‘కూటి కోసం, కూలి కోసం.. పట్టణంలో బతుకుదామని.. బయలుదేరిన బాటసారికి.. ఎంతకష్టం ఎంత కష్టం..’ అని మహాకవి శ్రీశ్రీ బతుకుదెరువు కోసం వలసపోయినోళ్ల కష్టాలు కండ్లకు కట్టారు. ‘బాటసారి’ అనే శీర్షికతో రాసిన ఆ కవిత చదివినవాళ్లు కన్నీళ్లు పెట్టుకోకుండా ఉండలేరు. సువిశాలమైన భారతదేశంలో ఊరుగాని ఊరు.. పల్లెగాని పల్లెకు పోయి అక్కడ బతకలేక, వెనుకకు రాలేక నలిగిపోయేవారెందరో. బొంబాయి లాంటి మహానగరాలకు ఉపాధి వెతుక్కుంటూ పోయినవాళ్ల బాధలు వింటేనే గుండె తరుక్కుపోతుంది. ఇక దుబాయి లాంటి నగరాలకు, దేశంగాని దేశాలకు పోతే చెప్పేదేముంది. నాలుగు రోజులు కష్టపడితే నాలుగు పైసలు కండ్లజూస్తామని అనుకొని.. అప్పులతో రెక్కలు కట్టుకుని ఎగిరిపోయే అమాయకులు ఎందరో. ఇసుక ఎడారుల్లో బతుకు తడారి శుష్కించిపోయే అభాగ్యులూ ఉంటారు. తెలిసీతెలియక, చేసీచేయని నేరాలకు జైళ్లల్లో మగ్గేవాళ్ల గోస చెప్పనలవి కాదు. అలాంటి ఓ ఐదుగురు తెలంగాణ బిడ్డలు దుబాయి చెర నుంచి బయటపడి, ప్రాణాలు ఉగ్గబట్టుకొని తమ ఊరికి చేరుకొని, తమవారిని కండ్లారా చూడగలగటం ఓ ఉద్విగ్నభరిత దృశ్యం. తెలంగాణ తల్లి కండ్లు చెమర్చిన క్షణం.
విదేశాల్లో సమస్యల్లో చిక్కుకున్న భారతీయులకు దౌత్య కార్యాలయాల సేవలు అంత సులభంగా అందుబాటులో ఉండవు. బాధితులు సాధారణంగా కడు పేదలే ఉంటారు. కుటుంబ సభ్యులకు దిక్కుతోచదు. ఏం చేయాలో పాలుపోదు. ఎవరిని అడగాలో, ఎవరు ఆదుకుంటారో తెలియదు. విధిని నమ్ముకోవడం తప్ప గత్యంతరం ఉండదు. పైన తెలిపిన ఐదుగురు ఖైదీల పరిస్థితీ అంతే. ఓ నేపాలీ హత్య కేసులో వారు చిక్కుకున్నారు. కోర్టు పాతికేండ్ల శిక్ష వేసింది. దీంతో వారు దిక్కులేని పక్షులయ్యారు. కుటుంబాలు అనాథలయ్యాయి. వారి దీనగాథలు తెలుసుకున్న బీఆర్ఎస్ కార్యనిర్వాహక అధ్యక్షుడు కేటీఆర్ ఆత్మబంధువులా ఆదుకున్నారు. అడుగడుగునా చేయూతనందించి గట్టెక్కించారు. స్వయంగా నేపాల్కు వెళ్లి మృతుని కుటుంబ సభ్యులను కలిసి రూ.15 లక్షలు పరిహారంగా అందజేశారు. క్షమాభిక్ష పత్రాలపై సంతకాలు చేయించారు. ఇది జరిగింది 2011లో. అప్పటికింకా తెలంగాణ ఏర్పాటు కాలేదు.
ఆ సంగతి అలా ఉంచితే, క్షమాభిక్ష వ్యవహారంలో కథ అడ్డం తిరిగింది. సమస్య ఎదురైంది. మారిన చట్టాల కారణంగా విడుదల చేయడం వీలుకాలేదు. అయినా కేటీఆర్ పట్టు వదలకుండా దుబాయిలో బాధితులతో కేసు వేయించారు. విదేశాంగ శాఖను కదిలించారు. దుబాయి రాజుతో మాట్లాడారు. మొత్తంమీద ఆయన చూపిన చొరవ, చేసిన కృషి ఫలితంగా ఐదుగురూ 18 ఏండ్ల తర్వాత సలక్షణంగా విడుదలై సొంత గడ్డకు తిరిగి వచ్చారు. సుమారు రూ.30 లక్షల ఖర్చును కూడా కేటీఆరే భరించడం గమనార్హం. ఇది ఆయన ఓపికకూ, కార్యదీక్షతకూ అద్దం పట్టే వ్యవహారమని చెప్పాలి. ఇందుకు కష్టాల్లో ఉన్నవారిని ఆదుకోవాలనే మనసు మాత్రమే ఉంటే సరిపోదు, నిండైన అంకితభావమూ ఉండాలి. అవి తనలో నిండుగా ఉన్నాయని ఈ ఉదంతంతో చాటుకున్నారు బీఆర్ఎస్ నేత కేటీఆర్.