‘పొరుగున ఉన్న బంధువులు, అపరిచితులైన పొరుగువారు, పక్కనున్న మిత్రులు, బాటసారులు, మీ అధీనంలో ఉన్న దాసదాసీ జనం పట్ల ఉదారబుద్ధితో వ్యవహరించండి’ అంటుంది ఖురాన్. ఈ వాక్యం మన పొరుగువారితో సాన్నిహిత్యంగా, సత్సంబంధాలను కలిగి ఉండాలని బోధిస్తుంది. ఇరుగుపొరుగు వారు ఏ మతానికి చెందినవారైనా సత్సంబంధాలు కలిగి ఉండాలని ఖురాన్ ఉద్బోధ. ‘అతను విశ్వాసి కాడు, దైవసాక్షిగా అతను విశ్వాసి కాడు’ అన్నారు దైవప్రవక్త. ‘ఎవరు?’ అని అడిగారు అక్కడున్నవారు. ‘పొరుగువారికి అశాంతి కలిగించే వారు’ అని ప్రవచించారు.
‘జిబ్రీల్ (అస్సలాం) పొరుగు వారిపట్ల మంచిగా ప్రవర్తించాలని ప్రతినిత్యం నాకు తాకీదు చేసేవారు. చివరికి ఇరుగుపొరుగు వారిని పరస్పరం వారసులుగా ప్రకటిస్తారేమో అని నాకు అనుమానం కలిగేది’ అని ముహమ్మద్ ప్రవక్త చెప్పారు. ‘అబూజర్ నువ్వు ఏదైనా కూర వండినప్పుడు అందులో కాస్త నీళ్లు ఎక్కువ పొయ్యి, పొరుగువారిని కూడా కనిపెడుతూ ఉండు’ అని పేర్కొన్నారు. ఒకవ్యక్తి ముహమ్మద్ (స) దగ్గరికి వచ్చి ‘ఫలానా స్త్రీ ఎన్నెన్నో నమాజులు చేస్తుంది, ఉపవాసాలు పాటిస్తుంది. దానధర్మాలు చేస్తుంది. చాలా ఖ్యాతి పొందింది కూడా, అయితే ఆమె నోటి మాట ద్వారా పొరుగు వారిని కష్టపెడుతుంది’ అని చెప్పాడు. దానికి మహాప్రవక్త (సఅసం) ‘ఆమె నరకానికే పోతుంది’ అని పలికారు.
తిరిగి ఆ వ్యక్తి ‘దైవప్రవక్తా, మరో మహిళ బహు అరుదుగా నఫిల్ రోజాలు పాటిస్తుంది. అతి స్వల్పంగానే నఫిల్ నమాజులు ఆచరిస్తుంది. పాలజున్ను ముక్కలు కొన్ని మాత్రం దానం చేస్తుంది. కానీ, తన మాటతో పొరుగువారిని ఏనాడూ కష్టపెట్టదు అని చెప్పుకొంటారు’ అన్నాడు. ఇది విని మహాప్రవక్త (సఅసం) ‘ఈమె స్వర్గ నివాసి’ అని సెలవిచ్చారు. ఒకవేళ ఇరుగుపొరుగుతో సంబంధాలు చెడితే వెంటనే వాటిని సరిదిద్దుకోవాలి. వాటిని పునరుద్ధరించుకోవాలి. ఇరుగుపొరుగు విషయంలో తమవల్ల జరిగిన పొరపాట్లకు, తప్పులకు వారిని క్షమాపణ కోరాలి.
– ముహమ్మద్ ముజాహిద్ 96406 22076