తిరుపతి : తిరుపతి (Tirupati) గోవిందరాజస్వామివారి ఆలయంలో కోయిల్ ఆళ్వార్ తిరుమంజనాన్ని( Koil Alwar Thirumanjanam ) ఘనంగా నిర్వహించారు. ఈనెల 9న ఉగాది పర్వదినం (Ugadi Festival ) సందర్భంగా నిర్వహించే ఆస్థానానికి ముందు వచ్చే ఆరో రోజు గురువారం తిరుమంజనాన్ని నిర్వహించడం ఆనవాయితీగా వస్తుంది. తెల్లవారుజామున సుప్రభాతంతో స్వామివారిని మేల్కొలిపి తోమాల, కొలువు, పంచాంగ శ్రవణం, అర్చన నిర్వహించారు.
అనంతరం ప్రాంగణం, గోడలు, పైకప్పు, పూజాసామగ్రి తదితర అన్ని వస్తువులను నీటితో శుద్ధి చేసిన అనంతరం నామకోపు, శ్రీచూర్ణం, కస్తూరి పసుపు, పచ్చాకు, గడ్డ కర్పూరం, గంధం పొడి, కుంకుమ, కిచీలీగడ్డ తదితర సుగంధ ద్రవ్యాలు కలగలిపిన పవిత్రజలాన్ని ఆలయం అంతటా ప్రోక్షణం చేశారు. అనంతరం భక్తులను ఉదయం 9.30 గంటల నుంచి దర్శనానికి అనుమతించారు.
తిరుమలను దర్శించుకున్న 61,087 మంది భక్తులు
తిరుమల (Tirumala) లో భక్తుల రద్దీ కొనసాగుతుంది. స్వామివారి దర్శనానికి 4 కంపార్టుమెంట్లలో భక్తులు వేచియున్నారు. నిన్న స్వామివారిని 61,087 మంది భక్తులు దర్శించుకోగా 22,530 మంది తలనీలాలు సమర్పించుకున్నారు. టోకెన్లు లేని భక్తులకు 8 గంటల్లో సర్వదర్శనం కలుగుతుందని అధికారులు తెలిపారు. మొక్కుల ద్వారా సమర్పించిన కానుకల వల్ల హుండీ ఆదాయం (Hundi Income ) రూ. 3.34 కోట్లు వచ్చిందన్నారు.