తప్పెవరిదీ కాదు
తొందర పాటంతా నాదే
పలుసార్లు బల్లి పడింది కదాని
నేను దుంకాను అంతే…!
బొద్దింకలు ఈగాదులు
ఎన్నిసార్లు పడినా
అవి పాకంతో కలిసిపోతవి
నాకే తెలివి లేక…!
తెరిచుంచిన గిన్నె మీంచి
చెట్నీ ఉందని చూసుకోక ఎగిరాను
కాలు జారి మీ వీడియో కంట పడ్డాను
దొరికిన దొంగనయ్యాను!
ఒకవైపు ప్రాణ భయంతో నేను
విలవిలలాడుతుంటే భూత దయలేక
వీడియో తీసిన వారిని కదా
అనాల్సింది తిట్టాల్సింది!
ఆ పేద విద్యార్థులకు
ఆహారమైనా బాగుండేది
టీవీ ఛానెల్స్ పదే పదే చూపిస్తుంటే
డ్రగ్స్ తీసుకున్న సెలబ్రెటీనయ్యా!
ఇది మాకు తొలిసారి కాదు
మీకు చివరిదీ కూడా కాదు
ఇట్లా దొరికిపోయినప్పుడు తప్ప మేం
పేద విద్యార్థులకు రక్త సంబంధీకులమే!
దయచేసి వంటవాళ్లని ఏమనకండి
వాడు వండే ప్రతి పాకంలో
ఉప్పు తక్కువైనప్పుడల్లా
స్వేదం దారబోస్తున్నాడు!!
(మెదక్ జేఎన్టీయూ హాస్టల్లో చెట్నీలో ఎలుక ఈదులాడటం చూసి…)
– కోట్ల వెంకటేశ్వర రెడ్డి
94402 33261