‘ఆనాటి రోజులు తెస్తాడూ మన రేవంతన్న’ అంటూ ఎన్నికలప్పుడు పాటలు పాడుతూ కాంగ్రెస్ పార్టీ అనేక హామీలు ఇచ్చింది. ఆ పాటకు తగ్గట్టుగానే ఆనాటి చీకటి రోజులను తీసుకువచ్చారు ముఖ్యమంత్రి రేవంత్. ఎన్నికల్లో ఊకదంపుడు ఉపన్యాసాలు, అలవిగాని హామీలతో మభ్యపెట్టిన రేవంత్.. నమ్మి ఓట్లేసిన జనాల నోట్లో మట్టికొట్టారు. గత సర్కార్ అమలుచేసిన సంక్షేమ పథకాలన్నింటిని పక్కనపెట్టేశారు. ఒకటి, అరా పథకాలు అమలు చేస్తున్నా.. నిబంధనలు, మార్గదర్శకాల పేరుతో కొర్రీలు పెడుతూ నిజంగానే మళ్లీ తెలంగాణలో చీకటి రోజులు తీసుకొస్తున్నారు. ‘వెంటనే రుణాలు తీస్కోండి. కాంగ్రెస్ అధికారంలోకి రాగానే డిసెంబర్ 9న రూ.2 లక్షల రుణమాఫీ చేస్తా’నని డంబాచారాలు పలికిన రేవంత్.. నేడు రైతులకు కుచ్చుటోపీ పెడుతున్నారు.
Congress | రుణమాఫీ చేస్తానంటూ దేవుళ్ల మీద ఒట్టేసిన ముఖ్యమంత్రి రేవంత్.. ఆ ఒట్లను గట్టెక్కించేందుకు నానా తంటాలు పడుతున్నారు. ప్రభుత్వంపై ఆర్థిక భారాన్ని తగ్గించుకునేందుకు నిబంధనల పేరిట కొర్రీలు విధిస్తూ రైతులను నట్టేట ముంచుతున్నారు. ఇవి పూర్తిగా రుణమాఫీ ఎగ్గొట్టేందుకు విడుదల చేసిన మార్గదర్శకాలే. రేషన్కార్డుతో ముడిపెట్టడమంటే కుటుంబంలో ఒకరికి మాత్రమే రుణమాఫీ చేస్తామన్నట్టే. ఇది అసంబద్ధమైన నిబంధన. ప్రజాపాలన పేరిట దరఖాస్తులు స్వీకరించిన కాంగ్రెస్ సర్కార్ ఇప్పటివరకు ఏ ఒక్కరికీ రేషన్కార్డు మంజూరు చేయలేదు. వాస్తవానికి తెలంగాణలో కొన్నేండ్లుగా రేషన్కార్డులు జారీ కాలేదు. చాలా కుటుంబాల్లో అన్నదమ్ములకు వివాహాలు జరిగి, భూ పంపకాలు కూడా జరిగిపోయాయి. ఈ నేపథ్యంలో భూమి ఉండి, రేషన్కార్డు విడిగా లేనివారు నష్టపోయే ప్రమాదం ఉంది. అంతేకాదు, ఇంట్లో పరిస్థితి బాగోలేక, లేదా కుమార్తెల వివాహం కోసమో కొందరు రైతన్నలు భూములు అమ్ముకున్నారు. రేవంత్ రెడ్డి ప్రభుత్వం తీసుకువచ్చిన నిబంధనల కారణంగా అలాంటి రైతులు గతంలో తీసుకున్న రుణాలు మాఫీకి నోచుకోవు. దీంతో సదరు రైతులు తీవ్రంగా నష్టపోయే ప్రమాదం ఉన్నది.
‘నవ్వి పోదురుగాక నాకేటి సిగ్గు’ అన్నట్టుగా రూ.2 లక్షలకు పైగా అప్పులున్న రైతులు అదనంగా ఉన్న రుణాన్ని ముందుగా చెల్లించాలని షరతు పెట్టారు. అలా చేస్తేనే రుణమాఫీ చేస్తామనడం విడ్డూరం. అసలు రుణం చెల్లించలేకనే రైతన్న ఇబ్బంది పడుతుంటే ముందు చెల్లిస్తేనే రుణమాఫీ చేస్తామనటం రైతును మళ్లీ అప్పుల ఊబిలో నెట్టేసే ప్రయత్నమే. పీఎం కిసాన్ నిబంధనలను పరిగణనలోకి తీసుకుంటామనటం సబబు కాదు. ఈ నిబంధన వల్ల సుమారు 38 లక్షల మంది రైతులు రుణమాఫీకి దూరమవుతారు. రాష్ట్రంలో 68 లక్షల మందికి పైగా రైతుబంధు అందుకుంటున్నారు. ప్రభుత్వం వద్ద సదరు రైతుల డేటా ఉంది. ఆ డేటాను కాదని, పీఎం కిసాన్ను పరిగణనలోకి తీసుకోవటం దేనికి సంకేతం? ఇది రుణమాఫీ ఎగ్గొట్టే ప్రయత్నంలో భాగం కాదా? అనేది రేవంత్ ప్రభుత్వం సమాధానం చెప్పాలి.
