ఉద్ధండ పండితులే కానీ ఉండవలసిన బుద్ధి మాత్రం లేదన్నట్టు పేరుకే ఆ రెండూ జాతీయపార్టీలు కానీ ఆ స్థాయిలో విశాలమైన అభివృద్ధి ప్రణాళిక ఏదీ వాటికి లేదు. ఇది కాంగ్రెస్, బీజేపీల మాట అని వేరే చెప్పాల్సిన పనిలేదు. పేరు గొప్ప జాతీయ పార్టీలైన ఈ రెండు సమాఖ్య స్ఫూర్తికి భంగం కలుగకుండా ప్రాంతీయ ఆకాంక్షలను పరిగణనలోకి తీసుకొని ప్రత్యామ్నాయ ఎజెండాతో ముందుకురావచ్చు.
నిర్మాణాత్మక అభివృద్ధి ప్రణాళికను ముందుకుతేవచ్చు. కానీ, అలా చేయవు. ఇది చేస్తాం. అది చేస్తాం.. చంపేస్తాం.. పొడిచేస్తాం.. అన్నదే వీరి భాష. కూల్చుడే తప్ప కట్టుడు వారికి తెలియదు పాపం. అందుకే తెలివైన తెలంగాణ ప్రజలు వారిని దూరం పెడుతుంటారు. మత రాజకీయాలకు బీజేపీ పెట్టింది పేరు. మరోవైపు కాంగ్రెస్వి అనాదిగా కుల రాజకీయాలే. ఇప్పుడు ఆపద్ధర్మంగా ఇద్దరూ తమ పాత్రలు అదల్ బదల్ చేసుకున్నారు. అయిందానికి కానిదానికి మత విద్వేషాలను రెచ్చగొట్టడం బీజేపీకి ఆనవాయితీ. కానీ, ఇక్కడ ఆ పప్పులు ఉడకవని తెలిసి కొత్తపాట ఎత్తుకుంది. గేరు మార్చి కుల రాజకీయాలకు ఆజ్యం పోస్తున్నది.
సర్వేలన్నింటిలోనూ బీజేపీ పనితీరు నానాటికి తీసికట్టుగానే ఉంది. ఆ పార్టీ గ్రాఫ్ ఇప్పుడప్పుడే పైకి లేచే అవకాశాలు కనిపించడం లేదు. అందుకే తన అసలు సిసలు తత్వానికి విరుద్ధంగా మతాన్ని కాసేపు పక్కనపెట్టి కులాన్ని భుజానికెత్తుకుంది. బీసీలు, ఎస్సీలంటూ గావుకేకలు పెడుతున్నది. ప్రధాని మోదీ వచ్చి నేనే అసలైన బీసీని అంటారు. తెలంగాణలో బీజేపీ గెలిస్తే బీసీయే ముఖ్యమంత్రి అంటారు. గెలిచే అవకాశాలు ఏ కోశానా లేవని తెలిసే ఆయన ధీమాగా హామీ ఇచ్చేశారు. మోదీ బీసీ మూలాల చర్చను కాసేపు పక్కనపెడితే బీజేపీ బీసీ విధానాలు జగమెరిగినవే. మండల్పై మంటలు రేపిన బీజేపీ బీసీల రిజర్వేషన్లకు ఏ మాత్రం అనుకూలమో తెలియంది కాదు.
ఆ తర్వాత వారంలోపే ఎస్సీల బుజ్జగింపు బాటపట్టారు. పదేండ్ల నాడు వందరోజుల్లో వర్గీకరణ అంటూ టాంటాం వేసుకొని ఆ తర్వాత మరిచిపోయారు. ఇప్పుడు హడావుడిగా వచ్చి సెంటిమెంట్ పండించారు. ఆయన ఏం ప్రకటిస్తారోనని ఆశగా ఎదురుచూసిన వారికి ఉత్సాహం నీరుగారిపోయింది. రాజుగారు మెచ్చుకొని ఉల్లిగడ్డ చేతుల వెట్టినట్టు కమిటీ పేరిట కాలయాపన చేస్తామని కుచ్చుటోపీ పెట్టారు. తెలంగాణ స్వపరిపాలన ఏర్పడిన తర్వాత ముఖ్యమంత్రి కేసీఆర్ నేతృత్వంలోని బీఆర్ఎస్ ప్రభుత్వం మాదిగల దీర్ఘకాలిక డిమాండ్ అయిన ఎస్సీ వర్గీకరణకు అసెంబ్లీలో తీర్మానం చేయించి ఢిల్లీకి పంపింది. ఈ పదేండ్లలో ఆ తీర్మానం అమలుకు పూచికపుల్ల కూడా కదపని బీజేపీ ఇప్పుడు చివరి నిమిషంలో ఉత్తుత్తి హంగా మా చేస్తే నమ్మడానికి ప్రజలు వెర్రివెంగళప్పలా?
