బీఆర్ఎస్ అందిస్తున్న సంక్షేమంతో పాటు అదనంగా మరింత మేలు జరుగుతుందని నమ్మి ఓట్లేసిన ప్రజలను రేవంత్ సర్కార్ వంచిస్తున్నది. హామీల అమలును పక్కనపెట్టి.. ప్రజాస్వామ్యయుతంగా ఎన్నికైన బీఆర్ఎస్ ఎమ్మెల్యేలను పార్టీలో చేర్చుకుంటూ రాజ్యాంగస్ఫూర్తికి తూట్లు పొడుస్తున్నది. అంతేకాదు, ఉద్యమ పార్టీపై చంద్రబాబుతో కలిసి ఉమ్మడి కుట్రలకు తెరలేపుతున్నది.
పార్టీ ఫిరాయింపులకు పునాది వేసిన కాంగ్రెస్.. బీఆర్ఎస్పై నిందలు వేయడం విడ్డూరం. అసలు పార్టీ ఫిరాయింపులను మొదలుపెట్టిందే కాంగ్రెస్. 2004 ఎన్నికల్లో గెలిచిన 26 మంది గులాబీ ఎమ్మెల్యేల్లో 10 మందిని లాక్కున్న వైఎస్ఆర్ నాడే రాష్ట్రంలో ఫిరాయింపులకు గేట్లు తెరిచారు. ఆనాటి నుంచే ఉద్యమ పార్టీపై కుట్రలు సాగుతున్నాయి. తెలంగాణ సిద్ధించిన తర్వాత అప్పటి టీడీపీ నేత, ప్రస్తుత ముఖ్యమంత్రి రేవంత్ ప్రభుత్వాన్ని అస్థిరపరచాలనే కుట్రలకు తెరలేపిన విషయం అందరికీ విదితమే. డబ్బు సంచులతో ఎమ్మెల్యేల కొనుగోలుకు ప్రయత్నించి రెడ్ హ్యాండెడ్గా ఆయన పట్టుబడటాన్ని చూసి యావత్తు ప్రపంచం నివ్వెరపోయింది. ‘బ్రీఫ్డ్ మీ’ అన్న మాటలను ఇప్పటికీ ఎవరూ మరచిపోలేదు. అందుకే పార్టీ ఫిరాయింపులకు పితామహుడు కేసీఆరే అని కాంగ్రెస్ నేతలు చెప్తుంటే.. దయ్యాలు వేదాలు వల్లించినట్టుగా ఉందని ప్రజలు నవ్వుకుంటున్నారు.
రాష్ట్ర విభజనను తీవ్రంగా వ్యతిరేకించిన చంద్రబాబు.. ప్రత్యేక రాష్ట్రం ఏర్పడిన తర్వాత కూడా నిస్సిగ్గుగా తెలంగాణపై ఆధిపత్యాన్ని ప్రదర్శించాలని చూశారు. రాజ్యాంగ పదవిలో ఉండి కూడా.. పక్క రాష్ట్రంలో ప్రజాస్వామ్యయుతంగా ఎన్నికైన ప్రభుత్వాన్ని కూల్చేందుకు తెరవెనుక పన్నాగం పన్నారు. కుట్రలను పసిగట్టిన కేసీఆర్ జూలు విదల్చడంతో రెండు కండ్ల సిద్ధాంతం తోక ముడుచుకొని పరారైంది. బాబు కుట్రలు అక్కడితో ఆగలేదు. 2023 అసెంబ్లీ ఎన్నికల్లోనూ సాగాయి. 2014, 2018 అసెంబ్లీ ఎన్నికల్లో పోటీ చేసిన టీడీపీ.. 2023లో రేవంత్కు ప్రయోజనం చేకూర్చేందుకే పోటీ చేయలేదనేది జగమెరిగిన సత్యం.
ఎన్డీయే కూటమిలో కీలక నేతగా వ్యవహరిస్తున్న చంద్రబాబుతో.. కాంగ్రెస్ ప్రభుత్వంలో మంత్రిగా ఉన్న తుమ్మల నాగేశ్వరరావు అనధికారికంగా భేటీ కావడం వెనుక ఆంతర్యం ఏమిటి? ఒకవైపు ఎన్డీయేలో భాగస్వామిగా ఉంటూ, మరో వైపు తెలంగాణ, ఏపీ రాష్ర్టాల్లో కాంగ్రెస్ పట్ల సానుకూలంగా ఉండటం ఒక్క చంద్రబాబుకే చెల్లింది. పాత టీడీపీ ‘గుంపు’ ఒకే గొడుగు కిందకు ఇప్పుడే ఎందుకు చేరుతోంది? ఈ ఉమ్మడి కుట్రలను నిర్మిస్తున్న ‘మేస్త్రి’ ఎవరన్నది సూక్ష్మంగా పరిశీలించాల్సిన అవసరం ఉన్నది.
మొదటి నుంచి బీఆర్ఎస్ను ఒకే రూపంలో కుట్రలు వెంటాడుతున్నాయి. రెండు దశాబ్దాలు గడిచినా కుట్రదారులు రాజకీయ వేటు కోసం మాటు వేస్తూనే ఉన్నారు. కారణం తెలంగాణను సాధించుకొని సొంత భుజాలపై మోయడం. ప్రాంత బాగుకోసం అవిశ్రాంతంగా శ్రమించడం, సాధించుకున్న సొంత రాష్ట్రంలో పరాయి పాలన వద్దు అనడం. పద్నాలుగేండ్లు రాష్ట్రం కోసం కొట్లాడి, పదేండ్లు రాష్ట్ర ప్రగతి కోసం తండ్లాడిన ఉద్యమ పార్టీని అసెంబ్లీలో లేకుండా చేయడమంటే తెలంగాణపై కుట్రలు చేస్తున్నట్టే. పరాయి పెత్తనం మళ్లీ వస్తే అమరుల ఆత్మలు ఘోషిస్తాయి. చైతన్యవంతమైన తెలంగాణ సమాజం తేరుకొని ఒక్కసారి ఆలోచించాలి.