మార్గదర్శకాల్లో రైతులను బురిడీ కొట్టించే మరో నిబంధన 12 డిసెంబర్ 2018 నుంచి 9 డిసెంబర్ 2023 వరకు అంటే సుమారు ఈ ఐదేండ్లలో తీసుకున్న రుణాలకే రుణమాఫీ వర్తిస్తాయనటం. 2018 డిసెంబర్కు ముందు రుణం తీసుకున్న రైతులు రైతులు కాదా? ఆ రైతులు కాంగ్రెస్కు ఓట్లు వేయలేదా? లేదా ఆ రైతులు తెలంగాణ బిడ్డలు కాదా? వాళ్లవి అప్పులు కావా? ఎన్నికల మ్యానిఫెస్టోలో కటాఫ్ తేదీని కాంగ్రెస్ పార్టీ పొందుపరచలేదు. అంతేకాదు, అసలు, వడ్డీ కలిపి రుణమాఫీ చేస్తామని ఎన్నికల్లో హామీ ఇచ్చింది. కానీ, నేడు అందుకు విరుద్ధంగా కొర్రీలు పెడుతున్నది. ఇది రైతులను మోసం చేయడమే.
రీ షెడ్యూల్ చేసిన రుణాలను మాఫీ చేయబోమని చెప్పడం అవివేకమే. ముఖ్యమంత్రికి రైతన్నలపై ఏ మాత్రం ప్రేమ లేదని దీన్నిబట్టి అర్థమవుతున్నది. ఎందుకంటే, ప్రకృతి వైపరీత్యాల కారణంగా పంటలు దెబ్బతిన్నప్పుడు, కరువు కాటకాలు వచ్చినప్పుడు బ్యాంకులే రుణాలను రీషెడ్యూల్ చేస్తాయి. అంతేకాదు, మళ్లీ అన్నదాతలకు రుణం ఇస్తాయి. అది రైతు హక్కు. ఇది ఆర్బీఐ నిబంధన కూడా. రుణాన్ని రీషెడ్యూల్ చేశారంటేనే సదరు రైతు కష్టాల్లో ఉన్నట్టు. అలాంటి రైతన్నను ఆదుకోవాల్సింది పోయి, వారికి రుణమాఫీ చేయబోమని చెప్పడం బాధ్యతారాహిత్యమే.
సీఎం రేవంత్ ‘ఓడదాటినాక బోడమల్లన్న’ అన్నట్టు తాను ఒడ్డెక్కినాక రైతుల నడ్డివిరిచే ప్రయత్నం చేస్తున్నారు. గత కేసీఆర్ సర్కార్ మొదటి పర్యాయం 35.31 లక్షల మంది రైతులకు సంబంధించిన రూ.16,144 కోట్ల రుణాలను మాఫీ చేసింది. రెండో పర్యాయం 22.98 లక్షల మంది అన్నదాతలకు చెందిన రూ.13 వేల కోట్ల రుణాలను మాఫీ చేసింది. మొత్తంగా రూ.29,144 కోట్ల రుణాలను మాఫీ చేసింది. కానీ, నేటి రేవంత్ ప్రభుత్వం రుణమాఫీని ఎగ్గొట్టి రైతులకు టోపీ పెట్టేవిధంగా వ్యవహరిస్తున్నది.
రేవంత్ ప్రభుత్వం కొలువుదీరాక యాసంగిలో పంటలకు సాగునీరు లేక, కరెంట్ సరిగా రాక పంటలు ఎండి రైతన్నలు నష్టాల పాలయ్యారు. ఈ వానకాలంలోనూ సరైన వర్షాలు లేక పంట సాగు చేసే పరిస్థితి లేదు. ఈ క్రమంలో మూలిగే నక్కపై తాటిపండు పడ్డట్టు తీవ్ర ఇక్కట్లు ఎదుర్కొంటున్న రైతాంగానికి ఈ మార్గదర్శకాలు మరిన్ని చిక్కులను తెచ్చిపెడుతున్నాయి.
ఈ నేపథ్యంలో పరిపాలన గాలికొదిలేసి రాజకీయ వలసలే పరమావధిగా భావిస్తూ రేవంత్ పూటకో ఎమ్మెల్యేను కాంగ్రెస్లో చేర్చుకుంటున్నారు. సంక్షేమ పథకాలను అటకెక్కించి, ఆరు గ్యారంటీలను మరిచిపోయిన ఆయనపై ప్రజలు తిరగబడతారనే ఉద్దేశంతోనే అక్కరకు రాని మార్గదర్శకాలను విడుదల చేసి చేతులు దులుపుకొంటున్నారు. ఈ మార్గదర్శకాలన్నీ అమలైతే సుమారు 60 శాతం మంది రైతులు రుణమాఫీకి దూరమవుతారు. ఇప్పటికైనా ప్రభుత్వం తన తీరును మార్చుకోవాలి. అర్థం పర్థం లేని మార్గదర్శకాలను రద్దు చేసి అందరి రుణాలను మాఫీ చేయాలి. లేకపోతే కాంగ్రెస్ ప్రభుత్వం రైతుల ఆగ్రహానికి గురికాక తప్పదు.