అటు ఎప్పుడూ కుల రాజకీయాలు నడిపే కాంగ్రెస్ మతం పేరిట ఓట్లు దండుకునేందుకు మైనారిటీ మంత్రం పఠిస్తున్నది. అధికారంలో ఉన్నప్పడు ఏ మాత్రం పట్టించుకోని పార్టీ ఇప్పుడు కులగణనలో మైనారిటీలను చేర్చాలనే నినాదాన్ని భుజాన వేసుకొని ఊరేగుతున్నది. మునిగిపోయేవాడు ఏ చిన్న కర్రముక్క దొరికినా పట్టుకోవాలని చూసినట్టు ఓటమి భయంతో మైనారిటీలకూ ఓ డిక్లరేషన్ ఇచ్చేసింది. సీఎం కేసీఆర్ ఈసరికే ఇస్తున్న ప్రయోజనాలను అర్రాసు తరహాలో పెంచడం తప్ప అందులో కొత్త అంశం ఒక్కటీ లేకపోవడం గమనార్హం. బీఆర్ఎస్ వెంట ఉక్కు స్తంభంలా నిలిచిన మైనారిటీలను దువ్వేందుకు ఆచరణ సాధ్యం కాని హామీలను గుప్పించింది. కాంగ్రెస్, బీజేపీలకు బీసీ, ఎస్సీ, మైనారిటీలంటే కేవలం ఓట్లుగా మాత్రమే తెలుసు.
ఎన్నికలప్పుడే వారికి అదీ ఇదీ చెప్పడం ఆ పార్టీలకు అలవాటుగా మారింది. కానీ బీఆర్ఎస్ విధానం అది కాదు. సకలజనులను సమాదరించే సమ్మిళిత వృద్ధి లక్ష్యంగా సీఎం కేసీఆర్ పరిపాలన సాగుతున్నది. బడుగు, బలహీన, మైనారిటీ వర్గాల కోసం ఆయన దీర్ఘకాలికంగా ఆలోచించి గురుకులాలు, ఆత్మగౌరవ భవనాలు మొదలుకొని పారిశ్రామికవేత్తలుగా తీర్చిదిద్దడం వరకు బహుముఖ వ్యూహంతో పథకాలు రూపొందించి అమలుచేస్తున్నారు. ఎన్నికలతో వాటికి ప్రమేయం లేదు. హమీ ఇచ్చినవే కాదు ఇవ్వనివీ అమలుచేయడం సీఎం కేసీఆర్ ప్రత్యేకత. పార్టీ పదవులైనా, ప్రభుత్వ పదవులైనా బహుజనులకు ప్రాధాన్యం కల్పించే పార్టీ కనుక బీఆర్ఎస్ను బడుగుల రాష్ట్ర సమితి అంటారు. కాగా వారిని తరిమికొట్టిన పార్టీలుగా కాంగ్రెస్, బీజేపీ అపకీర్తిని మూటగట్టుకున్నాయి. ఎన్నికల సీజన్లో మొక్కుబడిగా బడుగులను తలచుకొని, కపట ప్రేమ ఒలకబోసే పార్టీలకు, బీఆర్ఎస్ పార్టీకి జమీన్ ఆస్మాన్ పరఖ్ ఉంది. అన్నిటినీ పరకాయించి నిగ్గు తేల్చే ఓటరుకు ఎవరు ఏమిటో బాగా తెలుసు.