యాదగిరిగుట్ట: యాదగిరిగుట్ట (Yadagirigutta) శ్రీలక్ష్మీనరసింహస్వామి దివ్య క్షేత్రంలో మంగళవారం స్వాతి నక్షత్ర పూజల కోలాహలం నెలకొంది. వేకువ జామునే స్వయంభువులను కొలిచిన అర్చకులు.. ఆలయంలో కవచమూర్తులకు అష్టోత్తర శతఘటాభిషేకం పూజలు చేశారు. నారసింహుడి జన్మ నక్షత్రం సందర్భంగా ప్రధానాలయ ముఖ మండపంలో 108 కలశాలను ప్రత్యేకంగా ఏర్పాటు చేశారు. కలశాల్లోని జలాలకు పాంచరాత్రాగమశాస్త్రం ప్రకారం పూజలు జరిపారు. పాలు, పెరుగు, శుద్ధ జలాలతో వేదమంత్రాలు, మంగళ వాయిద్యాలతో సుమారు రెండు గంటలపాటు అష్టోత్తర శత ఘటాభిషేకం నిర్వహించారు.
స్వామివారిని ప్రత్యేకంగా ఆలంకరించి బంగారు పుష్పాలతో అర్చన చేశారు. పంచసూక్త పఠనంతో హోమం నిర్వహించి ఉత్సవమూర్తులను, ప్రతిష్ఠ అలంకార మూర్తులను అభిషేకించారు. తులసీ దళాలతో సహస్ర నామార్చనలు జరిపారు. సాయంత్రం స్వామి, అమ్మవార్లను రథసేవలో ఉంచి ముఖ మండపంలో ఊరేగించారు. భక్తులు వేకువజామునే కొండ చుట్టూ గిరి ప్రదక్షిణలు చేసి మొక్కులు తీర్చుకున్నారు.