Telangana | ఉద్యోగ నోటిఫికేషన్ల కోసం కొట్లాట, అపాయింట్మెంట్ ఆర్డర్ల కోసం కొట్లాట, పరీక్షకు సన్నద్ధమయ్యేందుకు సమయం ఇవ్వాలంటూ కొట్లాట, పోస్టుల సంఖ్య పెంచాలంటూ కొట్లాట, పరీక్ష వాయిదా వేయాలంటూ కొట్లాట. రాష్ట్రంలో అసలేం జరుగుతోంది? ప్రగతిభవన్ వద్ద బద్ధలైన ముళ్లకంచెలు ఇప్పుడు టీజీపీఎస్సీ ఆఫీస్ ముందు ఎందుకు దర్శనమిస్తున్నాయి? పుస్తకాలతో కుస్తీ పట్టాల్సిన కాబోయే టీచర్లు విద్యా కమిషనర్ ఆఫీస్ వద్ద ఎందుకు ధర్నా చేస్తున్నారు? ఉద్యమాల గడ్డ ఉస్మానియా క్యాంపస్ చుట్టూ పోలీసులెందుకు మోహరిస్తున్నారు? ఎన్నికలప్పుడు కాంగ్రెస్కు స్నేహ హస్తం అందించిన నిరుద్యోగులు ఇప్పుడెందుకు రగిలిపోతున్నారు? నిత్యం ధర్నా చౌక్ ఎందుకు దద్దరిల్లుతోంది? నిరుద్యోగులకు న్యాయం చేస్తామని ప్రకటించిన నాటి పీసీసీ అధ్యక్షుడైన రేవంత్ నేడు అధికారంలోకి వచ్చాక సీఎం హోదా లో ఎందుకు స్వరం మార్చుకుంటున్నారు?
గ్రూప్స్, డీఎస్సీ అభ్యర్థుల నిరసనలపై సీఎం రేవంత్చేసిన వ్యాఖ్యలు గర్హనీయమైనవి. నిరుద్యోగుల డిమాండ్లను నెరవేర్చాల్సిన ముఖ్యమంత్రే ‘వాళ్లది కృత్రిమ ఉద్యమ’మంటూ వక్రీకరించడం బాధాకరం. స్వచ్ఛందంగా చేస్తున్న పోరాటానికి రాజకీయ రంగు పులమడం అసమంజసం. నిజంగనే ఎవరైనా కోచింగ్ సెంటర్ల నిర్వాహకులు అభ్యర్థులను రెచ్చగొట్టి ఉంటే వాళ్లపై కఠిన చర్య లు తీసుకోవచ్చు కదా? ప్రభుత్వంలో ఉన్నది వాళ్లే కదా?
రాష్ట్రంలోని నిరుద్యోగులు తమ డిమాండ్లను నెర వేర్చాలని గత నెల రోజులుగా దీక్షలు, నిరసన కార్యక్ర మాలు చేస్తున్నారు. అయినా ప్రభుత్వం పట్టించుకోవడం లేదు. కాగా వారిని అరెస్టులు చేస్తూ పాశవికంగా వ్యవహ రిస్తున్నది. ఈ నేపథ్యంలో ప్రభుత్వం గ్రూప్-1 ఉద్యోగాలను అమ్ముకుంటున్నదనే అనుమానాలు వ్యక్తమవుతున్నాయి. అందుకే జీవో నెంబర్ 55ని సవరించాలని నిరుద్యోగులు కోరుతున్నారు. అదేవిధంగా జీవో నెంబర్ 29 తీసుకురావడం వెనుక గల కారణాలను తేల్చాలి. గ్రూప్ 1 ప్రిలిమినరీలో జనరల్ ర్యాంకింగ్ ప్రకటించకుం డా అత్యుత్సాహంతో ఫలితాలు ప్రకటించడం వెనకున్న ఆంతర్యం ఏమిటో అంతుచిక్కడం లేదు. కాంగ్రెస్ ఎన్నికల్లో హామీ ఇచ్చినట్టుగానే మెగా డీఎస్సీ వేయాలి. తాజా గా టెట్ ఫలితాలు రావడంతో అభ్యర్థుల సంఖ్య పెరిగింది. పరీక్షకు సన్నద్ధమయ్యే సమయం ఇవ్వాలి. టీఆర్టీని 45 రోజుల పాటు వాయిదా వేయాలి.
గ్రూప్ 1 తరహాలో గ్రూప్ 2లో కూడా పోస్టులను పెంచాలి. పరీక్ష తేదీలపై స్పష్టత ఇవ్వాలి. డీఎస్సీ, గ్రూప్-2 పరీక్షలు ఒకే సమయంలో ఉండటంతో అభ్యర్థుల్లో తీవ్ర గందరగోళం నెలకొన్నది. గ్రూప్-2 వాయిదాపై మీడియాలో వస్తున్న వార్తలపై స్పష్టత ఇవ్వాలి. అంతేకాదు, గ్రూప్-2, గ్రూప్-3 పరీక్షల సిలబస్ దాదాపుగా ఒక్కటే. కాబట్టి, ఈ రెండు పరీక్షలను తక్కువ వ్యవధిలో నిర్వహించాలి. యూపీఎస్సీ తరహాలో 2014 నుంచి టీజీపీఎస్సీ నిర్వహించిన పరీక్షల ప్రశ్నపత్రాలతో పాటు జవాబులను వెబ్సైట్లో పొందుపర్చాలి.
నిరుద్యోగుల సమస్యను రాష్ట్ర ప్రభుత్వం రాజకీయ కోణంలో కాకుండా సామాజిక, ఆర్థిక, మానవీయ కోణంలో చూడాలి. పంతానికి పోకుండా ఓ మెట్టుదిగి నిరుద్యోగులతో చర్చలు జరపాలి. అప్పుడే నిరుద్యోగుల సమస్య పరిష్కారమవుతుంది.
– ప్రజ్ఞ