2001లో టీఆర్ఎస్ (ఇప్పుడు బీఆర్ఎస్) స్థాపించినప్పటి నుంచి తెలంగాణ పట్ల అంకితభావం నుంచి కేసీఆర్ ఎప్పుడూ పక్కకు తప్పుకోలేదు. ఆమరణ నిరాహార దీక్ష, సబ్బండ వర్గాలను ఏకం చేయడం, శాంతియుతంగా, గాంధేయమార్గంలో చేసిన ఉద్యమం, రాజకీయ అనివార్యత ద్వారా కేసీఆర్ తెలంగాణ సాధించారు. రాష్ట్ర అవతరణ తర్వాత తెలంగాణపై ఎన్ని కుట్రలు జరిగినా వాటిని తిప్పికొట్టి ఒక స్థిరమైన నాయకత్వంతో తెలంగాణను సంక్షేమం, అభివృద్ధిపథంలో నడిపారు. ‘తెలంగాణ ఆచరిస్తున్నది-దేశం అనుసరిస్తున్నది’ అనే స్థాయికి తెలంగాణను తీసుకొచ్చారు.
కాంగ్రెస్ విషయానికి వస్తే.. 1948 నుంచి ఇప్పటివరకు తమ పార్టీ ప్రయోజనాలకు ఇచ్చినంత ప్రాధాన్యం, తెలంగాణ ప్రాంత ప్రయోజనాలకు ఇవ్వనేలేదు. ఏకంగా ఓటుకు నోటు కేసులో రెడ్ హ్యాండెడ్గా పట్టుబడ్డ నిందితుడినే తమ పార్టీ అధ్యక్షునిగా చేసుకోవడం తెలంగాణ పట్ల వారికి ఉన్న అనైతిక విధానాన్ని తెలియజేస్తున్నది. బీజేపీ విషయానికి వస్తే.. కాకినాడ తీర్మానంపై వెనక్కిమళ్లడం నుంచి, రాజ్యసభలో వ్యతిరేకించిన విధానం నుంచి, తల్లిని చంపి బిడ్డను బతికించారనేంత వరకు తెలంగాణ పట్ల ఉన్న చులకన భావం, వారి అనైతికను తెలియజేస్తున్నది.
58 ఏండ్ల ఉమ్మడి ఆంధ్రప్రదేశ్లో కాంగ్రెస్, టీడీపీ-బీజేపీ కూటమి కలిసి కాలరాసిన హక్కులను కేసీఆర్ ప్రభుత్వం తిరిగి ఈ పదేండ్లలో సాధించింది. నీళ్లు, నిధులు, నియామకాలపై తెలంగాణ కోల్పోయిన హక్కులను తిరిగి సాధించారు. తెలంగాణ నీళ్ల వాటాను తరలించి తెలంగాణకు నష్టం కలిగించడంలో కాంగ్రెస్ ముందుంటే, తీసిపోని విధంగా తెలంగాణ నీటి వాటాను టీడీపీ దోపిడీ చేస్తే, బీజేపీ సహకరించింది. ప్రాజెక్టుల ద్వారా, మిషన్ కాకతీయ ద్వారా తెలంగాణ నీటి హక్కులను తిరిగి కేసీఆర్ సాధించారు. ఈ క్రమంలో కాంగ్రెస్, ఇతర పార్టీలు, వ్యక్తులు వివిధ రకాల కేసుల ద్వారా ఈ ప్రక్రియను ఆపే ప్రయత్నం చేసినప్పటికీ కేసీఆర్ ప్రభుత్వం ఆ కుట్రలను సమర్థవంతంగా తిప్పికొట్టింది. తెలంగాణ కోటి ఎకరాల మాగాణం అని తల ఎగరేసి ప్రతీ తెలంగాణ పౌరుడు చెప్పుకొనేట్టు చేసిన వ్యక్తి ముఖ్యమంత్రి కేసీఆర్.
గత యాభై ఎనిమిదేండ్లుగా కాంగ్రెస్, టీడీపీ నాయకులు నిధుల వాటాను సీమాంధ్ర ప్రాంతానికి తరలించి తెలంగాణ ప్రజలకు తీరని అన్యాయం చేశారు. కానీ, కేసీఆర్ ఇక్కడి నిధులను ఇక్కడే ఖర్చుచేయడం వల్ల రైతుబంధు, కల్యాణలక్ష్మి, ఆసరా పింఛన్, రైతు బీమా, దళితబంధు, బీసీ బంధు, వెయ్యి గురుకులాలు, నీటి ప్రాజెక్టులు, మంచినీటి సదుపాయం, మంచి రోడ్లు, నిరంతర విద్యుత్తు, జిల్లాకో మెడికల్ కాలేజీ వంటి ఎన్నో కార్యక్రమాలు ముఖ్యమంత్రి కేసీఆర్ అమలుచేసి చూపించారు.
గడిచిన 23 ఏండ్ల చరిత్రను పరిశీలిస్తే.. తెలంగాణ పట్ల కేసీఆర్కు ఉన్న నిబద్ధత ఏ ఒక్క వ్యక్తిలో కానీ, ఏ పార్టీలో కానీ కనిపించదు. పదేండ్లు కూడా నిండని తెలంగాణకు పరిరక్షకునిగా కేసీఆర్ను కాక మరెవరినీ ఊహించలేమని ప్రజలు అభిప్రాయపడుతున్నారు. 2024, జూన్ 2 వరకు ఉన్న జాయింట్ క్యాపిటల్, సెక్షన్ 8 వంటి నిబంధనలు పూర్తిగా తొలగి, కృష్ణా నది నీటిహక్కులు, వివిధ సంస్థల ఆస్తుల పంపకాలు పూర్తయ్యేవరకు ముఖ్యమంత్రిగా కేసీఆర్ ఉండటమే తెలంగాణ హక్కులకు రక్ష.
– పెండ్యాల మంగళాదేవి