Health Insurance | మన దేశంలో అధికారిక జనాభా గణాంకాలు 2011 నాటివే అందుబాటులో ఉన్నాయి. ప్రస్తుతం వాడుతున్న గణాంకాలు అంతర్జాతీయ నివేదికల ఆధారంగా వేసుకున్న సాపేక్ష అంచనాలే. వీటి ప్రకారం మన దేశ జనాభా 2023 మధ్యలోనే చైనాను మించిపోయింది. ఆ రకంగా ప్రపంచంలోనే అత్యధిక జనాభా కలిగిన దేశంగా భారత్ చలామణి అవుతున్నది. ఐక్యరాజ్య సమితి అంచనాల మేరకు రూపొందించిన భారత వృద్ధాప్య నివేదిక 2023 ప్రకారం 2022 నాటికే 60 ఏండ్లు పైబడిన వారు మన దేశ జనాభాలో 10 శాతం వరకు ఉన్నారు. 2050 నాటికి వీరు జనాభాలో 30 శాతం మేరకు ఉండొచ్చని అంచనా. జీవన ప్రమాణాలు పెరగడం వయో వృద్ధుల శాతం పెరగడానికి ప్రధాన కారణం. ఒక అంచనా ప్రకారం 2018 నాటికి సగటు జీవన పరిమాణం 69.1 సంవత్సరాలు. నిన్నామొన్నటి వరకు యువ జనాభా పెరిగిందని మురిసిపోయాం. ఇప్పుడు వృద్ధుల జనాభా పెరుగుతుండటం సరికొత్త సవాలును మన ముందుకు తెస్తున్నది.
వృద్ధుల జనాభా పెరుగుదలను వెంబడించి అనేక ఇతర సమస్యలు తలెత్తడం సహజం. మానసిక ఒత్తిడులు, కాలుష్యం, జీవనశైలి కారణంగా వ్యాధులు శరవేగంగా విస్తరిస్తుండటం మనం చూస్తున్నాం. శరీరం బలహీనమైపోయే మలిసెంజెలో ఆరోగ్య సమస్యలు ఎక్కువగా బాధిస్తాయి. ముఖ్యంగా మధుమేహం, గుండె జబ్బులు, క్యాన్సర్లు ముసలితనంలో చిక్కులను తెచ్చిపెడుతాయి. ఒక అంచనా ప్రకారం మన దేశంలోని వృద్ధుల్లో 75 శాతం మందికి ఏదో ఒక దీర్ఘకాలిక వ్యాధి ఉన్నది. సూక్ష్మ కుటుంబవ్యవస్థ విస్తరిస్తున్న కారణంగా వృద్ధులకు ఆదరణ, అండదండలు కరువవుతున్నవి. అందువల్ల ఆరోగ్య సేవలు, చౌకైన మందులు, ఇతర సౌకర్యాలు వృద్ధులకు తప్పనిసరిగా అవసరమవుతాయి. ఆ ఇతర సౌకర్యాల్లో ఆరోగ్య బీమా అనేది అత్యవసరం.
ప్రస్తుతం మన దేశంలో ఆరోగ్య బీమా పొందేందుకు అర్హమైన వయస్సు 65 కంటే తక్కువ. అంటే 65 దాటినవారు కొత్తగా ఆరోగ్య బీమా కోసం దరఖాస్తు చేసుకుంటే కుదరదు. పెరుగుతున్న ఆరోగ్య సేవల వ్యయం దృష్ట్యా ఇది వయోవృద్ధులకు పెద్ద సమస్యగా ఉన్నది. బీమారంగ నియంత్రణ, అభివృద్ధి సంస్థ ఇటీవల ప్రవేశ వయస్సు పరిధిని పెంచాలని బీమా సంస్థలను ఆదేశించింది. మారుతున్న సామాజిక వైవిధ్యాన్ని దృష్టిలో పెట్టుకొని ఈ మార్పును తీసుకువచ్చారన్నది తెలుస్తూనే ఉన్నది. ఇది ఆహ్వానించి, అభినందించాల్సిన విషయమే. కుటుంబంలో చిన్నా పెద్దా కలిపి ఫ్లోటర్ పద్ధతిలో ఉమ్మడిగా బీమా తీసుకుంటే కొంత వ్యయం కూడా కలిసివచ్చే మాట నిజమే. అయినప్పటికీ కేవలం బీమా సౌకర్యం విస్తరణ ఒక్కటే సరిపోదు. సర్కారీ వైద్య వ్యవస్థను అత్యాధునికంగా విస్తరించి అందుబాటులోకి తేవాలి. ప్రైవేటురంగంలో ఆరోగ్య వ్యయాన్ని కూడా తగ్గించి అందరికీ అగ్వగా చికిత్సలు అందించాల్సిన అవసరం ఉన్నది. ఈ సమతూకం సాధించలేకపోతే ఆరోగ్య బీమా విస్తరణ అనేది అసంపూర్తి కార్యాచరణగా, ఆస్పత్రులు, బీమా సంస్థల దోపిడీకి ఉపకరణంగా మారిపోయే ప్రమాదం ఉంది.