కాంగ్రెస్ పార్టీ అధికారంలోకి వచ్చిన ఆరు నెలలలోపే బీసీ కులగణన చేపట్టి, స్థానిక సంస్థల ఎన్నికల్లో 42 శాతం రిజర్వేషన్లు కల్పిస్తామని కామారెడ్డి బీసీ డిక్లరేషన్లో టీపీసీసీ అధ్యక్షుడి హోదాలో రేవంత్రెడ్డి హామీ ఇచ్చారు. అంతేకాదు, అధికారంలోకి వచ్చాక బీసీ సబ్ ప్లాన్ అమలు చేసి, ఏటా బడ్జెట్లో రూ.20 వేల కోట్లు కేటాయిస్తామని, ఐదేండ్లలో మొత్తంగా లక్ష కోట్లు కేటాయిస్తామని హామీ ఇచ్చారు. రేవంత్రెడ్డి రాష్ట్ర సీఎం అయ్యారే కానీ, ఇచ్చిన మాట మాత్రం నిలబెట్టుకోలేకపోయారు. కులగణన, సబ్ప్లాన్తో సహా అన్ని అంశాలను విస్మరించి బీసీలను దగా చేశారు.
BC Reservations | రాష్ట్రంలో కాంగ్రెస్ ప్రభుత్వం ఏర్పాటై ఏడు నెలలైంది. సర్పంచ్ల పదవీకాలం ముగిసి ఆరు నెలలు కావస్తున్నది. రేపోమాపో స్థానిక సంస్థల ఎన్నికలు కూడా జరుగుతాయి. ప్రభుత్వానికి బీసీల పట్ల చిత్తశుద్ధి ఉండి ఉంటే ఈపాటికే కులగణన చేపట్టి, ఇచ్చిన హామీ మేరకు స్థానిక సంస్థల్లో 42 శాతం రిజర్వేషన్లు కల్పించేది. ప్రభుత్వం తాత్సారం చేస్తుండటంతో గ్రామాల్లో అభివృద్ధి కుంటుపడుతున్నది.
ఇక బీసీ డిక్లరేషన్ విషయానికి వస్తే.. ప్రతి మండలానికి బీసీ గురుకుల పాఠశాల ఏర్పాటు చేస్తామని, ర్యాంకుతో సంబంధం లేకుండా బీసీ విద్యార్థులందరికీ ఫీజు రీయింబర్స్మెంట్ పథకాన్ని అమలు చేస్తామని కాంగ్రెస్ చెప్పింది. కానీ, ఆ హామీ నేటికీ అమలు కాలేదు. ప్రతి జిల్లా కేంద్రంలో రూ.50 కోట్లతో బీసీ భవన్ నిర్మిస్తామని, అన్ని కులాల వారికి కార్పొరేషన్లు ఏర్పాటు చేసి, అర్హులైన వారికి రూ.10 లక్షల రుణాలు అందిస్తామని చెప్పి మాట తప్పారు.
అంతేకాదు, అధికారంలోకి వచ్చిన ఆరు నెలల్లోనే అద్భుతమైన పాలన అందిస్తున్నామని గొప్పలకు పోతున్నారు ముఖ్యమంత్రి రేవంత్. కానీ, వాస్తవ పరిస్థితులు అందుకు విరుద్ధంగా ఉన్నాయి. వంద రోజుల్లోనే ఆరు గ్యారంటీలు అమలు చేస్తామని రేవంత్ చెప్పారు. కానీ, ఆరు నెలలు దాటినా రైతు భరోసా, యువ వికాసం, చేయూత, ఇందిరమ్మ ఇండ్ల నిర్మాణం, వ్యవసాయ కూలీలకు ఏడాదికి రూ.12 వేల పెట్టుబడి సాయంతో పాటు ఇతర అనేక హామీలను ఇప్పటికీ అమలు చేయకపోవడంపై రాష్ట్ర ప్రజలు గుర్రుగా ఉన్నారు.
‘మాది రైతు ప్రభుత్వం’ అని గొప్పలు చెప్పుకొనే ముఖ్యమంత్రి.. నిజంగా రైతులపై ప్రేమ ఉంటే ఎకరాకు రూ.7500 చొప్పున వెంటనే రైతు భరోసా నిధులను రైతుల ఖాతాల్లో జమ చేయాలని అన్నదాతలు డిమాండ్ చేస్తున్నారు.
అన్ని వర్గాల మద్దతుతో అధికారంలోకి వచ్చిన కాంగ్రెస్ అనతికాలంలోనే అన్ని వర్గాల్లోనూ వ్యతిరేకతను మూటకట్టుకున్నది. ఈ నేపథ్యంలో ఇప్పటికైనా రేవంత్ సర్కార్ తన తీరును మార్చుకోవాలి. బీసీలకు ఇచ్చిన హామీ మేరకు కులగణన చేసి, స్థానిక సంస్థల్లో రిజర్వేషన్లు కల్పించాకే ఎన్నికలు నిర్వహించాలి.
– బూర్గుపల్లి కృష్ణయాదవ్ 98661 70384