స్వరాష్ట్ర సాధన తర్వాత దశాబ్ద కాలానికి తెలంగాణ దారి మారిం ది. అభివృద్ధి మంత్రంతో, సాధించిన పనులను చూసి ఓటేయమని బీఆర్ఎస్ ప్రజలను అడిగింది. అభివృద్ధి ఫలాలు అందరి కండ్ల ముందే ఉన్నాయి. తెలంగాణ సాధించిన అభివృద్ధి, సంక్షేమాలపై దేశవిదేశాల్లో చర్చ జరుగుతున్నది. రాష్ర్టానికి అవార్డులు, రివార్డులు కూడా వరించాయి. కానీ ఎన్నికల ఫలితాలను చూస్తే అందుకు భిన్నమైన రీతిలో ఓటరు ఆలోచించినట్టు అవగతమవుతున్నది. ఈసారి ప్రజల నాడి విశ్లేషకులకు సైతం ఓ పట్టాన అందలేదు. దాంతో ఎవరికి తోచిన అంచనాలు వారు వేసుకున్నారు. అంతిమంగా ప్రజల తీర్పే ముఖ్యం. ఆ తీర్పు పర్యవసానాలపై పరిశోధనలు, విశ్లేషణలు సుదీర్ఘకాలం సాగుతాయనడంలో ఎలాంటి సందేహం లేదు.
ఈ ఎన్నికల్లో బీఆర్ఎస్ సాధించిన ఫలితాలు కూడా సామాన్యమైనవేమీ కావు. సభలో మూడింట ఒక వంతు స్థానాలు కైవసం చేసుకోవడం మామూలు విషయమూ కాదు. సుదీర్ఘకాలం పోరాట స్ఫూర్తితో పనిచేసిన ఈ పార్టీ తన రాజకీయ ప్రస్థానంలో ఎన్నో ఒడిదుడుకులను చవిచూసింది. విఘాతాలు ఎదురైన ప్రతిసారీ నేలకు కొట్టిన బంతిలా తిరిగి లేచి తన లక్ష్యాల దిశగా అడుగులు వేసింది. ఉద్యమ నేతగా, ప్రభుత్వాధినేతగా కేసీఆర్ నిర్వహించిన పాత్ర అద్వితీయమైనది. అసాధ్యాలను సైతం సుసాధ్యం చేసుకుంటూ, అవరోధాలను అధిగమిస్తూ ఆయన ముందుకు సాగిన విషయం తెలిసిందే. తెలంగాణను సాధించిన పార్టీగా, అభివృద్ధిలో అంగలు వేసిన ప్రభుత్వాన్ని అందించిన పార్టీగా చరిత్ర పుటల్లో బీఆర్ఎస్ తన స్థానాన్ని సుస్థిరం చేసుకున్నది.
తెలంగాణ ఎన్ని అవాంతరాలు, ఎన్నెన్ని గడ్డు సమస్యలను దాటింది, ఎలా ఎదిరించి సవాల్ చేసింది, ఎలా నిలిచి, గెలిచిందో మనందరికీ తెలుసు. ఎందరెందరో మహామహుల వల్ల కానిది, కలలో కూడా ఊహించలేని తెలంగాణ రాష్ట్ర సాధన స్వప్నాన్ని సాకారం చేసిన వ్యక్తి కేసీఆర్. రెండు విడతలు సుస్థిరమైన, సువ్యవస్థితమైన పాలన అందించారనడం నిర్వివాదాంశం. సాధించిన ప్రగతి మధ్యలో ఆగిపోకూడదు. కొన్ని మైలురాళ్లు దాటినా, ఇంకా అధిరోహించాల్సిన శిఖరాలు ఎన్నో ఉన్నాయి. మూడో విడతతో అభివృద్ధి సౌధాన్ని మరింత పటిష్ఠం చేసుకోవాల్సిన అవసరాన్ని బీఆర్ఎస్ పదే పదే నొక్కిచెప్పింది. కానీ, తాజా ఎన్నికల ఫలితాలతో తెలంగాణ భవితవ్యం కొత్త మలుపు తిరిగింది. ఆ దారిలో ఏమేం ఎదురవుతాయనేది కాలమే నిర్ణయిస్తుంది. ఏదేమైనా ప్రజలే అంతిమ నిర్ణేతలు. ఆ ఎరుకతోనే తీర్పును శిరసావహిస్తామని, నిర్మాణాత్మక ప్రతిపక్ష పాత్రను పోషిస్తాని బీఆర్ఎస్ నాయకత్వం ప్రకటించడం ప్రజాస్వామిక స్ఫూర్తికి నిదర్శనం. ఎన్నికల ఫలితాల సరళి తెలియగానే కేసీఆర్ సీఎం పదవికి హుందాగా రాజీనామా చేసి సొంత వాహనంలో ప్రగతి భవన్ నుంచి తన నివాసానికి వెళ్లిపోయారు. ఏదేమైనా ప్రజా తీర్పు ను అనుకూలంగా పొందిన కాంగ్రెస్కు అభినందనలు.