కేంద్రంలోని బీజేపీ సర్కార్ మరో ఏకపక్ష నిర్ణయాన్ని తీసుకొచ్చింది. వైద్యరంగంలో విప్లవాత్మక మార్పులకు శ్రీకారం చుడుతూ, కొత్త మెడికల్ కాలేజీల ఏర్పాటులో సంచలనాలు సృష్టిస్తున్న తెలంగాణ సహా దక్షిణాది రాష్ర్టాల దూకుడుకు కళ్లెం వేస్తున్నది.
యూపీ, బీహార్ వంటి రాష్ర్టాల్లో వైద్య సదుపాయాలు మెరుగయ్యేవరకూ దక్షిణాదికి కొత్త మెడికల్ కాలేజీలను, అదనపు సీట్ల ను మంజూరు చేయబోమని ఒకరకంగా తెగేసి చెప్పింది. నేను బాగుపడను, నాతో పాటున్న వాళ్లను కూడా బాగు పడనివ్వను అన్నట్టుగా ఉన్నది కేంద్రంలోని బీజేపీ తీరు. దక్షిణాది రాష్ర్టాల సొమ్మునంతా ఉత్తరాదిన ఖర్చుపెడుతున్న మోదీ సర్కార్, ఇప్పు డు ఏకంగా ఇక్కడి ప్రగతిని అడ్డుకునే ప్రయత్నం చేస్తున్నది.
దక్షిణాది రాష్ర్టాలపై వివక్ష చూపడం లేదని చెప్పుకోవడానికి ఎన్నడూ లేనివిధంగా బీజేపీ పెద్దలు తెలంగాణలో విరామం లేకుండా పర్యటిస్తున్నారు. ప్రధాని మోదీ ఈ ఏడాదిలోనే మూడుసార్లు తెలంగాణాలో పర్యటించారు. ఈ పర్యటనలు తమ పార్టీ కార్యకలాపాలకు మాత్రమే కానీ, తెలంగాణ అభివృద్ధికి ఏ మాత్రం ఉపయోగపడని పర్యటనలు. కాబట్టి పర్యటనలకు మాత్రమే పరిమితం కాకుండా తెలంగాణకు వచ్చే నిధులు కూడా చెల్లిస్తే బాగుంటుంది. అప్పుడే బీజేపీ పెద్దల పర్యటనలకు ఒక సార్థకత ఉంటుంది. లేకుంటే తెలంగాణ ప్రజలు చూస్తూ ఊరుకోరు. అవసరమైతే ఢిల్లీ పెద్దలపై పోరాటానికి సైతం సిద్ధపడతారు.