TTD | తిరుమల తిరుపతి దేవస్థానం శ్రీవారి భక్తులకు శుభవార్త చెప్పింది. ఆగస్ట్కు సంబంధించిన అంగప్రక్షిణం టోకెన్లను బుధవారం ఉదయం 11 గంటలకు ఆన్లైన్లో విడుదల చేయనున్నట్లు తెలిపింది. శుక్రవారం మినహా మిగతా అన్ని రోజుల్లో 750 టోకెన్ల చొప్పున కేటాయించనున్నది. ఈ విషయాన్ని భక్తులు గమనించాలని కోరింది.
అంగప్రదక్షిణం స్వామివారికి ఎంతో ప్రీతికరమైంది. దీంతో భక్తిభావంతో భక్తులు స్వామివారి కటాక్షం కోసం పొర్లుదండాలు పెడుతుంటారు. అంగప్రదక్షిణం టోకెన్లు ఉన్న భక్తులు ప్రతిరోజు వేకువజామున ముందుగా శ్రీవారి పుష్కరిణిలో పుణ్యస్నానం చేసి తడి బట్టలతో వైకుంఠం క్యూ కాంప్లెక్స్ ద్వారా ఆలయంలోకి ప్రవేశిస్తారు. ఆ తర్వాత వెండి వాలికిలో నుంచి బంగారు వాకిలికి చేరుకుంటారు.
వెండి వాకిలి లోపల ఆనంద నిలయం చుట్టూ చేసే ప్రదక్షిణనే అంగప్రదక్షిణంగా పిలుస్తుంటారు. ఓ వైపు సుప్రభాత సేవ జరిగే సమయంలోనే టీటీడీ భక్తులకు అంగప్రదక్షిణ చేసే అవకాశం కల్పిస్తుంది. భక్తులు వెండి వాకిలి లోపలికి ప్రవేశించగానే ఎదురుగా ఆదిశేషునిపై శ్రీరంగనాథుడు కొలువై కనిపిస్తాడు. ఆయనకుపైన వరదరాజ స్వామి, కింద వేంకటేశ్వరస్వామి చిత్రాలు చిన్న బంగారు ఫలకాలపై ఉంటాయి. ఇక్కడి నుంచి అంగప్రదక్షిణ కార్యక్రమం ప్రారంభమవుతుంది. ఆనంద నిలయం చుట్టూ ఒకసారి అంగప్రదక్షిణం చేసిన తర్వాత భక్తులకు టీటీడీ శ్రీవారి దర్శనభాగ్యం కల్పిస్తుంది.